Apocalipsis 1:1-20
1 Umakgolh tachuwin wa tuku Jesucristo makatsininanit* uku. Dios maxkilh Jesucristo putum uma xlakata nakamasiyani xlakskujnin Dios tuku ama la nialh makgas kilhtamaku. Jesús malakgachanilh Juan, tiku kskujni Dios,* chatum ángel xlakata nawani tuku kilhchanima putum tuku ama la.
2 Juan makatsininalh putum tuku akxilhli, uma wamputun, xtachuwin Dios chu tuku makatsininalh Jesucristo.
3 Paxuwa tiku pixlanka* likgalhtawakga tuku talichuwinanit pi nala chu paxuwakgo tiku nakgaxmatkgo chu namakgantaxtikgo tuku anta tatsokgnit, xlakata kilhtamaku nema lakkaxwilikanit talakatsuwinita.
4 Akit, Juan, kkatsokgnani uma carta akgtujun congregaciones nema wilakgolh kxtiyat Asia:
Ktlawa oración xlakata Dios tiku lama uku chu xlamaja xapulana chu tiku mima, chu nachuna kgalhtujun espíritus tiku wilakgolh kxlakatin xpumapakgsin, kakamaxkikgon talakgalhaman nema ni anan xtachuna* chu takaksni.
5 Chu na kakamaxkin talakgalhaman nema ni anan xtachuna,* Jesucristo, Tatayana tiku ni makgxtakgnan, tiku pulana malakastakwanika kkalinin chu tiku kamapakgsi mapakgsinanin xalak katiyatni.
Jesús, tiku kinkapaxkiyan chu xpalakata xkgalhni kinkalilakgmaxtun ktalakgalhin,
6 tlawalh pi mapakgsinanin chu sacerdotes xlitaxtuw xlakata naskujnaniyaw xDios chu xTlat,* wa kamaxkika kakni chu litliwakga putum kilhtamaku. Chuna kalalh.
7 ¡Kaʼakxilhtit! Akxtum nakatamin puklhni chu putum naʼakxilhkgo, asta tiku lilhtukukgolh lanza; chu putum laklanka familia xalak katiyatni xʼakstukan nakakuxmukgaxikan xlakata lu nalipuwankgo kaj xpalakata. Chuna, uma xlikana nakgantaxtu. Chuna kalalh.
8 Jehová Dios wan: «Akit Kilhtsukut chu Lisputni.* Klama la uku, xaklamaja xapulana chu tiku mima. Akit Dios Tiku kgalhi putum litliwakga».
9 Akit, Juan, mintalakan chu tiku na ktayanima, tiku na putsastalanimaka chu akxtum nakkatamapakgsinanan xlakata na kstalanina Jesús klitaxtu, anta xakwi kʼisla nema wanikan Patmos kaj xlakata xaklichuwinan Dios chu xakmakatsininan xlakata Jesús.
10 Espíritu santo kimaʼakxilhnilh tuku aku ama la kxkilhtamaku Malana.* Chu kkgaxmatli pi kkinchakgen wi tiku pixlanka chuwinalh chuna la makasanan akgtum trompeta,
11 chu xwan: «Kpakgtum rollo katsokgwili tuku akxilha chu kakamalakgachani akgtujun congregaciones: Éfeso, Esmirna, Pérgamo, Tiatira, Sardis, Filadelfia chu Laodicea».
12 Akxni ktalakgaspitli xlakata nakakxilha tiku xkintachuwinama kakxilhli akgtujun limakgskgon* xla oro.
13 Kxlakgstipankan limakgskgon kakxilhli tiku xtasiya xtachuna la xkgawasa chixku pi xlilhakgananit xalhman lhakgat nema xchan asta kxtupixni chu xlitakuxmuchinit pakglanka lhakgat xla oro.
14 Nachuna, xʼakchixit lu snapapa xwanit xtachuna la miki chu xlakgastapu xpasama xtachuna la lhkuyat.
15 Xtantunin xwanit xtachuna xaskulunku cobre nema lakgskgo akxni tanuma kʼhorno,* chu xtachuwin xmakasanan xtachuna la lhuwa chuchut.
16 Kxpakgastakat* xkgalhi akgtujun staku; kxkilhni xtaxtu kgantum espada nema lakgaputiy xlistakaka,* lhman chu stakaka, chu xlakan xwanit xtachuna la chichini akxni maxkgakgenan xliputum xlitliwakga.
17 Akxni kakxilhli, chuna la xanin ktamacha kxlakatin.
Xla wililh xpakgastakat kkiʼakgspun* chu kiwanilh: «Ni kapekuanti. Akit tiku wanikan xaPulana chu xaʼAwatiya,
18 chu tiku lama. Xakninit, pero uku putum kilhtamaku klama, chu kkgalhi llave xlakata naklimalakki xmalakcha* linin chu Putaknun.*
19 Wa xlakata, katsokgwili putum tuku akxilhti, putum tuku kgantaxtuma uku chu tuku alistalh nakgantaxtu.
20 Wa uma tuku tsekg wi xla Dios xlakata akgtujun staku nema akxilhti kkimpakgastakat chu xlakata akgtujun limakgskgon* xla oro: akgtujun staku kilhchanima xʼángeles akgtujun congregaciones, chu akgtujun limakgskgon kilhchanima akgtujun congregaciones.
Notas
^ Griego, apokálypsis. Minacha kʼakgtum tachuwin nema kilhchanima «mapanukan tuku likgalhtalanankan» o «mapanukan tuku likgalhtlapanankan».
^ O: «kskujni Jesús».
^ Alakatanu wankan «akglhman».
^ O: «talakgalhaman nema ni kinkalakgchanan». Kaʼakxilhti glosario.
^ O: «talakgalhaman nema ni kinkalakgchanan». Kaʼakxilhti glosario.
^ Alakatanu wankan «xTata o xTiku».
^ Xagriego: «Alfa chu Omega». Uma akgtiy tachuwin, «Alfa» chu «Omega», wa xapulana chu xaʼawatiya letra xla alfabeto griego.
^ Alakatanu wankan «Puchina».
^ Uma limakgskgon xkaxtlawakanit xlakata xkgalhilh pulaktujun niku xpasa.
^ Alakatanu wankan «kpulhkgoyun».
^ Alakatanu wankan «Kxpakgkana».
^ Alakatanu wankan «xlistayanka».
^ Alakatanu wankan «kkiʼakpun».
^ Alakatanu wankan «xpuwilhta».
^ O: «Hades». Uma kaj kilhchamima anta niku jaxmakgolh tiku nikgonita. Kaʼakxilhti glosario.
^ Uma limakgskgon xkaxtlawakanit xlakata xkgalhilh pulaktujun niku xpasa.
