Apocalipsis 17:1-18
-
Namalakgaxokgekan «xaLanka Babilonia» (1-18)
-
Puskat tiku sta xmakni chu kgalhi lhuwa litliwakga kgewi tantum xaluku lapanit nema lu spinini (1-3)
-
Xaluku lapanit nema «xlama xapulana, alistalh nialh xlama, pero nialh makgas nataxtuyacha kxakapulhman» (8)
-
Akgkaw akgalokgot talatlawakgo Borrego (12-14)
-
Akgkaw akgalokgot nialh naʼakxilhputunkgo puskat tiku sta xmakni (16, 17)
-
17 Milh chatum lata xlikgalhtujunkan ángeles tiku xchipakgonit akgtujun pulatu niku xtajuma vino chu kiwanilh: «Katat, nakmasiyaniyan tuku tamalakgaxokgen namakglhtinan puskat tiku sta xmakni, tiku kgalhi lhuwa litliwakga chu tawila kxkgalhni lhuwa chuchut.
2 Mapakgsinanin xalak katiyatni tatlawakgolh uma puskat talakgxtumit nema ni xlitatlawat,* chu tiku lamakgolh kkatiyatni likgachikgolh xvino nema xtlawa pi lu xtlawaputunkgolh talakgxtumit nema ni xlitatlawat».*
3 Uma ángel limaklakaskilh espíritu santo xlakata nakilin kxakaskakni tiyat. Chu kakxilhli chatum puskat tiku xkgewi tantum xaluku lapanit nema lu spinini chu xlitsama tukuwani nema lixkajni xwanikgo Dios chu xkgalhi akgtujun akgxakga chu akgkaw akgalokgot.
4 Puskat xlilhakgananit xatsutsokgo* chu lu xaspinini lhakgat, chu tuku litakaxtayakan xla oro, xalakglilakgatit chiwix chu perlas. Xchipanit akgtum copa xla oro nema xlitsama tuku lu lixkajni chu tuku xataxkajwani xla xtalakgxtumit nema ni xlitatlawat.*
5 Xtsokgwilikanit kxmun akgtum tukuwani nema ni katsikan tuku kilhchanima: «XaLanka Babilonia, xtsekan* putum lakpuskatin tiku stakgo xmaknikan chu putum tuku xalixkajni xalak katiyatni».
6 Chu kakxilhli pi puskat xlikgachinit xkgalhnikan tiku xasantos chu xkgalhnikan xtatayananin Jesús.
Akxni kakxilhli, lu kaks klilakawa.
7 Wa xlakata ángel kiwanilh: «¿Tuku xlakata kaks lilakawanti? Akit nakwaniyan tuku niti katsi xlakata uma puskat chu xlakata xaluku lapanit nema kgewi, nema kgalhi akgtujun akgxakga chu akgkaw akgalokgot.
8 Xaluku lapanit nema akxilhti, xlama xapulana, alistalh nialh xlama, pero nialh makgas nataxtuyacha kxakapulhman chu namalakgsputukan. Tiku lamakgolh kkatiyatni, tiku lata kxkilhtsukut kakilhtamaku nipara chatum tsokgwilikanit xtukuwanikan klibro xla latamat, kaks nalilakawankgo akxni naʼakxilhkgo xaluku lapanit nema xlama xapulana, alistalh nialh xlama, pero mimpa.
9 »Xpalakata uma talakaskin liskgalala chu taʼakgatekgsni. Akgtujun akgxakga kilhchanimakgolh akgtujun laklanka sipi, chu anta kxkgalhni tawila puskat.
10 Xlakan kilhchanimakgolh kgalhtujun mapakgsinanin: Kgalhkitsis lakgsputkgonita, chatum mapakgsinamaja chu achatum nina mapakgsinama; pero akxni namapakgsinan kaj ni makgas kilhtamaku natawila.
11 Chu xaluku lapanit nema xlama pero alistalh nialh latamalh, xla na litaxtu xlikgalhtsayan mapakgsina; taxtuyacha kxlakgstipankan kgalhtujun mapakgsinanin chu namalakgsputukan.
12 »Akgkaw akgalokgot nema akxilhti kilhchanimakgolh kgalhkaw mapakgsinanin tiku nina mapakgsinamakgo, pero namakglhtinankgo limapakgsin xlakata natamapakgsinankgo xaluku lapanit kaj ni makgas kilhtamaku.*
13 Xlakan na watiya tapuwan kgalhikgo, wa xlakata maxkikgo xaluku lapanit xlitliwakgakan chu xlimapakgsinkan.
14 Xlakan natalatlawakgo Borrego, pero Borrego nakamakgatlaja xlakata xla xMalanakan* malananin chu xMapakgsinakan mapakgsinanin. Na namakgatlajanankgo tiku Dios katasaninit, kalaksaknit chu ni makgxtakgkgo».
15 Xla kiwanilh: «Lhuwa chuchut nema akxilhti, anta niku wi puskat tiku sta xmakni, kilhchanima kachikinin, lhuwa latamanin, laklanka kachikinin chu tiku tipalhuwa tachuwin chuwinankgo.
16 Chu akgkaw akgalokgot nema akxilhti chu xaluku lapanit, xlakan nialh naʼakxilhputunkgo puskat tiku sta xmakni chu namakglhtikgo putum tuku kgalhi chu xalhtantala namakgxtakgkgo, chu nawakgo xliwa chu putuminika nalhkuyukgo.
17 Xlakata Dios wililh anta kxnakujkan namakgantaxtikgo xtapuwan, uma wamputun, namakgantaxtikgo xtapuwankan akxni namaxkikgo xaluku lapanit xaxlikana limapakgsin nema kgalhikgo asta akxni kgantaxtukgonita nawan xtachuwin Dios.
18 Chu puskat tiku akxilhti kilhchanima lanka kachikin nema kamapakgsi mapakgsinanin xalak katiyatni».
Notas
^ Griego, pornéia. Kaʼakxilhti glosario.
^ Kaʼakxilhti glosario.
^ Xagriego: «púrpura».
^ Griego, pornéia. Kaʼakxilhti glosario.
^ Alakatanu wankan «xnanakan».
^ Xagriego: «akgtum hora».
^ Alakatanu wankan «xPuchinakan».
