Apocalipsis 10:1-11
10 Kakxilhli achatum tliwakga ángel tiku xtaktama kʼakgapun chu xlilhakgananit* puklhni, chu kxʼakgxakga xkgalhi akgtum chamakxkulit.* Xlakan xtasiya chuna la chichini, chu xchaxpanin* chuna la talayaw xla lhkuyat.
2 Kxmakan xkgalhi pakgtum aktsu rollo nema nitu xtalakchuwanit. Xtantustakat litatutalh kpupunu chu xtantuxwiki litatutalh kkatiyatni.
3 Chu pixlanka* katasalh chuna la pixlanka tasa* tantum león. Chu akxni pixlanka katasalh, kkgaxmatli xtachuwinkan akgtujun jili.
4 Akxni chuwinankgolh akgtujun jili, akit xakama tsokgwili tuku xwankgonit, pero kkgaxmatli tuku wa akgtum tachuwin nema takgaxmatcha kʼakgapun: «Tsekg kalikatsi tuku wankgolh akgtujun jili chu ni katsokgwili».
5 Chu ángel nema kakxilhli pi xtatutanit kpupunu chu kkatiyatni litapakgayawalh xpakgastakat* kʼakgapun,
6 chu likilhalh Dios, tiku lama putum kilhtamaku, tiku malakatsukilh akgapun, katiyatni, pupunu chu putum tuku anankgo anta. Chu wa: «Dios nialh katimakgapalalh.
7 Pero akxni atsinu tsankga nawan xlakata xlikgalhtujun ángel namatasi xtrompeta, nakgantaxtu tuku tsekg wi xla Dios. Uma tuku tsekg wi, wa xatlan tamakatsinin nema xla kalitachuwinalh xpalakachuwinanin tiku skujnikgo».
8 Chu kkgaxmatpa tachuwin nema xminacha kʼakgapun. Kiwanilh: «Kapit chu katiya rollo nema ni talakchuwanit nema chipanit ángel tiku tatutanit kpupunu chu kkatiyatni».
9 Klakgalh ángel chu kskinilh pi xkimaxkilh aktsu rollo. Chu xla kinkgalhtilh: «Katiya rollo chu kawat. Nalipakatsana,* pero sakgsi nakgalhwanana chuna la ksakgsi cera».
10 Wa xlakata ktiyalh aktsu rollo nema xchipanit ángel chu kwalh. Kkinkilhni sakgsi kkgalhwanalh chuna la ksakgsi cera, pero akxni kwalh klipakatsalh.*
11 Chu kiwanikgolh: «Nalichuwinamparaya tuku nakaʼakgspula kachikinin chu laklanka kachikinin nema chuwinankgo tipalhuwa tachuwin chu lhuwa mapakgsinanin».
Notas
^ O: «xlitamakgswitnit».
^ Alakatanu wankan «makxkulinkat».
^ Xagriego: «xtantunin».
^ Alakatanu wankan «akglhman».
^ Alakatanu wankan «chuwan».
^ Alakatanu wankan «xpakgkana».
^ Xagriego: «Xun nawan kmimpokgo».
^ Xagriego: «xun wa kkimpokgo».