Gálatas 2:1-21
2 Alistalh, titaxtulh akgkutati kata, kampa kJerusalén chu ktaʼalh Bernabé chu Tito.
2 Kalh xlakata Malana* kimakatsinilh pi kiliʼanat xwanit chu kkamakatsinilh natalan tlan tamakatsinin nema xakkalitachuwinama tiku xalak atanu kachikinin. Pero kajwatiya kkatatamakxtumilh lakchixkuwin tiku tlakg xlakaskinka xlitaxtukgo kcongregación, xlakata xakkatsiputun komo tlan o nitlan tuku ktlawalh xpalakata Dios, komo nitlan, tuku ktlawalh kaj nitu litaxtulh.
3 Maski chuna, Tito tiku xkintaʼanit, ni xafuerza wanika pi naʼakstilichukunikan kxuwa xlichixku* maski griego xwanit.
4 Uma taʼakglhuwit malakatsukikgocha ni xaxlikana natalan* tiku minkgolh kinkaskgalakgoyan kcongregación, xlakan xlaktlawaputunkgo lakgtaxtut nema kgalhiyaw xpalakata akinin kstalaninanin Cristo, xlakata xlakskujnin nakalitaxtuniyaw;
5 ni kkakgaxmatniw, ni, nipara puntsu,* xlakata wixin ni xmakgatsankgatit xaxlikana nema kgalhiyatit xpalakata xatlan tamakatsinin.
6 Pero amakgolh lakchixkuwin tiku xtasiyakgo pi xlakaskinka xlitaxtukgo, ni kimasiyanikgolh tuku xasasti. Akit ni kinkuenta tuku xlitaxtukgo kilhtamaku nema mincha, xlakata Dios ni kaj akxilha chuna la tasiya chatum lataman.
7 Pero xlakan akxilhkgolh pi akit xkilakgayawakanit nakkalitachuwinan xatlan tamakatsinin tiku ni kaʼakstilichukunikanit kxuwa xlichixkukan* chuna la Pedro xlakgayawakanit nakalitachuwinan tiku kaʼakstilichukunikanit kxuwa xlichixkukan.
8 Dios maxkilh litliwakga Pedro xlakata apóstol nakalitaxtuni tiku kaʼakstilichukunikanit kxuwa xlichixkukan.* Chu Dios na kimaxkilh litliwakga xlakata naktlawa ama taskujut kxlakgstipan kachikinin.
9 Akxni xlakan akxilhkgolh pi Dios xkimaxkinit lhuwa talakgalhaman nema ni anan xtachuna,* Santiago* chu Cefas* chu Juan tiku la xanapuxkun* xlitaxtukgo kcongregación, kinkalimakgachipakgon xpakgastakatkan* akit chu Bernabé xlakata xlimasiyakgolh pi tlan xʼakxilhkgo pi akinin xakkalitachuwinaw xatlan tamakatsinin tiku xalak atanu kachikinin, chu xlakan tiku xkaʼakstilichukunikanit kxuwa xlichixkukan.*
10 Xlakan kajwatiya kinkaskinikgon pi putum kilhtamaku xakkalakapastakwi tiku limaxkgenin* chu lu kliskujnit xlakata chuna naktlawa.
11 Pero akxni Cefas* milh kʼAntioquía, kxlakatin kwanilh pi ni xlilat tuku xtlawanit.
12 Xlakata, akxni nina xminkgo lakchixkuwin tiku xkamalakgachanit Santiago,* xlismani xkatawayan latamanin xalak atanu kachikinin; pero akxni chinkgolh, nialh chuna tlawalh chu katamakgatlinilh xlakata kapekuanilh tiku xkaʼakstilichukunikanit kxuwa xlichixkukan.*
13 Nachuna amakgapitsin judíos tsukukgolh lakgaputiyunankgo chu asta Bernabé nachuna tsukulh lakgaputiyunan.
14 Akxni kakxilhli pi ni xlilamakgolh xatlan tamakatsinin, nema xaxlikana, kwanilh Cefas* kxlakatin xputumkan: «Komo wix, maski judío, lapat chuna la latamanin xalak atanu kachikinin chu nichuna la judíos, ¿tuku xlakata kamafuerzajniya latamanin nalilatamakgo xtalismaninkan judíos?».
15 Akinin tiku judíos lakachinitaw, chu ni lakgalhinanin xalak atanu kachikinin,
16 katsiyaw pi chatum lataman ni xaʼakgstitum litaxtu kxlakatin Dios kaj xlakata makgantaxtima tuku skin limapakgsin, wata komo kanajlani Jesucristo. Wa xlakata kanajlaninitaw Cristo Jesús, xlakata xaʼakgstitum nakinkaʼakxilhkanan xlakata kanajlaniyaw Cristo chu ni kaj xlakata makgantaxtimaw tuku skin limapakgsin, xlakata nila tiku* xaʼakgstitum naʼakxilhkan kaj xlakata makgantaxti limapakgsin.
17 Komo lakgalhinanin kinkalimaxtukanitan xlakata putsamaw xaʼakgstitum nalitaxtuyaw xpalakata Cristo, ¿wa Cristo tiku tlawa pi nalakgalhinanaw? ¡Nichuna!
18 Komo ama tuku klaktlawalh kʼatanu kilhtamaku kkaxtlawapara amakgtum, klimasiya pi akit ni kkgalhakgaxmata limapakgsin.
19 Akit kninit xlakata tuku wan limapakgsin, pero xlakata uma, klama xpalakata Dios.
20 Na kixtokgowakakanit kkiwi chuna la Cristo. Nialh akit tiku klama; wata wa Cristo tiku akxtum kintalama. Xlikana, klin kilatamat chuna la wi takanajla nema kkgalhini xKgawasa Dios, tiku kimpaxkilh chu tamakamastalh kimpalakata.
21 Ni klakgmakgan xtalakgalhaman Dios nema ni anan xtachuna,* xlakata komo chatum lataman tlan xaʼakgstitum litaxtu xpalakata limapakgsin, uma wamputun pi kaj nitu litaxtulh chuna la nilh Cristo.
Notas
^ Alakatanu wankan «Puchina».
^ Kaʼakxilhti glosario.
^ Alakatanu wankan «natakamanan».
^ Xagriego: «akgtum hora».
^ Kaʼakxilhti glosario.
^ Kaʼakxilhti glosario.
^ O: «tiku la talayaw xlitaxtukgo».
^ Kaʼakxilhti glosario.
^ Alakatanu wankan «xpakgkanajkan».
^ Na limapakuwikan Pedro.
^ O: «Jacobo».
^ O: «talakgalhaman nema ni kinkalakgchanan». Kaʼakxilhti glosario.
^ O: «tiku nitu kgalhikgo».
^ Na limapakuwikan Pedro.
^ O: «Jacobo».
^ Kaʼakxilhti glosario.
^ Na limapakuwikan Pedro.
^ Xagriego: «liwa».
^ O: «talakgalhaman nema ni kinkalakgchanan». Kaʼakxilhti glosario.
