2 Pedro 1:1-21
1 Akit Simón Pedro. Akit chatum xlakskujni chu xʼapóstol Jesucristo. Kkatsokgnaniman wixin tiku makglhtinanitantit xaxlikana tamasiy nema ni anan xtachuna nema na watiya kmakglhtinanitaw.* Kimputumkan makglhtinanitaw uma xlakata wa kinkamaxkikgonitan Dios chu kiLakgmaxtunakan Jesucristo, xlakan akgstitum likatsikgo.
2 Tlakg kamakglhtinantit talakgalhaman nema ni anan xtachuna* chu takaksni xpalakata liwana lakgapasatit Dios chu Jesús kiMalanakan,*
3 xlakata lanka xlitliwakga Dios, makglhtinanitaw* putum tuku maklakaskinaw xlakata nalatamayaw chu naskujnaniyaw Dios. Makglhtinanitaw uma xlakata liwana lakgapasaw Dios. Wa tiku kinkalaksakni xlakata xla chatum lanka Dios chu tlan likatsi.
4 Xlakata xlilanka chu tlan likatsi Dios kinkamaxkinitan* umakgolh tamalaknun nema ni anan xtachuna, xlakata uma tlan nakgalhiyatit xtayat Dios, xlakata lakgtaxtuninitantit taxkajwan nema wi kkakilhtamaku kaj xlakata tuku lu nitlan tlawaputunkan.*
5 Xlakata uma, lu kaliskujtit xlakata nakgalhiyatit mintakanajlakan, chu tlan nalikatsiyatit. Lu kaliskujtit xlakata nakgalhiyatit takatsin,
6 xlakata kgalhiyatita takatsin, kaliskujtit xlakata namachokgoyatit tuku tlawaputunatit, xlakata machokgoyatita tuku tlawaputunatit, kaliskujtit xlakata natayaniyatit, xlakata tayaninitantita, kaliskujtit xlakata naskujnaniyatit Dios,
7 xlakata skujnaniyatita Dios, kaliskujtit xlakata nakgalhiyatit tapaxkit xtachuna nema lakgalhinikan kfamilia, xlakata lakgalhiniyatita tapaxkit xtachuna nema lakgalhinikan kfamilia, tlakg kapaxkinantit.
8 Komo wixin lhuwa kgalhiyatit tayat chuna la umakgolh, ni xalhkitit nawanatit chu ni nalitaxtuyatit xtachuna la kiwi nema ni masta xtawakat, chu namakgantaxtiyatit tuku liwana katsininitantit xlakata kiMalanakan Jesucristo.
9 Xlakata komo wi tiku ni kgalhi umakgolh tayat xtachuna la tiku ni lakawanan, xlakata kajwatiya akxilha tuku lakatsu wi chu nachuna nialh lakapastaka pi maskulunkikanita xlakata xtalakgalhin nema tlawalh makgasa.
10 Wa xlakata, natalan,* lu kaliskujtit xlakata ni namakgxtakgatit Dios chu chuntiya nakatatapakgsiyatit tiku katasanikanit chu kalaksakkanit, komo chuntiya natlawayatit putum uma, nikxni katimakgxtakgtit takanajla.
11 Chu lu nakasikulunatlawakanatit chu natanuyatit kxTamapakgsin nema putum kilhtamaku natawila xla kiMalanakan chu kiLakgmaxtunakan Jesucristo.
12 Wa xlakata, putum kilhtamaku kkamalakapastakniputunan umakgolh, xlakata wixin katsiyatita chu liwana lakgapasnitantita xaxlikana tamasiy.
13 Pero kakxilha pi xlilat nakkamalakapastakniyan xlakata kkgalhijku uma makni, nema xtachuna la akgtum tabernáculo,*
14 xlakata kkatsi pi uma makni ni makgas kilhtamaku nakkgalhi, chuna la kimakatsinilh kiMalanakan Jesucristo.
15 Lu nakliskuja xlakata akxni nialh kkatawilan nawan, miʼakstukan tlan nalakapastakatit* putum uma.
16 Akinin kkamalakgapasnin xlitliwakga kiMalanakan Jesucristo chu kilhtamaku akxni kinkatawilan nawan, pero kintachuwinkan ni kkilhtiyaw kcuentos* nema liwana kalakkaxwilikanit, akinin kilakgastapukan kliʼakxilhwi xlilanka.
17 Xlakata xla makglhtinalh kakni chu xlilanka Dios xaTlat.* Akxni xmalakatsukina lilanka wanilh: «Wa uma kinKgawasa, tiku lu kpaxki, chu lu tlan kimamakgkatsini».*
18 Chuna, akinin kkgaxmatwi uma tachuwin nema xminacha kʼakgapun akxni akxtum xaktawilaw anta ksipi nema Dios xlaksaknit.
19 Wa xlakata, liwana kanajlayaw pi putum tuku wa Dios nakgantaxtu. Putum umakgolh kuenta katlawatit. Anta kminakujkan, umakgolh kalitaxtukgolh xtachuna la lampara nema pasa niku kapukswa. Chuntiya katlawatit asta akxni naxkgakga chu staku xala tsisa natatalhmani.
20 Xlakata wixin katsiyatit uma tuku lu xlakaskinka: tuku wankanit pi aku nala nema wi kTatsokgni ni mincha kxtalakapastaknikan lakchixkuwin.
21 Xlakata tuku wankanit pi aku nala ni malakatsukikgolh lakchixkuwin, wata lakchixkuwin palakachuwinankgolh Dios akxni kapulalilh* xʼespíritu santo.
Notas
^ O: «akgtum takanajla nema akgtum talakgalhaman kakxilhaw».
^ O: «talakgalhaman nema ni kinkalakgchanan». Kaʼakxilhti glosario.
^ Alakatanu wankan «kimPuchinakan».
^ O: «kaj xachunata kinkamaxkikanitan».
^ O: «kaj xachunata kinkamaxkikanitan».
^ O: «lu tlawaputunkan talakgxtumit».
^ Alakatanu wankan «natakamanan».
^ Kaʼakxilhti glosario.
^ O: «nalichuwinanatit».
^ O: «tuku ni xaxlikana».
^ Alakatanu wankan «xaTata o xaTiku».
^ O: «kimakgapaxuwa».
^ Xagriego: «kaxwatalilh; kalilh».
