1 Timoteo 1:1-20
1 Pablo, xʼapóstol Cristo Jesús xlakata chuna limapakgsinankgolh kiLakgmaxtunakan Dios chu Cristo Jesús, tiku xpalakata kgalhiyaw takgalhkgalhin,
2 ktsokgnaniman Timoteo,* xaxlikana kinkgawasa kxtaskujut kiMalanakan:*
Kskin pi Dios, xaTlat,* chu Cristo Jesús kiMalanakan, kamaxkikgon talakgalhaman nema ni anan xtachuna,* kasikulunatlawakgon chu kamaxkikgon takaksni.
3 Chuna la kskinin pi xtamakgxtakgti kʼÉfeso akxni aku xakama kMacedonia, nachuna kskiniyan uku, pi palha kakastakyawa makgapitsi latamanin pi ni kamalakgatumikgolh ni xaxlikana tamasiy,
4 nipara kakgaxmatkgolh cuentos* chu tuku tsokgkanit xpalakata xtukuwanikan xalakgmakgan kinatlatnikan. Putum uma kaj nitu litaxtu chu tlawa pi latamanin nalichuwinankgo tuku nila masiyakan komo xlikana chu ni mastakgo tuku xla Dios nema matliwakglha takanajla.
5 Uma limapakgsin kmasta xlakata nakgalhiyaw tapaxkit nema minacha kxaskulunku naku, kxatlan talakapastakni chu ktakanajla nema ni lakgaputiyunan.
6 Chu xlakata lakgmakgankgolh uma, makgapitsi makgtanukgolh ktakgalhchuwin nema nitu litaxtu.
7 Litaxtuputunkgo makgalhtawakgenanin xla xlimapakgsin Dios, pero ni akgatekgskgo* tuku lichuwinankgo chu tuku lu masiyakgo.
8 Pero chuna la katsiyaw, Limapakgsin lu tlan akxni liwana makgantaxtikan,
9 nachuna, Limapakgsin ni lakkaxwilika xpalakata tiku xaʼakgstitum likatsi, wata xpalakatakan tiku lakatsalakgo limapakgsin, tiku ni kgalhakgaxmatnankgo, tiku ni maxkikgo kakni Dios chu lakgalhinanin, tiku makgxtakgnankgo* chu tiku lakgmakgankgo tuku xla Dios, tiku makgni xtlat, xtse o amakgapitsin,
10 tiku tlawakgo talakgxtumit nema ni xlitatlawat,* lakchixkuwin tiku katatalakgxtumikgo xtachixkukan,* tiku kakgalhankgo latamanin, akgsaninanin, tiku ni makgantaxtikgo tuku malaknukgo, chu putum atanu nema lakataki xatlan tamasiy.*
11 Uma tamasiy takilhtinit kxatlan tamakatsinin tuku kgalhi lhuwa kakni nema masta xapaxuwana Dios, nema kimakamaxkika xlakata xaklichuwinalh.
12 Lu kpaxtikatsini Cristo Jesús kiMalanakan, tiku kimaxkilh litliwakga xlakata kiʼakxilhli pi ni kmakgxtakgnan chu kilakgayawalh xasanto taskujut,
13 maski xapulana lixkajni klichuwinalh Dios, kputsastalanilh xkachikin chu ktlankajwanalh. Pero chuna ktlawalh xlakata nitu xakkatsi chu xlakata ni xakkgalhi takanajla, wa xlakata Cristo kilakgalhamalh.
14 Pero kiMalanakan kilimasiyanilh lhuwa talakgalhaman nema ni anan xtachuna,* chu Cristo Jesús kimaxkilh takanajla chu tapaxkit.
15 Uma tachuwin lakgchan lu nakanajlaniyaw chu xaxlikana: Cristo Jesús milh kkakilhtamaku xlakata nakalakgmaxtu lakgalhinanin. Xliputum umakgolh lakgalhinanin, akit tlakg xakkgalhi talakgalhin.
16 Pero kilimasiyanika talakgalhaman xlakata kaj kimpalakata, tiku tlakg xakkgalhi talakgalhin, Cristo Jesús xlimasiyalh pi lu xakgalhkgalhina, chu akgtum liʼakxilhtit xkilimaxtulh xpalakata tiku amakgo kanajlanikgo xlakata namakglhtinankgo latamat nema ni kgalhi xlisputni.
17 Ankgalhin kamalankika chu kamaxkika kakni tiku putum kilhtamaku Mapakgsina, tiku putum kilhtamaku lama, tiku nila akxilhkan, tiku kajwatiya Dios litaxtu. Chuna kalalh.
18 Klakgayawayan uma limapakgsin, kinkgawasa Timoteo, xtachuna la wi kxtachuwinkan palakachuwinanin nema alipulana wankgolh mimpalakata. Umakgolh tachuwin namatliwakglhkgoyan xlakata chuntiya namakgtlawaya xatlan guerra,
19 chuntiya kakgalhi takanajla chu xatlan talakapastakni, nema makgapitsi lakgmakgankgonit chu xlakata uma, lakgtsankganit xtakanajlakan xtachuna la akgtum barco lakgtsankga kpupunu.
20 Makgapitsi tiku nachuna tlawakgolh wa Himeneo chu Alejandro, chu akit kkamakamaxkinit Satanás, xlakata palha kastakyawaka nakatsinikgo ni lixkajni nalichuwinankgo Dios.
Notas
^ Uma wamputun, «chatum tiku maxki kakni Dios».
^ Alakatanu wankan «kimPuchinakan».
^ Alakatanu wankan «xaTata o xaTiku».
^ O: «talakgalhaman nema ni kinkalakgchanan». Kaʼakxilhti glosario.
^ O: «ni xaxlikana tachuwin».
^ Alakatanu wankan «ni tamakgachakgxi».
^ O: «tiku ni kgalhikgo tapaxkit nema ni makgxtakgnan».
^ Kaʼakxilhti glosario, talakgxtumit nema ni xlitatlawat.
^ Xagriego: «lakchixkuwin tiku katatamakgo lakchixkuwin».
^ O: «tamasiy nema makgtayanan».
^ O: «talakgalhaman nema ni kinkalakgchanan». Kaʼakxilhti glosario.
