1 Timoteo 6:1-21
6 Tiku skujnin litaxtukgo kakamaxkikgolh kakni xmalanakan* xliputum xnakujkan, xlakata nikxni lixkajni nalichuwinankan xtukuwani Dios chu tuku masiya.
2 Nachuna, ama tiku kgalhikgo xmalanakan kstalaninanin Cristo ni kakalakgachixkuwimakgankgolh xlakata xlakan xnatalankan litaxtukgo. Pero tlakg xatapaxuwan xliskujnanitkan xlakata tiku litamakgtayamakgo xtaskujutkan na kstalaninanin Cristo chu natalan tiku kapaxkikan.
Chuntiya kamasiya chu kalimapakgsinanti uma.
3 Komo chatum chixku malakgatumi ni xaxlikana tamasiy chu ni makgamakglhtinan xatlan tamasiy* nema mastalh kiMalanakan Jesucristo, nipara makgamakglhtinan tamasiy nema kinkawaniyan chuna la naskujnaniyaw Dios,
4 xla lanka makgkatsikan chu nitu akgatekgsa.* Lu lakgati litalatlawanan chu litaʼakglhuwi tachuwin. Uma tlawa pi nalalakgsitsilakankan, lu nalasitsinikan, nitlan nalalichuwinankan, nitlan nalalakpuwanikan,
5 uma na tlawa pi tiku taxkajwanikgonit xtalakapastaknikan chu tiku nialh akgatekgskgo* xaxlikana ankgalhin nalitalatlawanankgo tuku ni lu xlakaskinka. Xlakan lakpuwankgo pi xlakata chuna la kakninanikgo Dios wi tuku nalimakglhtinankgo.
6 Xlikana, tiku tamakamastani Dios chu lipaxuwa tuku kgalhi,* makgamakglhtinan lhuwa tuku tlan.
7 Xlakata nitu liminitaw kkakilhtamaku chu na nila tuku nalinaw.
8 Wa xlakata, komo kgalhiyaw liwat chu lhakgat,* nalipaxuwayaw uma.
9 Pero tiku lhuwa tumin kgalhiputunkgo tlawakgo tuku nitlan kamatlawiputunkan chu tawakakgoyacha kʼakgtum liʼakgsiyat chu nitlan tuku kakitaxtuni xlakata tlawaputunkgo lhuwa tuku nitu litaxtu chu tuku kalakglakgalhi chu nakamalakgsputukan.
10 Xlakata akxni paxkikan tumin anta kilhtsuku lhuwa tuku lakglakgalhinan, chu makgapitsi xlakata paxkikgo tumin, makgxtakgkgonit takanajla chu xʼakstukan tlawakgonit pi napatikgo tipalhuwa takatsanajwat.
11 Pero wix, kskujni Dios, katsalani putum uma. Pero putum kilhtamaku kaliskujti xlakata xaʼakgstitum nawana, naskujnaniya Dios, nakgalhiya takanajla, napaxkinana, natayaniya chu nakgalhiya tsatata naku.
12 Katalachipananti kxatlan latalachipat xla takanajla; tliwakglh kachipa latamat nema ni kgalhi xlisputni. Dios tasanin xlakata namakglhtinana chu wix lichuwinanita uma latamat kxlakatin lhuwa latamanin.
13 Kxlakatin Dios, tiku maxki latamat putum tuku anan chu kxlakatin Cristo Jesús, tiku lu tlan chuna la litachuwinalh xTamapakgsin Dios Poncio Pilato, klimapakgsiyan
14 pi kamakgantaxti limapakgsin nema kmaxkin chu chuntiya nitu kalixkajwananti chu niti kalimawakan tuku nitlan asta akxni kiMalanakan Jesucristo namasiya xlitliwakga,
15 tiku xapaxuwana chu tiku kajwatiya Mapakgsina litaxtu chu namasiya xlitliwakga kkilhtamaku nema laklhkawilikanit. Xla xMapakgsinakan mapakgsinanin chu xMalanakan malananin,
16 kxlakgstipankan, kajwatiya xla nila niy, xla anta wi niku anan lhuwa kakni chu nipara chatum lataman tlan talakatsuwi, xla nipara chatum chixku akxilhnit chu nila akxilha. Kamaxkika kakni chu putum kilhtamaku kakgalhilh litliwakga. Chuna kalalh.
17 Kakalimapakgsi tiku lhuwa tumin kgalhikgo kʼuma kakilhtamaku* pi ni katlankajwanankgolh, chu ni kalipawankgolh tuku lhuwa xtapalh nema nalakgsputkgo, wata wa Dios kalipawankgolh, tiku lhuwa kinkamaxkiyan putum tuku lipaxuwayaw.
18 Kakawani pi katlawakgolh lhuwa tuku tlan, xatapaxuwan kamastakgolh, kalimakgtayanamputunkgolh tuku kgalhikgo,
19 chuna namaʼakgstokgwilikgo tuku lhuwa xtapalh xla takanajla xlakata kilhtamaku nema aku mima, xlakata tliwakglh nachipakgo xaxlikana latamat.
20 Timoteo, kakuentajtlawa tuku lakgayawakanita, ni kakgaxpatti takgalhchuwin nema nitu litaxtu chu xtalakapastaknikan latamanin tiku lakpuwankgo pi kgalhikgo takatsin, pero xtakatsinkan ni maxki kakni Dios.
21 Makgapitsi makgxtakgkgonit takanajla xlakata kgaxmatkgonit uma takatsin.
Dios kakamaxkin xtalakgalhaman nema ni anan xtachuna.*
Notas
^ Alakatanu wankan «xpuchinakan».
^ O: «tamasiy nema makgtayanan».
^ Alakatanu wankan «makgachakgxi».
^ Alakatanu wankan «tamakgachakgxi».
^ Xagriego: «akchani».
^ Xagriego: «tuku litamakgtlapakan».
^ Kaʼakxilhti glosario.
^ O: «talakgalhaman nema ni kinkalakgchanan». Kaʼakxilhti glosario.
