1 Tesalonicenses 2:1-20
2 Natalan, wixin liwana katsiyatit pi ni kaj paxkat wanit xlakata kkalakgapaxialhnan.
2 Xlakata maski akinin pulana nitlan kinkalikatsinikan chu lu kpatinaw kFilipos, chuna la katsiyatit, Dios kinkamaxkin litliwakga xlakata nakkalitachuwinanan xatlan xtamakatsinin maski tuwa tuku ktitaxtuw.*
3 Xlakata tastakyaw nema kkamaxkiyan ni takilhti tuku ni xaxlikana chu tuku xalixkajni, chu ni kkamaxkiyan xlakata nakkaʼakgskgawiyan,
4 wata chuna la kinkalakgayawakan xlakata naklichuwinanaw xatlan tamakatsinin, chuna klichuwinanaw ni xlakata nakkamakgapaxuwayaw lakchixkuwin, wata Dios, wa tiku lakputsanani kinakujkan.
5 Wixin katsiyatit pi nikxni kkaliʼakgskgawin lakstlan tachuwin, chu ni klimasiyaw pi tlan klikatsiyaw xlakata wi tuku xakmakglhtinaw. ¡Dios liwana katsi uma!
6 Ni kputsamaw pi lakchixkuwin kakinkamaxkikgon kakni, nipara wixin nipara amakgapitsin, maski tlan tapalaxla limawit xakkalitaxtunin xlakata akinin xʼapóstoles Cristo.
7 Wata tlan kkalikatsinin xtachuna la chatum tse mawi chu paxki* kskgata.
8 Chu xlakata lu kkapaxkiyan, tapaxuwan kkalitachuwinan xatlan xtamakatsinin Dios chu kmastaw kilatamatkan xlakata nakkamakgtayayan.
9 Max lakapastakatit natalan pi ni analh tajaxni akxni kskujwi. Akxni kkalitachuwinan xatlan xtamakatsinin Dios, kskujwi kakuwani chu katsisni xlakata nakkgalhiyaw tuku kmaklakaskinaw chu ni kaj tapalaxla limawit xakkalitaxtunin.
10 Wixin tiku kanajlayatit chu nachuna Dios, akxilhatit pi chuna la kkamakgtayayan ni kmakgxtakgnanaw chu xaʼakgstitum klikatsiyaw chu nila kinkalimawakakanan tuku nitlan.
11 Wixin liwana katsiyatit pi akinin chuntiya kkastakyawaman chu kkamatliwakglhman xlakata chuna la nalipinatit milatamatkan, chuna la chatum tlat* kalikatsini xkamanan,
12 xlakata nalatapayatit chuna la lakaskin Dios, tiku kalaksaknitan xlakata natanuyatit kxTamapakgsin chu namakglhtinanatit xlilanka.
13 Xlikana, ni anan tajaxni kpaxtikatsiniyaw Dios, xlakata akxni wixin makglhtinantit xtachuwin Dios, nema kkalitachuwinan, makgamakglhtinantit ni kaj la* xtachuwin lakchixkuwin, wata chuna la xtachuwin Dios, uma tachuwin kamakgtayaman tiku kanajlayatit.
14 Xlakata wixin, natalan, na tlawatit chuna la xcongregaciones Dios nema akxtum tawilakgolh Cristo Jesús chu wilakgolh kJudea, xlakata wixin na kamakgapatinankgon mintachikikan chuna la natalan xalak Judea patinamakgolh kxmakankan judíos,
15 tiku asta makgnikgolh Malana* Jesús chu palakachuwinanin, chu akinin kinkaputsastalanikgon. Nachuna, xlakan ni makgapaxuwakgo Dios, wata tuku tlawakgo tlawa pi nitlan nakakitaxtuni putum latamanin,
16 xlakata xkinkamalakgachokgoputunkgoyan xlakata ni nakkalitachuwinanaw xtachuwin Dios latamanin tiku xalak atanu kachikinin, uma taskujut nema tlawa pi umakgolh latamanin nalakgtaxtukgo. Chuna, xlakan putum kilhtamaku lhuwa talakgalhin tlawamakgolh. Pero xtasitsi Dios nialh makgas nakalakgchin.
17 Natalan, akxni lakchixkuwin tlawakgolh pi nakkatamakgatliniyan nialhla kkaʼakxilhni, pero chuntiya kkalakapastakan, xlakata lu kkaʼakxilhputunan lu kliskujwi xlakata nakkalakgamparayachan.
18 Wa xlakata, xakkalakgamputumparayachan, akit, Pablo, makgtiy chuna klitsakgsalh; pero Satanás malakgachokgolh kintijikan.
19 Wa xlakata, ¿tuku naklipawanaw o naklipaxuwayaw o kintatlajakan* nawan akxni namin kiMalanakan Jesús? ¿Pi ni wixin?
20 Wixin litaxtuyatit tuku lanka kinkalimakgkatsikanan chu kintapaxuwankan.
Notas
^ O: «kpatiw».
^ O: «makspalha».
^ Alakatanu wankan «tata o tiku».
^ Alakatanu wankan «chi».
^ Alakatanu wankan «Puchina».
^ Xagriego: «kincoronajkan».
