2 Tesalonicenses 2:1-17
2 Pero, natalan, xpalakata akxni kiMalanakan* Jesucristo akxtum kinkatawilan nawan, chu xpalakata makxtum nakinkatlawakanan xlakata natatawilayaw, kkaskiniyan
2 pi niti kamaxkitit talakaskin nalakgpali mintalakapastaknikan, nipara kaks kakamalakawanin xpalakata akgtum tamakatsin nema tasiya pi Dios mastanit* o xpalakata tuku kawanikanitantit chu xpalakata maktum tatsokgni nema mat akinin kkamalakgachaninitan, nema lichuwinan pi xkilhtamaku Jehová unu wija.
3 Niti kakaʼakgskgawin, xlakata akxni nina min ama kilhtamaku, pulana naminkgo tiku nalakatakikgo Dios chu natasiya chixku tiku lixkajni likatsi, wa uma tiku namalakgsputukan.
4 Xla nalakataki chu tlakg lanka namakgkatsikan nixawa tiku mat dioses chu tuku kakakninanikan,* wa xlakata natawila kxtemplo Dios chu nalimasiya kxlakatin putum latamanin pi chatum dios litaxtu.
5 ¿Ni lakapastakatit pi akxni akxtum xakkatawilanku, xakkalitachuwinanan uma?
6 Chu uku wixin katsiyatit tiku malakgachokgoma chixku tiku lixkajni likatsi xlakata ni natasiya akxni nina xkilhtamaku.
7 Xlikana, lixkajni xtayat uma chixku, nema tsekg wi, tlawamaja xtaskujut, pero uma lixkajni tayat chuntiya tsekg natawila asta akxni nialh natawila tiku malakgachokgoma.
8 Xlikana, alistalh natasiya chixku tiku lixkajni likatsi, ama tiku Malana Jesús nalilaktlawa lakgtliwakga tachuwin nema nataxtu kxkilhni chu namalakgsputu akxni nalimasiya pi akxtum kinkatawilan nawan.
9 Pero wa Satanás tiku tlawa pi namin chixku tiku lixkajni likatsi. Satanás maxki litliwakga xlakata natlawa lhuwa milagros, limasiy nema liʼakgskgawinan chu tuku kaks malakawaninan,
10 chu putum taʼakgskgawin nema ni xaʼakgstitum. Satanás maxki uma litliwakga xlakata nakaʼakgskgawi latamanin tiku amakgo lakgsputkgo, xlakata ni makgamakglhtinankgolh chu ni paxkikgolh xaxlikana nema tlan xkalakgmaxtulh.
11 Wa xlakata, Dios masta talakaskin pi kakaliʼakgskgawika akgtum ni xaxlikana tamasiy, xlakata nakanajlakgo tachuwin nema akgskgawinankgo,
12 xlakata xputumkan nakalakputsananikan, xlakata ni kanajlakgolh xaxlikana, wata lipaxuwakgolh tuku ni xaʼakgstitum.
13 Pero, xlilat pi putum kilhtamaku nakpaxtikatsiniyaw Dios mimpalakatakan, natalan tiku Jehová kapaxki, xlakata Dios kalaksakni lata xapulana xlakata nalakgtaxtuyatit. Uma chuna tlawalh xlakata kalimasantujlin xʼespíritu chu xlakata kanajlanitit xaxlikana.
14 Xla katasanin xlakata nalakgtaxtuyatit xpalakata xatlan tamakatsinin nema akinin klichuwinanaw, xlakata nakamalankikanatit chuna la kiMalanakan Jesucristo.
15 Wa xlakata, natalan, tliwakglh katawilatit chu ni kamakgxtakgtit talismanin nema kamasiyanikantit, xpalakata tuku kawanikanitantit o xpalakata maktum tatsokgni nema akinin kkamalakgachaninitan.
16 Nachuna, kiMalanakan Jesucristo chu Dios kinTlatkan, tiku kinkapaxkin chu putum kilhtamaku tlan kinkamamakgkatsiniyan chu kinkamaxkiyan xatlan takgalhkgalhin xpalakata talakgalhaman nema ni anan xtachuna,*
17 tlan kamamakgkatsinikgolh minakujkan chu tliwakga kakatlawan xlakata putum kilhtamaku natlawayatit chu nawanatit tuku xatlan.
Notas
^ Alakatanu wankan «kimPuchinakan».
^ O: «xpalakata akgtum espíritu». Kaʼakxilhti glosario, espíritu.
^ O: «tuku katakilhputanikan».
^ O: «talakgalhaman nema ni kinkalakgchanan». Kaʼakxilhti glosario.
