Apocalipsis 15:1-8
15 Kakxilhli kʼakgapun atanu limasiy nema wi tuku kilhchanima, lanka chu kaks malakawaninan: kgalhtujun ángeles tiku xliminkgo akgtujun tuku nitlan. Umakgolh xaʼawatiya tuku nitlan, xlakata akxni nasputkgo, na nasputa xtasitsi Dios.
2 Chu kakxilhli tuku xtasiya chuna la pupunu xla vidrio nema xtalakgwilhakanit lhkuyat, chu tiku xmakgatlajakgonit xaluku lapanit, xtatlawamakgxtu* chu número nema kilhchanima xtukuwani. Anta xyakgolh kxkilhtun pupunu xla vidrio; xchipakgonit xʼarpas Dios.
3 Xkilhtlimakgo xtakilhtlin Moisés, kskujni Dios, chu xtakilhtlin Borrego, chu xwankgo:
«Laklanka chu kaks malakawaninan mintatlaw, Jehová Dios, Tiku kgalhi putum litliwakga. Putum mintiji xaʼakgstitum chu tlan lipawankan, wix Mapakgsina putum kilhtamaku.
4 Jehová, ¿tiku ni napekuaniyan? ¿Tiku ni namalanki mintukuwani xlakata kajwatiya wix Dios tiku ni makgxtakgnan? Putum laklanka kachikinin nalakgminkgoyan chu namaxkikgoyan kakni xlakata akxilhkgonit pi xaʼakgstitum lakputsanana».
5 Alistalh, kakxilhli pi anta kʼakgapun talakkicha tabernáculo,*
6 chu anta taxtukgolh kgalhtujun ángeles tiku xlinkgo akgtujun tuku nitlan. Xlilhakganankgonit xaskulunku chu xaslipwa lino, chu xlitakuxmuchikgonit lhakgat xla oro.
7 Chatum xlikgalhtati querubines* kamaxkilh kgalhtujun ángeles akgtujun pulatu xla oro nema xlitsamakgo xtasitsi Dios, tiku putum kilhtamaku lama.
8 Chu tabernáculo litatsamalh jini xlakata xlilanka Dios chu xlakata xlitliwakga. Nila tiku xtanu ktabernáculo asta akxni kgalhtujun ángeles puxtakgamakgankgonita xwa pulaktujun tuku nitlan.
Notas
^ Alakatanu wankan «xtamakanitlaw».
^ Kaʼakxilhti glosario.
^ Querubines wa ángeles tiku kgalhikgo lhuwa limapakgsin.
