3 Juan 1:1-14
1 Akit, kgolotsin,* ktsokgnaniman Gayo, kintala tiku lu kpaxki; xliputum kinaku kpaxkiyan.
2 Tala tiku kpaxkiyan, kskin kkiʼoración xlakata chuntiya tlan nakitaxtuniyan putum tuku tlawaya, chu tlan natawilaya, chuna la tlan kitaxtuniman uku.
3 Xlakata lu kpaxuwalh akxni kichinkgolh makgapitsi natalan chu lichuwinankgolh pi nikxni makgxtakga xaxlikana chu lilapat tuku xaxlikana.
4 Akxni kkgaxmata pi kinkamanan lilamakgolh tuku xaxlikana, uma lu kimakgapaxuwa.*
5 Tala tiku kpaxkiyan, limasiyapat pi ni makgxtakga Dios kxliputum tuku tlawaya xpalakata natalan, maski ni kalakgapasa.
6 Xlakan lichuwinankgonit mintapaxkit kxlakatin congregación. Katlawa litlan kakalimakgtaya tuku namaklakaskinkgo kxtijikan chu katlawa chuna la lakgati Dios.
7 Taxtukgolh xlakata nalichuwinankgo xtukuwani Dios, chu nitu makglhtinankgolh tuku katapakgsini latamanin xalak atanu kachikinin.
8 Wa xlakata, akinin kinkalakgchanan tlan nakamakgamakglhtinanaw natalan tiku chuna la xlakan, chuna akxtum naskujaw xlakata natatayayaw xaxlikana.
9 Ktsokgnanilh congregación, pero Diótrefes, tiku lakgati xapulana nalitaxtu, ni kinkamaxkiyan kakni chu ni makgamakglhtinan tuku kwanaw.
10 Wa xlakata, komo akit nakkalakganachan, naktlawa pi amakgapitsin kakatsikgolh tuku tlawa akxni lixkajni kinkalichuwinanan. Chu ni kajwatiya uma, nachuna ni kamaxki kakni chu ni kamakgamakglhtinan natalan. Chu tiku kamakgamakglhtinamputun xla kamalakgachokgoputun chu katamakxtuputun kcongregación.
11 Tala tiku kpaxkiyan, ni kastalani xliʼakxilhtitkan tiku tlawakgo tuku nitlan, wata kastalani xliʼakxilhtitkan tiku tlawakgo tuku xatlan. Tiku tlawa tuku xatlan tapakgsini Dios. Pero tiku tlawa tuku nitlan ni lakgapasa Dios.
12 Putum natalan, chu tuku xaxlikana, tlan lichuwinankgonit xalaktlan xtayat Demetrio. Nachuna, akinin klakpuwanaw pi tlan likatsi, chu wix katsiya pi tuku kwanaw xaxlikana.
13 Lhuwa tuku xaklitachuwinamputunan, pero ni kaj ktsokgnaniputunan.
14 Xlakata kkgalhkgalhi pi nialh lhuwa kilhtamaku tsankga nakakxilhan chu klakaʼakxilhputunan akxni naktachuwinanan.
Kakgalhi takaksni.
Natalan malakgachanikgoyan tamakgachipat. Kakimakgachipanikgo chatunu chatunu natalan.
