2 Juan 1:1-13
1 Akit, kgolotsin,* ktsokgnanima xatalaksakni puskat. Nachuna kkatsokgnanima xkamanan. Xlikana kkapaxki. Chu ni kaj akit, nachuna putum tiku lakgapaskgonit tuku xaxlikana.
2 Xlakata xaxlikana anta wi kkinakujkan chu putum kilhtamaku anta natawila.
3 Dios, wa tiku xaTlat* kʼakgapun, chu xKgawasa Jesucristo, nakinkamaxkikgoyan umakgolh xaxlikana tamasiy chu tapaxkit. Xlakan nakinkamaxkikgoyan talakgalhaman nema ni anan xtachuna,* tlan nakinkalikatsinikgoyan chu nakinkamaxkikgoyan takaksni.
4 Lu lhuwa kimakgapaxuwalh akxni kkatsilh pi makgapitsi minkamanan lilamakgolh xaxlikana, chuna la xaTlat kinkalimapakgsin.
5 Wa xlakata uku ktasaskiniyan, puskat xatalaksakni, pi nalapaxkiyaw chatunu chatunu. (Ni ktsokgnaniman akgtum xasasti limapakgsin, wata wa nema kgalhinitaw lata xapulana).
6 Wa uma kilhchanima tapaxkit: pi chuntiya kakgalhakgaxmatwi xlimapakgsin. Chuna la wixin kgaxpattit lata xapulana, wa uma limapakgsin: chuntiya kalimasiyatit tapaxkit.
7 Xlakata kkakilhtamaku tasiyakgonit lhuwa akgskgawinanin, umakgolh tiku ni makgamakglhtinankgo pi Jesucristo milh chuna la chatum lataman. Tiku chuna tlawakgo, wa tiku akgskgawinan chu anticristo.*
8 Kuentajkatlawatit tuku tlawayatit, xlakata ni namakgatsankgayatit tuku lhuwa kliskujnitaw kmilakgstipankan. Xlakata uma, namakglhtinanatit tasikulunalin nema Dios kalakkaxwilininitan.
9 Tiku ni stalani xtamasiy Cristo chu atanu tuku masiya, Dios ni makgamakglhtinan. Pero tiku chuntiya stalani xtamasiy Cristo, xaTlat chu xaKgawasa makgamakglhtinankgo.
10 Komo wi tiku nakalakgminan chu ni masiya xtamasiy Cristo, ni kamakgamakglhtinantit kminchikkan chu ni kawanitit «Tlen».
11 Xlakata tiku tachuwinan, tatayama tuku nitlan tlawama.
12 Maski anan lhuwa tuku xakkalitachuwinamputun, ni kkatsokgnaniputunan, wata kkalakgamputunan chu kkalakaʼakxilhputunan akxni nakkatachuwinanan, xlakata lu napaxuwayatit.
13 Malakgachanikgoyan tamakgachipat xkamanan xatalaksakni mintala puskat.
Notas
^ O: «tiku lina kata».
^ Alakatanu wankan «xaTata o xaTiku».
^ O: «talakgalhaman nema ni kinkalakgchanan». Kaʼakxilhti glosario.
^ Anticristo wa xtalamakgasitsin o tiku talalakatawaka Cristo.
