Apocalipsis 13:1-18
13 Xla* anta tayalh kxkilhtun pupunu.
Chu kakxilhli tantum xaluku lapanit nema xtakutmachi kpupunu. Xkgalhi akgkaw akgalokgot chu akgtujun akgxakga. Xkgalhi akgkaw corona, xkgalhi akgtum corona kʼakgatunu xʼakgalokgot chu kxʼakgxakga xkgalhikgo tukuwani nema laklixkajni tachuwin xwanima Dios.
2 Xaluku lapanit nema kakxilhli xtasiya xtachuna la maklhpilili leopardo, pero xtantun chuna la xtantun oso chu xkilhni chuna la xkilhni león. Chu lanka luwa nema makgapekuanan maxkilh litliwakga chu pumapakgsin chu lhuwa limapakgsin.
3 Kakxilhli pi akgtum xʼakgxakga xtasiya pi lu xmasipanikanit, pero anta niku lu xmasipanikanit xmapaksakanita. Chu putum latamanin xalak katiyatni stalanikgolh xaluku lapanit chu kaks xlilakawankgo.
4 Chu tatsokgostakgolh kxlakatin lanka luwa nema makgapekuanan xlakata xla xmaxkinit limapakgsin xaluku lapanit, chu tatsokgostakgolh kxlakatin xaluku lapanit chu xwankgo: «¿Tiku ama litaxtu chuna la xaluku lapanit? ¿Tiku tlan natalatlawa?».
5 Chu xaluku lapanit maxkika akgtum kilhni nema xlichuwinan tuku lanka xlimakgkatsikan chu lixkajni xlichuwinan tuku xla Dios, chu maxkika limapakgsin xlakata xtlawalh tuku xlakaskilh tipuxamatiy papaʼ.
6 Chu tsukulh chuwinan xlakata nawani laklixkajni tachuwin Dios, xtukuwani, anta niku wi chu asta tiku wilakgolh kʼakgapun.
7 Maxkika talakaskin nakatatlawa guerra tiku xasantos chu nakamakgatlaja, chu maxkika talakaskin nakamapakgsi putum laklanka familias, kachikinin, tiku chuwinankgo tipalhuwa tachuwin chu laklanka kachikinin.
8 Chu putum tiku lamakgolh kkatiyatni namaxkikgo kakni. Lata kxkilhtsukut kakilhtamaku, nipara chatum xlakan tsokgwilikanit xtukuwanikan kxlibro Borrego nema makgnika. Uma libro limin xtukuwanikan tiku nakgalhikgo latamat.
9 Putum tiku tlan kgaxmata, kakgaxmatli.
10 Komo wi tiku xlilat natamaknukan kpulachin, natamaknukan kpulachin. Chu komo wi tiku limakgninan espada, xlilat nalimakgnikan espada. Wa xlakata talakaskin pi tiku xasantos natayanikgo chu nakgalhikgo takanajla.
11 Chu kakxilhli atanu xaluku lapanit nema xtaxtumacha kkatiyatni. Xkgalhi akgtiy xʼakgalokgot xtachuna la tantum borrego, pero tsukulh chuwinan chuna la tantum lanka luwa nema makgapekuanan.
12 Chu kxlakatin xapulana xaluku lapanit limasiya pi kgalhi watiya limapakgsin. Tlawa pi katiyatni chu tiku anta lamakgolh namaxkikgo kakni xapulana xaluku lapanit nema lu xmasipanikanit kxʼakgxakga pero pakspa.
13 Chu tlawa laklanka milagros; asta tlawa pi kʼakgapun nataktayachi lhkuyat xlakata latamanin naʼakxilhkgo.
14 Tiku lamakgolh kkatiyatni kaliʼakgskgawi milagros nema maxkikan talakaskin natlawa kxlakatin xaluku lapanit, chu kawani tiku lamakgolh kkatiyatni pi katlawakgolh akgtum tatlawamakgxtu nema xtasiyalh chuna la xapulana xaluku lapanit, nema lu xlimasipanikanit espada pero lakastakwanampa.
15 Chu xlitantiy xaluku lapanit maxkika talakaskin namaxki latamat* tatlawamakgxtu nema tasiya chuna la xapulana xaluku lapanit. Wa xlakata, tatlawamakgxtu nema tasiya chuna la xapulana xaluku lapanit tlan xchuwinan chu tlan xlimapakgsinan pi xkamakgnika putum tiku ni maxkikgo kakni.
16 Kamafuerzajni putum latamanin xalak kakilhtamaku, tiku xlakaskinka litaxtukgo chu tiku ni xlakaskinka litaxtukgo, tiku kgalhikgo lhuwa tumin chu tiku nitu kgalhikgo, tiku skujnin litaxtukgo chu putum tiku ni skujnin litaxtukgo, pi nakawilinikan akgtum lilhka* kxpakgastakatkan* o kxmunkan,
17 xlakata nila tiku natamawanan o nastanan, kajwatiya tiku kgalhi lilhka, xtukuwani xaluku lapanit o número nema kilhchanima xtukuwani.
18 Tiku kgalhi taʼakgatekgsni kalakpulhkawililh xnúmero xaluku lapanit, xlakata akgtum número xla latamanin, chu xnúmero wa 666. Kajwatiya tiku kgalhi liskgalala naʼakgatekgsa uma.
Notas
^ Uma kilhchanima, lanka luwa nema makgapekuanan.
^ Xagriego: «tajaxanat».
^ O: «marca».
^ Alakatanu wankan «kxpakgkanajkan».
