1 Timoteo 3:1-16
3 Tuku nakwan xaxlikana: komo chatum chixku lu liskujma namakgatsi tuku talakaskin xlakata kgolotsin* nawan, xla makgtlawaputun akgtum xatlan taskujut.
2 Xlilat pi kgolotsin tlan napulalin xlatamat xlakata latamanin ni natekgskgo tuku nitlan nalimawakakgo, kaj chatum puskat nakgalhi, ni namalakatsali tuku lismani tlawa, tlan nalakapastaknan, xaʼakgstitum nalin xlatamat, tlan nakamakgamakglhtinan amakgapitsin, nakatsini makgalhtawakgenan,
3 ni kgotni xliwanat, ni kgaxina xliwanat,* wata tiku kgalhi tsatata naku, ni lismani natalatlawanan, ni xpaxkina tumin nawan,
4 chatum chixku tiku liwana pulalin xfamilia chu xkamanan kgalhakgaxmatkgo chu maxkikgo kakni
5 (xlakata komo chatum chixku ni katsini chuna la napulalin xfamilia, ¿la* nakuentajtlawa xcongregación Dios?),
6 ni chatum tiku aku tsukunit kanajlani Cristo xlakata ni tlankajwa namakgkatsikan chu na watiya nalimalakgaxokgekan tuku lakgchan Akgskgawini.
7 Nachuna, xlilat pi tiku ni makgtapakgsikgo kcongregación tlan nalichuwinankgo xlakata latamanin ni nalimawakakgo tuku nitlan* chu ni natawakayacha kxliʼakgsiyat Akgskgawini.
8 Nachuna, xlilat pi tiku makgtayanankgo kcongregación* liwana nalakapastaknankgo, ni nalakgaputiyunankgo,* ni lhuwa vino nawakgo, ni xpaxkinanin tumin xliwanatkan chu ni kajwatiya naputsakgo tuku xʼakstukan tlan nakakitaxtuni,
9 ni katamakgatlinikgolh tuku tsekg wi xla Dios, uma wamputun xtakanajlakan kstalaninanin Cristo, chu chuntiya kakgalhikgolh skulunku talakapastakni.
10 Pulana kakaliʼakxilhka, xlakata nakatsikan komo tlan namakgantaxtikgo uma taskujut; alistalh kakamaxkika talakaskin naskujkgo chuna la makgtayananin kcongregación* komo ni anan tuku nitlan nakalimawakakan.
11 Nachuna, xlilat pi lakpuskatin liwana nalakapastaknankgo, ni nakalimawakakgo tuku nitlan amakgapitsin, ni namalakatsalikgo tuku lismanikgo tlawakgo, xliputum tuku natlawakgo kalimasiyakgolh xtakanajlakan.
12 Tiku makgtayanankgo kcongregación* kajwatiya chatum xpuskatkan* xlikgalhitkan, lu tlan kapulalinkgolh xkamanankan chu xfamiliajkan.
13 Xlakata lakchixkuwin tiku lu tlan chuna la skujmakgolh tlawamakgolh pi tlan nakalichuwinankan chu ni nakilhpuwankgo akxni nalichuwinankgo chuna la kanajlanikgo Cristo Jesús.
14 Ktsokgnaniman putum uma, maski nialh makgas klakgamputunachan,
15 pero komo xakmakgapalalh, xlakata nakatsiya chuna la nalatapaya kxchik Dios, wa xcongregación xastakna Dios, nema makgtaya chu tataya xaxlikana.
16 Xlikana, tuku tsekg wi xla Dios xpalakata tiku ni xʼama makgxtakga Dios xliputum tuku xʼama tlawa, xlikana lu xlakaskinka: “Jesús chatum chixku litaxtulh, Dios xaʼakgstitum liʼakxilhli akxni chatum espíritu limaxtupa chu kalakgalh ángeles, lichuwinanka kxlakgstipankan kachikinin, latamanin xalak kakilhtamaku kanajlanikgolh, makgamakglhtinankancha kʼakgapun chu malankika”.
Notas
^ O: «chatum tiku makgtaya chu kuentajtlawa congregación».
^ O: «ni chatum tiku nitlan limamakgkatsininan xtachuwin».
^ Alakatanu wankan «chi».
^ O: «ni nalakgachixkuwimakgankgo».
^ Na kalilakgapaskan «siervos ministeriales». Kaʼakxilhti glosario.
^ O: «ni kaj naliʼakgskgawinan xtachuwin».
^ Na kalilakgapaskan «siervos ministeriales». Kaʼakxilhti glosario.
^ Na kalilakgapaskan «siervos ministeriales». Kaʼakxilhti glosario.
^ Alakatanu wankan «xchatkan».
