Filemón 1:1-25
1 Akit, Pablo, tiku tamaknukanit kpulachin xpalakata Cristo Jesús, chu kintalakan Timoteo, wix kkatsokgnaniman Filemón kintaskujnikan tiku lu kkapaxkiyan,
2 chu Apfia tala puskat, chu Arquipo tala tiku na ksoldado Cristo chuna la akinin, chu congregación nema wi kminchik:
3 Kakamaxkin talakgalhaman nema ni anan xtachuna* chu takaksni kinTlatkan* Dios chu Malana* Jesucristo.
4 Putum kilhtamaku kpaxtikatsini kiDios akxni kskin mimpalakata kkioraciones,
5 xlakata chuntiya kkgaxmatma xpalakata mintakanajla chu tapaxkit nema kgalhiniya Malana Jesús chu putum xasantos natalan.
6 Kskin kkiʼoración pi takanajla nema watiya kgalhiyaw, natlawa pi naʼakxilha putum tuku tlan kgalhiyaw xpalakata Cristo.
7 Kmakglhtinalh lhuwa tapaxuwan chu tlan kimamakgkatsinilh akxni kkgaxmatli xpalakata mintapaxkit, tala, xlakata tlan kamamakgkatsini xnakujkan xasantos natalan.
8 Wa xlakata, maski kkgalhi limapakgsin nakwaniyan pi natlawaya tuku xlilat xlakata akit xʼapóstol Cristo,
9 ktasaskiniyan pi chuna katlawa xlakata kkatsi pi paxkinana, xlakata akit Pablo, chatum chixku tiku lina kata, chu nachuna uku chatum tachin klitaxtu xpalakata Cristo Jesús.
10 Kskiniman akgtum litlan xpalakata kinkgawasa Onésimo, xlakata chuna la xtlat klitaxtunilh unu kpulachin.
11 Xapulana ni makgantaxtilh taskujut nema xlitlawat xwanit chuna la skujni, pero uku tlan kinchatiykan nakinkaskujnaniyan.
12 Kmalakgachanimaparan Onésimo tiku lu kpaxki.
13 Xaklakaskilh pi unu xkintatamakgxtakgli, chu xkimakgtayalh chuna la wix xtlawa, xlakata ktanumajku kpulachin xpalakata xatlan tamakatsinin.
14 Pero ni ktlawaputun tuku ni lakaskina, xlakata ni kaj xafuerza natlawaya tuku kskiniman, wata xatapaxuwan natlawaya.
15 Max wa xlakata tsalalh ni makgas kilhtamaku,* xlakata nalakgtaspitparayan chu nialh namakgxtakgan,
16 nialh chuna la chatum skujni, chuna la xwanit xapulana, wata xtachuna tiku tlakg xlakaskinka, chuna la chatum tala tiku lu paxkikan, akit lu kpaxki pero wix tlakg milipaxkit xlakata akxtum natatawilaparayan chuna la miskujni chu chuna la tala tiku na kstalanina Cristo.
17 Wa xlakata, komo kiliʼakxilha chuna la miʼamigo, xatapaxuwan kamakgamakglhtinanti chuna la akit xkimakgamakglhtinanti.
18 Nachuna, komo wi tuku nitlan tlawanin o wi tuku lakliniyan, akit nakxokgoniyan.
19 Akit Pablo, ktsokgnaniman uma carta chu klitaya pi nakxokgoniyan. Pero wix katsiya pi asta milatamat kilaklipiniya.
20 Chuna tala, kakilimakgtaya uma xlakata akxtum kanajlaniyaw Malana, tlan kamamakgkatsini kinaku xpalakata Cristo.
21 Klipawan pi namakgantaxtiya tuku kskininitan, wa xlakata ktsokgnaniman, xlakata liwana kkatsi pi tlakg natlawaya, ni kajwatiya tuku kwaniman.
22 Pero na kskiniyan pi kalakkaxwili niku naktamakgxtakga, xpalakata miʼoracioneskan, akit max naktaxtu kpulachin chu tlan nakkalakgapaxialhnanan.
23 Malakgachaniyan tamakgachipat Epafras, tiku na tanuma kpulachin xpalakata Cristo Jesús chuna la akit.
24 Na malakgachakgo xtamakgachipatkan Marcos, Aristarco, Demas chu Lucas, tiku akxtum kintaskujmakgolh.
25 Kakgalhitit xtalakgalhaman Malana Jesucristo nema ni anan xtachuna* xlakata kgalhiyatit xatlan talakapastakni.
Notas
^ O: «talakgalhaman nema ni kinkalakgchanan». Kaʼakxilhti glosario.
^ Alakatanu wankan «kinTatakan o kinTikukan».
^ Alakatanu wankan «Puchina».
^ Xagriego: «akgtum hora».
^ O: «talakgalhaman nema ni kinkalakgchanan». Kaʼakxilhti glosario.
