Apocalipsis 16:1-21
16 Alistalh kkgaxmatli pixlanka* tachuwin nema xminacha ktemplo chu xkawanima kgalhtujun ángeles: «Kapitit chu kkatiyatni kapuxtakgamakgantit akgtujun pulatu niku tajuma xtasitsi Dios».
2 Xapulana ángel alh chu puxtakgamakgalh kkatiyatni tuku xtajuma kxpulatu. Chu akgtum xalixkajni tsitsi nema ni paksa kamakgapatinalh latamanin tiku xkgalhikgo xlilhka* xaluku lapanit chu xkakninanikgo tatlawamakgxtu* nema xtasiya chuna la xla.
3 Xlichatiy ángel puxtakgamakgalh kpupunu tuku xtajuma kxpulatu. Chu pupunu kgalhni litaxtulh xtachuna la xkgalhni tiku makgnikanit, chu putum tuku staknankgo kpupunu nikgolh.
4 Xlikgalhtutu ángel puxtakgamakgalh tuku xtajuma kxpulatu kkgalhtuchokgo chu ktaxtunu.* Chu chuchut kgalhni litaxtulh.
5 Chu kkgaxmatli chatum ángel tiku kamapakgsi chuchut chu wa: «Wix Dios tiku nikxni makgxtakgnan, tiku lama uku chu tiku xlamaja xapulana. Wix xaʼakgstitum xlakata chuna lakkaxwilinita uma talakputsan.
6 Xlakan stajmakgankgolh xkgalhnikan tiku xasantos chu palakachuwinanin, wa xlakata tlawapat pi nalikgotnankgo kgalhni. Chuna kalakgchan».
7 Chu kkgaxmatli akgtum tachuwin nema xminacha kpumakamastan chu xwan: «Chuna, Jehová Dios, Tiku kgalhi putum litliwakga, tlan lipawankan chu xaʼakgstitum mintalakputsan».
8 Xlikgalhtati ángel puxtakgamakgalh kchichini tuku xtajuma kxpulatu. Chu chichini maxkika talakaskin nakaxkgoyo latamanin.
9 Chu lu palha lhkakna kaxkgoyolh latamanin. Pero ni makgxtakgkgolh tuku nitlan xtlawamakgolh chu lixkajni lichuwinankgolh xtukuwani Dios; ni maxkikgolh kakni Dios, tiku kgalhi litliwakga xlakata natlawa pi kaʼanalh umakgolh tuku nitlan.
10 Xlikgalhkitsis ángel puxtakgamakgalh tuku xtajuma kxpulatu anta kxpumapakgsin xaluku lapanit. Putum anta niku mapakgsinan kapukswa tawi, chu latamanin lakxkakgolh ksimakgatkan xlakata xkatsanajwamakgolh,
11 pero ni makgxtakgkgolh tuku nitlan xtlawamakgolh, wata lixkajni lichuwinankgolh xtukuwani Dios xalak akgapun kaj xlakata xkatsanajwamakgolh chu xlakata xtsitsikan.
12 Xlikgalhchaxan ángel puxtakgamakgalh tuku xtajuma kxpulatu anta klanka kgalhtuchokgo Éufrates. Chu xunkli xchuchut xlakata xlakkaxwilika xtijikan mapakgsinanin tiku xmimakgolh anta niku taxtu chichini.
13 Chu kakxilhli akgtutu tuku makatsininan espíritu nema xataxkajwani, xtasiyakgo xtachuna la chichekg chu xtaxtumakgolh kxkilhni lanka luwa nema makgapekuanan, kxkilhni xaluku lapanit chu kxkilhni ni xaxlikana palakachuwina.
14 Umakgolh tamakatsinin wa demonios mastakgo, chu putum mapakgsinanin kxliputum katiyatni kgaxmatkgo umakgolh tamakatsinin. Umakgolh tamakatsinin tlawakgo milagros xlakata nakamamakxtumikgo putum mapakgsinanin kʼguerra nema natlawakan klanka xkilhtamaku Dios, Tiku kgalhi putum litliwakga.
15 Chu takgaxmatli akgtum tachuwin nema xwan: «¡Kaʼakxilhti!, kmima xtachuna la chatum kgalhana. Paxuwa tiku skgalalh wi chu lhakgananit, xlakata ni xalhtantala* nalatama chu latamanin ni naʼakxilhkgo chu namaxanan».
16 Chu kamamakxtumika putum mapakgsinanin anta niku kxahebreo wanikan Armagedón.*
17 Chu xlikgalhtujun ángel puxtakgamakgalh tuku xtajuma kxpulatu anta kkaʼunin. Chu takgaxmatli pixlanka tachuwin nema taxtucha ktemplo, anta kpumapakgsin, chu wa: «¡Kgantaxtunita!».
18 Nachuna, kkgaxmatli tachuwin, jilinalh, makglipnalh chu tachikilh tiyat chuna la nikxni xtachikinit lata makilhtsukikanit lataman. Chuna xlitliwakga chu chuna xlilanka tachikilh tiyat.
19 Chu lanka kachikin pulaktutu tapapitsilh chu laklanka kachikinin kamalakgsputuka; chu Dios lakapastakli xaLanka Babilonia xlakata nalimakgotni vino xla lhuwa xtasitsi.
20 Nachuna, putum islas lakgtsankgakgolh chu laklanka sipi lakgsputkgolh.
21 Alistalh kʼakgapun taktakgocha laklanka chijit chu kaʼaktawilakgolh latamanin, akgatunu chijit max xtsinkan akgpuxam kilo chu latamanin lixkajni tachuwin wanikgolh Dios xlakata chijit nitlan tuku xkatlawanima chu lu malakgsputunalh.
Notas
^ Alakatanu wankan «akglhman».
^ O: «xmarca».
^ Alakatanu wankan «tamakanitlaw».
^ Alakatanu wankan «kmusni».
^ Alakatanu wankan «makglhtintili».
^ Griego, Har Maguedón. Minacha anta ktachuwin xahebreo nema wamputun «sipi xla Meguidó».
