Apocalipsis 14:1-20
14 Chu kakxilhli pi Borrego xya anta ksipi Sion, chu xtawilakgolh akgtum ciento tipuxamatati mil tiku kxmunkan xtatsokgtawilanit xtukuwani chu xtukuwani xTlat.*
2 Kkgaxmatli pi wi tuku xmakasanan anta kʼakgapun; xmakasanan xtachuna la lhuwa chuchut chu xmakasanan xtachuna la akxni tliwakga jili. Na xmakasanan xtachuna la akxni tiku kilhtlikgo tlakgkgo xʼarpaskan akxni kilhtlikgo.
3 Xlakan xkilhtlimakgolh kxlakatin pumapakgsin chu kxlakatinkan kgalhtati querubines* chu kxlakatinkan lakgkgolotsin, tuku takgaxmata xtachuna la akgtum xasasti takilhtlin. Nila tiku liwana xkatsini uma takilhtlin kajwatiya akgtum ciento tipuxamatati mil tiku Dios katamawaxtulh kkatiyatni.
4 Wa uma tiku ni litaxkajwanikgolh lakpuskatin; xlikana, nitiku tatalakgxtumikgolh. Xlakan wa stalanikgo Borrego anta niku xla an. Xlakan katamawaxtuka kxlakgstipankan latamanin, chu wa pulana tamakgalan xpalakata Dios chu xpalakata Borrego,
5 ni liʼakgskgawinankgolh xtachuwinkan, ni kgalhikgo tuku nitlan.
6 Chu kakxilhli achatum ángel tiku xkgosma kʼakgapun.* Xkgalhi xatlan tamakatsinin nema putum kilhtamaku namakgapala, uma tamakatsinin nakalitachuwinan tiku lamakgolh kkatiyatni: xliputum laklanka kachikinin, laklanka familias, tiku chuwinankgo tipalhuwa tachuwin chu kachikinin.
7 Pixlanka* xwan: «Kapekuanitit Dios chu kamaxkitit kakni xlakata chanita hora akxni nalakputsanan. Wa xlakata kakakninanitit tiku tlawalh akgapun, katiyatni, pupunu chu taxtunu».*
8 Alistalh milh achatum ángel, tiku xwan: «¡Makgatlajakanita! ¡XaLanka Babilonia makgatlajakanita! Ama tiku tlawalh pi putum laklanka kachikinin xwakgolh* xvino nema xtlawa pi lu xtlawaputulh talakgxtumit nema ni xlitatlawat».*
9 Atanu ángel, xlikgalhtutu, nachuna pixlanka wa: «Komo wi tiku kakninani xaluku lapanit chu xtatlawamakgxtu* chu makglhtinan lilhka* kxmun o kxmakan,
10 nachuna nawa xvino Dios, nema litaxtu lhuwa xtasitsi. Uma vino nitu talakgtlawakanit, wa tuku Dios namuju kxcopa niku muju lhuwa xtasitsi, chu nalimakgapatinankan lhkuyat chu azufre kxlakatinkan xasantos ángeles chu kxlakatin Borrego.
11 Xajini lhkuyat nema nakamakgapatinan putum kilhtamaku natatalhmani. Chu tiku kakninanikgo xaluku lapanit chu xtatlawamakgxtu, chu putum tiku makglhtinankgo lilhka xla xtukuwani tantaku chu tantaskaka nakamakgapatinankan.
12 Wa xlakata, xasantos tiku kgalhakgaxmatkgo xlimapakgsin Dios chu lipawankgo Jesús,* talakaskin pi natayanikgo».
13 Chu kkgaxmatli tachuwin nema xminacha kʼakgapun, xwan: «Katsokgti uma: “Lata uku, kstalaninanin Malana* tiku nanikgo napaxuwakgo. Chuna, espíritu santo wan, kajaxkgolh xlakata xatuwa xtaskujutkan, xlakata tuku tlawakgolh ni katipatsankgaka”».*
14 Alistalh, kakxilhli akgtum snapapa puklhni, chu anta xwi chatum tiku xtasiya xtachuna la xkgawasa chixku; xʼakwi corona xla oro chu xchipanit xastakaka* tuku lichukukikan tachanan.
15 Atanu ángel taxtucha ktemplo chu pixlanka wanilh tiku xwi kpuklhni: «¡Kachukukita tachanan kkatiyatni xlakata putum katlata chu akchanita xkilhtamaku namakikan tachanan!».
16 Chu tiku xwi kpuklhni chukukilh tuku xchankanit kkatiyatni.
17 Atanu ángel taxtucha ktemplo nema wi kʼakgapun; xla na xchipanit xastakaka tuku lichukukikan tachanan.
18 Chu kpumakamastan taxtucha atanu ángel, tiku xkgalhi limapakgsin xlakata lhkuyat. Chu pixlanka wanilh tiku xchipanit xastakaka tuku limakikan tachanan: «¡Katsuku limaklakaskina tuku lichukukinana chu kakamaki xamustum uvas xalak katiyatni, xlakata uvas katlata!».
19 Chu ángel lichukuktilh xmakgxpin uvas xalak katiyatni chu lhkgen makalh klanka niku lakgchitkan uvas, nema kilhchanima xtasitsi Dios.
20 Kawayu xlakchitmimakgolh uvas kxkilhtin kachikin chu taxtulh kgalhni, lu talhman xwanit asta xchan kxʼakgxakgakan kawayu chu xlilakgalanka atsinu ni xchan akgtutu ciento kilómetro.*
Notas
^ Alakatanu wankan «xTata o xTiku».
^ Querubines wa ángeles tiku kgalhikgo lhuwa limapakgsin.
^ Tachuwin xagriego kilhchanima akgapun niku kgoskgo tsiktsi.
^ Alakatanu wankan «Akglhman».
^ Alakatanu wankan «musni».
^ Alakatanu wankan «xtakgotli».
^ Griego, pornéia. Kaʼakxilhti glosario.
^ Alakatanu wankan «xtamakanitlaw».
^ O: «marca».
^ O: «na lipawankgo Dios chuna la Jesús lipawa».
^ Alakatanu wankan «Puchina».
^ Alakatanu wankan «ni katiʼakgtsonkgswaka».
^ Alakatanu wankan «xastayanka».
^ Griego, akgtum mil akgchaxan ciento estadios o max 296 kilómetros. Estadio wa tuku xlilhkanankan kxamakgan Grecia. Akgtum estadio 185 metros xlilanka.
