1 Timoteo 5:1-25
5 Ni palha kastakyawa chatum chixku tiku lina kata, wata tlan katachuwinanti chuna la mintlat,* chu tiku lakgkgawasanku chuna la minatalan,*
2 chu lakpuskatin tiku linkgoya kata kakatachuwinanti chuna la mintse,* chu tiku laktsumanku chuna la minatalan laktsuman, ni nakalakpuwananiya tuku nitlan.
3 Kakamaxki kakni* lakpuskatin tiku nikgonita xchixkukan chu xlikana ni kgalhikgo tiku nakamakgtaya.
4 Pero komo chatum puskat tiku ninita xchixku kgalhi xkamanan o xnatanatni, xlakan pulana kakatsinikgolh nakuentajtlawakgo tiku xalak xchikkan chu kalimasiyakgolh pi maxkikgo kakni Dios chu chuntiya kakuentajtlawakgolh xnatlatnikan, xtatakan* chu xnanakan* xtachuna la xlaklinikgolh, xlakata uma tlan akxilha Dios.
5 Puskat tiku ninita xchixku, tiku xlikana maklakaskin tamakgtay chu nitu kgalhi, xla lipawan Dios chu chuntiya tasaskin chu tlawa oración kakuwani chu katsisni.
6 Pero tiku lu talakgxtumiputun chu makgapaxuwaputunkan ninit maski staknamajku.
7 Chuntiya kamasta umakgolh tastakyaw* xlakata tlan napulalinkgo xlatamatkan chu latamanin ni natekgskgo tuku nitlan nakalimawakakan.
8 Komo wi tiku ni kuentajtlawa xfamilia chu tlakg liwaka tiku xalak xchik, lakgmakganit takanajla chu tlakg nitlan litaxtu nixawa tiku ni kanajlani Dios.
9 Chatum puskat tiku ninita xchixku natsokgwilikan xlakata namaxkikan tamakgtay, komo kgalhi liwaka tutupuxam kata chu kaj chatum chixku kgalhilh,
10 chu lilakgapaska laktlan tatlaw, kamakgastakli kamanan, tlan kamakgamakglhtinalh amakgapitsin, katuchakgelh xasantos natalan, chu kamakgtayalh tiku xtalakgaputsimakgolh chu tamakamastanilh natlawa putum xalaktlan tatlaw.
11 Nachuna, ni kakatsokgwili lakpuskatin tiku nikgonita xchixkukan tiku nina linkgo kata, xlakata akxni talakgxtumiputunkgo, uma tlawa pi nialh naskujnanikgo Cristo, chu tamakgaxtokgputunkgo.
12 Chu xlakan nalitayakgo kuenta xlakata laktlawakgonit tuku xapulana xmalaknukgonit.
13 Nachuna, max nakatsinikgo lhkititnankgo chu naʼankgo kʼakgatunu chiki, pero ni kajwatiya nakatsinikgo lhkititnankgo, wata max na nakatsinikgo nakalichuwinankgo amakgapitsin chu namakgtanukgo kxlatamatkan amakgapitsin chu chuna nawankgo tuku ni xliwanatkan.
14 Wa xlakata, klakaskin pi lakpuskatin tiku ninita xchixkukan chu nina linkgo kata katamakgaxtokgkgolh, kakgalhikgolh kamanan, kakuentajtlawakgolh xchikkan, xlakata ni namaxkikgo talakaskin tiku kinkasitsiniyan lixkajni nakinkalichuwinanan.
15 Makgapitsi lakpuskatin tiku nikgonita xchixkukan makgxtakgkgonit xaxlikana chu stalanikgonit Satanás.
16 Komo chatum tala puskat wi kxfamilia tiku ninita xchixku, ama tala wa kamakgtayalh xlakata ni wa congregación nalakgataya ama takuka. Chuna congregación tlan nakamakgtaya lakpuskatin tiku nikgonita xchixkukan chu ni kgalhikgo tiku nakamakgtayakgo.
17 Lakgkgolotsin tiku lu tlan pulalinkgo congregación tlakg kakamaxkitit kakni, tlakg liwaka tiku lhuwa skujkgo akxni lichuwinankgo chu masiyakgo xtachuwin Dios.
18 Xlakata Tatsokgni wan: «Nitu namakgalhnuya toro akxni laktayamima* talhtsi», nachuna, «Skujni minini namaxkikan xliwat».
19 Ni kakanajla komo nalimawakakan tuku nitlan chixku tiku lina kata.* Pero komo chatiy o kgalhtutu limawakamakgolh tuku nitlan, tlan wi tuku natlawaya.
20 Kxlakatin congregación* palha kakastakyawa tiku tlawakgolh talakgalhin, xlakata amakgapitsin nalipekuankgo.
21 Klimapakgsiyan kxlakatin Dios chu Cristo Jesús chu ángeles nema Dios kalaksaknit pi kamakgantaxti uma tastakyaw, liwana kalakputsanani akxni nina wi tuku laksaka chu ni kalaksakpaxkinanti.
22 Nikxni kaj lakapala kalakgayawa akgtum taskujut* chatum chixku; chu ni kamakgtanu kxtalakgalhinkan amakgapitsin, chuntiya katlawa tuku xaʼakgstitum.
23 Nialh kawat chuchut,* wata kawat* aktsu vino xlakata nalimakgtayaya mimpokgo chu nachuna nalitamakgtayaya xlakata ankgalhin tatatlaya.
24 Xtalakgalhinkan makgapitsi lakchixkuwin tasiya kxlakatinkan amakgapitsin chu lakapala kalakputsananikan, pero xtalakgalhinkan amakgapitsi alistalh tasiyakgo.
25 Nachuna, xalaktlan tatlaw tasiya kxlakatinkan amakgapitsin chu ni xalaktlan tatlaw nila kamatsekgkan.
Notas
^ Alakatanu wankan «mintata o mintiku».
^ Alakatanu wankan «minatakamanan».
^ Alakatanu wankan «minana».
^ O: «Kakakuentajtlawa».
^ Alakatanu wankan «xpapakan».
^ Alakatanu wankan «xtsiyunakan o xtakgokan».
^ O: «limapakgsin».
^ O: «lakpajmima».
^ O: «chatum kgolotsin».
^ Uma wamputun, xalak congregación tiku akxilhkgolh talakgalhin.
^ Xagriego: «ni kaʼakwili mimakan».
^ O: «Nialh kajwatiya kawat chuchut».
^ Alakatanu wankan «kakgotti».
