2 Pedro 2:1-22
2 Pero chuna la analh ni xaxlikana palakachuwinanin kxkachikin Dios, na naʼanan ni xaxlikana makgalhtawakgenanin kmilakgstipankan. Xlakan tsekg namasiyakgo tuku ni xaxlikana nema namalakgsputu mintakanajlakan, chu asta nalakgmakgankgo malana tiku katamawalh, chu uma natlawa pi lakapala nakamalakgsputukan.
2 Nachuna, lhuwa tiku nastalanikgo xliʼakxilhtitkan, natlawakgo tuku ni xlilat chu ni nalilakamaxanankgo,* chu kaj xkuentajkan lu nitlan nalichuwinankan xaxlikana tiji.
3 Chu nakaliʼakgskgawiputunkgoyan ni xaxlikana tachuwin. Pero makgasata lakkaxwilikanit pi nakamalakgaxokgekan, ni katimakgapalalh chu xlikana nakamalakgsputukan.
4 Chuna, Dios ni katapatilh ángeles tiku lakgalhinankgolh, wata kamakalh kTártaro* chu kachiwililh anta niku lu kapukswa, anta kawililh asta akxni nachan kilhtamaku xlakata nakalakputsananikan.
5 Na ni tapatilh kakilhtamaku xalamakgasa, pero lakgmaxtulh Noé, tiku xlichuwinan tuku xaʼakgstitum, chu nachuna kgalhtujun latamanin akxni limilh munkaklat* kkakilhtamaku nema xlitsama tiku lixkajni xlikatsikgo.
6 Na kamalakgaxokgelh kachikinin Sodoma chu Gomorra; akxni kamalakgsputulh kawilinilh akgtum liʼakxilhtit xlakata tuku aku nala, latamanin tiku lixkajni likatsikgo.
7 Na lakgmaxtulh Lot, tiku akgstitum xlikatsi, xla lu xlilakgaputsa xlakata tiku lixkajni xlikatsikgo xtlawakgo tuku ni xlilat chu ni xlilakamaxanankgo,*
8 chuna, uma chixku tiku akgstitum xlikatsi, akxni xlama kxlakgstipankan umakgolh latamanin tiku lu lixkajni xlikatsikgo, xʼakxilha chuna la xlamakgo chu xkgaxmata tuku xwankgo, chu xlakata uma lu nitlan xlimakgkatsi chali chali.
9 Chuna, Jehová katsini kalakgmaxtu latamanin tiku ni makgxtakgkgo akxni titaxtumakgo tuku tuwa chu lakatum kawili latamanin tiku ni akgstitum likatsikgo xlakata nakamalakgsputukan kkilhtamaku akxni nalakputsanankan,
10 liwaka tiku maxkajwaniputunkgo xmaknikan amakgapitsin chu tiku lakgmakgankgo tiku kgalhikgo limapakgsin.
Xlakata ni lakapuwankgo chu lanka kamakgkatsikan, ni kilhpekuankgo akxni lixkajni kalichuwinankgo tiku kgalhikgo kakni.*
11 Pero xlakata maxkikgo kakni Jehová, ángeles tiku tlakg lhuwa tuku tlan tlawakgo chu tlakg kgalhikgo litliwakga, ni limaklakaskinkgo laklixkajni tachuwin xlakata nakalimawakakgo tuku nitlan umakgolh ni xaxlikana makgalhtawakgenanin.
12 Pero umakgolh lakchixkuwin, chuna la animales nema ni lakapastaknankgo chu lakachinkgonit* xlakata nakachipakan chu nakamalakgsputukan, lu nitlan lichuwinankgo tuku ni lakgapaskgo. Xlakata tuku lu nitlan tlawakgo, nakamalakgsputukan,
13 nakalimalakgaxokgekan xlakata tuku lu nitlan tlawakgonit.
Lu lipaxuwakgo akxni malakatsalikgo tuku tlawakgo kxlatamatkan, maski kakuwani. Xlakan litaxtukgo tuku nitlan nema maxkajwani congregación xlakata xatapaxuwan* masiyakgo tuku ni xaxlikana akxni akxtum katatlawakgoyan paskua.
14 Xlakan lu akgskgawiputunkgo tiku tamakgaxtokgkgo chu nila makgxtakgkgo talakgalhin, chu kaʼakgskgawilinkgo tiku xaxlajwananin. Anta kxnakujkan lu kgalhiputunkgo tuku kgalhi achatum. Wa Dios nakamalakgaxokge.
15 Akxni makgxtakgkgolh xatlan tiji, kamaʼakgtsankgayawakgoka. Stalanikgonit xtiji Balaam xkgawasa Beor, tiku tlawalh tuku nitlan xlakata lu xmakglhtinamputun xtaskgaw,
16 pero palha stakyawaka xlakata lakatsalalh tuku tlan. Tantum burro nema nila chuwinan, chuwinalh chuna la chatum lataman chu machokgolh tuku nitlan xtlawaputun uma palakachuwina.
17 Xlakan litaxtukgo taxtunu* nema ni kgalhikgo chuchut chu puklhni* nema kasnokglin palha un, chu nakawilikan anta niku lu katsitsakga chu lu kapukswa.
18 Xtachuwinkan lu tlanka kalimakgkatsikan chu nitu litaxtu. Tlawakgo pi latamanin natlawaputunkgo tuku lakaskin makni chu katlawakgolh tuku ni xlilat chu ni kalilakamaxanankgolh,* wa xlakata, kaʼakgskgawilinkgo latamanin tiku aku tamakgatlinikgonit tiku tlawakgo tuku nitlan.
19 Umakgolh ni xaxlikana makgalhtawakgenanin kamalaknunikgo lakgtaxtut, pero xlakan na skujnin kalitaxtunikgo tuku nitlan. Xlakata, komo wi tiku* makgatlaja achatum lataman, uma kskujni litaxtuni.
20 Chuna, komo akxni lakgtaxtunikgonita putum tuku lixkajni tlawakan kʼuma kakilhtamaku, xlakata liwana lakgapaskgonit Malana* chu Lakgmaxtuna Jesucristo, amakgtum makgtanuparakgo chu mastakgo talakaskin pi nakamakgatlajakan, tlakg nitlan tawilakgo alistalh nixawa xapulana.
21 Tlakg tlan xtiwa ni liwana xtilakgapaskgolh xaʼakgstitum tiji chu ni xtimakgamakglhtinankgolh xasanto limapakgsin, nixawa uku, liwana lakgapaskgonit tiji chu tamakgatlinikgonit.
22 Xlakan limasiyakgonit pi uma proverbio xlikana tuku wan: «Chichi nema patlanalh, taspitparanit chu wanit xpatlanat, chu paxni nema xpaxikanit, lipaxparanit putlun».
Notas
^ Griego, asélgueia. Kaʼakxilhti glosario.
^ Kaʼakxilhti glosario.
^ Alakatanu wankan «tastapnalh».
^ Griego, asélgueia. Kaʼakxilhti glosario.
^ Uma kilhchanima, tiku lhuwa tuku lakgayakgo kcongregación.
^ O: «lu chuna lakachinkgonit».
^ O: «malakatsalikgo chuna la xatapaxuwan».
^ Alakatanu wankan «musni».
^ Alakatanu wankan «jintalh».
^ Griego, asélgueia. Kaʼakxilhti glosario.
^ O: «tuku».
^ Alakatanu wankan «Puchina».
