1 Tesalonicenses 4:1-18
4 Natalan, kkamasiyaninitan nalipinatit milatamatkan chuna la makgapaxuwa Dios, chu chuna tlawapatit, pero uku kxtukuwani Malana* Jesús kkastakyawayan chu kkaskiniyan pi tlakg chuntiya katlawatit.
2 Xlakata wixin kalakgapasatit limapakgsin nema kkamaxkin kxtukuwani Malana Jesús.
3 Xlakata wa uma xtalakaskin Dios: pi xaskulunku nalipinatit milatamatkan chu ni natlawayatit talakgxtumit nema ni xlitatlawat.*
4 Chatunu wixin kamachokgolh tuku tlawaputun xmakni,* xlakata chuna skulunku nawan chu Dios tlan naʼakxilha,
5 ni lhuwa tuku nakgalhiputunatit, chu ni lu natalakgxtumiputunatit chuna la tlawakgo tiku xalak atanu kachikinin nema ni lakgapaskgo Dios.
6 Niti natlawani tuku nitlan xtala chu ni nalakgamakglhti tuku tapakgsini, xlakata Jehová namalakgaxokge xpalakata uma, chuna la kkawaninitana chu palha kkalistakyawan.
7 Xlakata Dios ni kinkalaksakni natlawayaw tuku xalixkajni, wata xasantos nalitaxtuyaw.
8 Wa xlakata, tiku lakgmakgan uma tamasiy ni chatum lataman lakgmakgama, wata lakgmakgama Dios, tiku kamaxkiyan xʼespíritu santo.
9 Pero xlakata tapaxkit xtachuna nema lakgalhinikan kfamilia, ni talakaskin nakkatsokgnaniyan, xlakata wixin, Dios kamasiyaninitan nalapaxkiyatit chatunu chatunu.
10 Xlikana, chuna kalikatsinipatit putum natalan xalak Macedonia. Pero kkastakyawayan natalan, pi chuntiya tlakg katlawatit uma.
11 Chu kaliskujtit xlakata akgstitum nalipinatit milatamatkan chu ni namakgtanuyatit kxlatamatkan amakgapitsin chu kaliskujtit mimakankan, chuna la kkalimapakgsinitan;
12 xlakata xaʼakgstitum nalatapayatit kxlakatinkan latamanin chu nitu nakakitsankganiyan.
13 Nachuna, natalan, klakaskinaw pi liwana kakatsitit xpalakata tiku nikgonita, xlakata wixin ni lu nalilipuwanatit chuna la tlawakgo tiku ni kgalhikgo takgalhkgalhin.
14 Xlakata komo kanajlayaw pi Jesús nilh chu malakastakwaniparaka, na kanajlayaw pi Dios akxtum nakatamalakastakwanipara tiku lhtatamakgolh kkalinin.
15 Chuna la wan xtachuwin Jehová kkawaniyan: pi akinin tiku lamawku akxni kinkatawilan nawan Malana, nalakastakwananaw kʼakgapun. Pero tiku nikgonita nalakastakwanankgo pulana, alistalh nalakastakwananaw akinin;
16 xlakata Malana naminacha chu pixlanka* nachuwinan xtachuna la xtachuwin xpuxkukan ángeles, chipanit nawan xtrompeta Dios. Chu alistalh, tiku akxtum tawilakgolh Cristo pulana nalakastakwanankgo.
17 Alistalh, akinin tiku staknamawku nawan, xlakan chu akinin akxtum nakinkalinkanan kpuklhni xlakata talhman natatanokglhaw Malana; chu chuna putum kilhtamaku natatawilayaw Malana.
18 Wa xlakata, chatunu chatunu chuntiya tlan kalalimamakgkatsinitit umakgolh tachuwin.
Notas
^ Alakatanu wankan «Puchina».
^ Griego, pornéia. Kaʼakxilhti glosario.
^ Xagriego: «xvaso».
^ Alakatanu wankan «akglhman».
