2 Corintios 2:1-17
-
Pablo kamakgapaxuwaputun corintios (1-4)
-
Natapatikan chu namakgamakglhtinamparakan tiku lakgalhinalh (5-11)
-
Pablo wi kTroas chu kMacedonia (12, 13)
-
Lichuwinankan Dios xtachuna akxni soldados taspitkgo niku tlajanankgolh kʼguerra (14-17)
-
Ni litaxtuyaw tiku lapulakgo xlakata nalitlajakgo xtachuwin Dios (17)
-
2 Xlakata klakkaxwilinit pi akxni amakgtum nakkalakgapaxialhnanan ni nakkamakgalipuwanan.
2 Xlakata komo nakkamakgalipuwanan, ¿tiku natawila xlakata nakimakgapaxuwa? Kajwatiya tiku kkamakgalipuwa.
3 Wa xlakata kkatsokgnanin, xlakata akxni nakanacha, ni nakimakgalipuwankgo ama tiku xkimakgapaxuwakgolh, xlakata liwana kkatsi pi tuku kimakgapaxuwa akit, na kamakgapaxuwayan mimputumkan.
4 Xlakata akxni kkatsokgnanin xaktitaxtuma lhuwa tapatin chu lu xaklipuwama kkinaku, asta xaktasa. Chu ni kkatsokgnanin xlakata nakkamakgalipuwanan, chuna ktlawalh xlakata nakkamakatsiniyan pi lu kkapaxkiyan.
5 Nachuna, komo wi tiku wilinit talipuwan, ni akit kimakgalipuwanit, wata putum wixin kamakgalipuwanitan (pero ni tlakg klichuwinamputun xlakata uma).
6 Tlantiya chuna la mimputumkan palha stakyawanitantit ama chixku;
7 pero uku xliputum minakujkan katapatitit chu tlan kamamakgkatsinitit, xlakata ni lu nalipuwan asta nialhla natayani.
8 Wa xlakata, akit kkastakyawayan pi kalimasiyanitit pi paxkiyatit.
9 Nachuna, kkatsokgnanin xpalakata uma: xlakata nakkatsi komo nakgalhakgaxpatatit putum tuku kkawanin.
10 Tiku wixin katapatiyatit, akit na kkatapati. Pero akxni akit ktapatinan tuku nitlan (komo wi tuku ktapatinanit) chuna ktlawanit xlakata nakkamakgtayayan, chu Cristo katsilh pi chuna.
11 Chuna ni nakinkamakgatlajayan Satanás, xlakata liwana katsiyawa tuku kinkaliʼakgskgawiputunan.*
12 Nachuna, akxni kchalh kTroas xlakata naklichuwinan xatlan tamakatsinin xlakata Cristo chu kimalakkinika akgtum malakcha* xlakata naktlawa xtaskujut Malana,*
13 lu klilakgaputsalh xlakata ni ktekgsli kintala Tito. Wa xlakata kkawanilh pi kiliʼanata xwanit chu kalh kMacedonia.
14 Pero paxtikatsiniyaw Dios, tiku kinkapulalinan akinin chu Cristo chuna la soldados tiku taspitmakgo kʼguerra niku tlajanankgolh. Xtakatsin Dios xtachuna tuku stlan takgankgawanan chu xla limaklakaskin taskujut nema tlawayaw xlakata kaniwa nakgankgawanankgo latamanin.
15 Akinin chu tamakatsinin xpalakata Cristo wa tuku stlan kgankgawanan Dios. Chu na kgankgawanankgo ama tiku nakalakgmaxtukan chu tiku nakamalakgsputukan;
16 xpalakata tiku nakamalakgsputukan, kgankgawanankgo* linin xlakata nanikgo, chu xpalakatakan tiku nalakgtaxtukgo limuksunkgo latamat xlakata nalatamakgo. ¿Chu tiku lakgchan natlawa uma taskujut?
17 Akinin, xlakata ni klitaxtuyaw xtachuna lhuwa latamanin tiku lapulakgo xlakata nalitlajakgo* xtachuwin Dios. Akxni klichuwinanaw Dios lu kkinakujkan minacha chuna naktlawayaw, klitaxtuyaw kstalaninanin Cristo tiku Dios kalakgayawalh uma taskujut, chu chuna ktlawamaw kxlakatin Dios.
Notas
^ O: «tuku lakaskin; tuku nitlan lakpuwanit natlawa».
^ Alakatanu wankan «puwilhta».
^ Alakatanu wankan «Puchina».
^ O: «limuksunkgo».
^ O: «ni stayaw».
