Apocalipsis 11:1-19
11 Chu kimaxkika kgantum kgatit xtachuna la lhman kiwi nema lilhkanankan akxni xla xkiwanima: «Katakaxti chu kalhkat xtemplo Dios, pumakamastan chu kaputlekge niku kgalhlit tiku mastakgo kakni anta.
2 Pero ni nalhkaya xkilhtin templo xlakata kamakamaxkikanit tiku xalak atanu kachikinin, xlakata tipuxamatiy papaʼ nalaktayamikgo xasanto kachikin.
3 Nakkamalakgacha chatiy kintatayananin xlakata nalichuwinankgo tuku aku nala akgtum mil akgtiy ciento tutupuxam kilhtamaku chu nalilhakganankgo lhakgat xla talipuwan».
4 Kgantiy olivos chu akgtiy limakgskgon,* kilhchanimakgolh umakgolh tatayananin chu yakgolh kxlakatin xMalana* katiyatni.
5 Komo wi tiku katlawaniputun tuku nitlan, kxkilhnikan taxtu lhkuyat xlakata nakamalakgsputu xtalatlawananin. Chuna nanikgo putum tiku nakatlawaniputun tuku nitlan.
6 Xlakan kgalhikgo litliwakga xlakata namalakchuwakgo akgapun chu natlawakgo pi ni namin sen kkilhtamaku akxni palakachuwinamakgolh Dios. Nachuna, kgalhikgo litliwakga xlakata natlawakgo pi chuchut kgalhni nalitaxtu chu tanu tanu tuku nitlan nala kkatiyatni chuna la xlimakglhuwa nalakaskinkgo.
7 Akxni palakachuwinankgonita nawan Dios, xaluku lapanit nema taxtulh niku xakapulhman nakatatlawa guerra chu nakamakgatlaja chu nakamakgni.
8 Chu xanin makgo nawan kxatilanka xtiji lanka kachikin niku latamanin makgnikgolh xMalanakan kkiwi, chu Sodoma chu Egipto kilhchanima uma kachikin.
9 Latamanin xalak tipalhuwa kachikinin, laklanka familias, tiku chuwinankgo tipalhuwa tachuwin chu laklanka kachikinin naʼakxilhkgo xanin xmaknikan akgtutu kilhtamaku aitat, chu ni katimastakgolh talakaskin nakamaknukan.*
10 Chu tiku lamakgolh kkatiyatni nalipaxuwakgo xlakata nikgolh chu nalamalakgachanikgo tamaskiwin* chatunu chatunu, xlakata umakgolh chatiy palakachuwinanin xkalimakgapatinamakgolh tuku xkamakatsinimakgolh tiku lamakgolh kkatiyatni.
11 Akxni xtitaxtunita akgtutu kilhtamaku aitat, kalakgtanupa latamat nema Dios masta, chu xlakan latamaparakgolh. Chu tiku kaʼakxilhkgolh lu pekuankgolh.
12 Alistalh kgaxmatkgolh pixlanka* tachuwin nema xminacha kʼakgapun chu xkawani: «Katantit* unu». Chu ankgolh kʼakgapun kʼakgtum puklhni, chu tiku xkatalatlawakgo kaʼakxilhkgolh.
13 Chu ama hora tachikilh tiyat. Kaj ni lhuwa* kachikin lakgsputli chu akgtujun mil latamanin nikgolh xlakata tachikilh tiyat. Tiku lakgtaxtukgolh lu pekuankgolh chu maxkikgolh kakni Dios xalak akgapun.
14 Xliʼakgtiy lanka taʼakglhuwit titaxtulha. ¡Kaʼakxilhti! Xliʼakgtutu lakapala mima.
15 Chu xlikgalhtujun ángel matasilh xtrompeta. Alistalh takgaxmatli kʼakgapun pixlanka tachuwin nema xwankgo: «Xtamapakgsin kiDioskan chu xtamapakgsin xCristo kamapakgsimaja latamanin, chu Dios putum kilhtamaku namapakgsinan».
16 Chu puxamatati lakgkgolotsin tiku xwilakgolh kxpumapakgsinkan tatsokgostakgolh kxlakatin xpumapakgsin Dios chu kakninanikgolh.
17 Wankgolh: «Kkapaxtikatsiniyan Jehová Dios, Tiku kgalhi putum litliwakga, tiku lama chu tiku xlama, xlakata kmimakan wi lanka militliwakga chu tsukunitata mapakgsinana.
18 Pero laklanka kachikinin lu sitsikgolh chu alistalh kalakgmilh mintasitsi chu chilh kilhtamaku akxni talakkaxwilinit xlakata tiku nikgonita nakalakputsananikan chu xlakata nakamaxkikan xtaskgawkan mimpalakachuwinanin tiku skujnikgoyan, nachuna tiku xasantos chu tiku pekuanikgo mintukuwani, nachuna tiku xlakaskinka litaxtukgo chu tiku ni xlakaskinka litaxtukgo, chu xlakata nakamalakgsputuya tiku malakgsputumakgolh katiyatni».
19 Alistalh, talakkilh xtemplo Dios kʼakgapun chu kakxilhli arca xla talakkaxlan xalak templo. Chu alistalh jilinalh chu makglipnalh kʼakgapun chu tachikilh tiyat. Na kkgaxmatli lhuwa tachuwin chu taktalh lhuwa chijit.
Notas
^ Uma limakgskgon xkaxtlawakanit xlakata xkgalhilh pulaktujun niku xpasa.
^ Alakatanu wankan «xPuchina».
^ Alakatanu wankan «nakamujukan».
^ Alakatanu wankan «tatain o talakgalhaman».
^ Alakatanu wankan «akglhman».
^ Alakatanu wankan «Katatit».
^ Xagriego: «1/10 (pulaktum lata xliʼakgkaw)».
