Apocalipsis 18:1-24
18 Chu alistalh kakxilhli achatum ángel tiku kgalhi lhuwa limapakgsin nema xtaktamachi kʼakgapun chu xlilanka maxkgakgelh katiyatni.
2 Xla pixlanka* wa: «¡Makgatlajakanita! ¡XaLanka Babilonia makgatlajakanita! Litaxtunit anta niku tawilakgo demonios chu anta niku tsekg kgalhkgalhinankgo putum demonios chu nachuna putum tsiktsi* nema xalaklixkajni chu nema ni liʼakxilhputu.
3 Xlakata putum laklanka kachikinin wakgonit xvino nema tlawa pi lu natlawaputunkgo talakgxtumit nema ni xlitatlawat;* mapakgsinanin xalak katiyatni tatlawakgonit talakgxtumit nema ni xlitatlawat, chu stananin* xalak katiyatni litlajakgolh lhuwa tumin xlakata uma puskat lhuwa tuku xtapalh maʼakgstokgwilinit. Chu xla ni lilakamaxanan maʼakgstokgwili uma».
4 Chu kkgaxmatli atanu tachuwin nema xminacha kʼakgapun: «Kinkachikin, komo ni lakgalhinamputunatit chuna la xla chu ni makglhtinamputunatit tuku nitlan nalakgchin, kamakgxtakgtit chu kataxtutit kʼuma kachikin.
5 Uma chuna nala xlakata nila putlekgekan chuna la xlilhuwa xtalakgalhin chu Dios nalakputsanani xpalakata tuku nitlan tlawanit.
6 Nachuna kalikatsinitit chuna la kalikatsinilh amakgapitsin, chuna, makgtiy chuna katlawanitit chuna la xla tlawalh; chu kcopa niku xla kaxtlawalh tuku xlikgotnan, tlakg xatliwakga kakaxtlawanitit tuku nalikgotnan.
7 Xlakata xla lu xlakaskinka makgkatsikan chu kgalhi lhuwa tuku xtapalh nema ni lilakamaxanan namaʼakgstokgwili, xlilat napatinan chu natalipuwani. Xlakata chuntiya wan kxnaku: “Akit kwi chuna la puskat mapakgsina; nitu ninit kinchixku chu nikxni naklipuwan”.
8 Wa xlakata, kaj kʼakgtum kilhtamaku nalakgchin tuku nitlan, linin, talipuwan chu tatsinksni chu nalilhkuyukan lhkuyat. Xlakata Jehová Dios, tiku lakputsananilh, lu tliwakga.
9 »Akxni mapakgsinanin xalak katiyatni tiku tatlawakgolh talakgxtumit nema ni xlitatlawat* chu takgalhikgolh lhuwa tuku xtapalh nema ni lilakamaxanankgolh, naʼakxilhkgo xjini xlakata lhkuyumaka, natasakgo chu xʼakstukan nakakuxmukgaxikan chu nalakglipuwankgo.
10 Lakgamakgat natayakgo xlakata ni makgpatiputunkgo tuku akgspulama uma kachikin chu nawankgo: “¡Kgoxota wix, Babilonia, xalanka chu xatliwakga kachikin, xlakata kaj kʼakgtum hora Dios lakputsananinitan!”.
11 »Nachuna, stananin xalak katiyatni natasakgo chu nalakglipuwankgo xlakata nialh naʼanan tiku natamawa tuku minkgonit stakgo.
12 Listat xla oro, xla plata, xalakglilakgatit chiwix, perlas, xalilakgatit lino, xatsutsokgo* lhakgat, xaseda lhakgat, chu lu xaspinini lhakgat; putum tuku litlawakanit xamuksun kiwi chu putum tuku litlawakanit xlukut elefante chu xalakglilakgatit kiwi, cobre, likan o chiwix nema tanu tanu xcolor;
13 nachuna, nialhti katikamakgtamawalh canela, xalakmuksun tuwan xalak India, limajinin, xamuksun aceite, olíbano,* vino, aceite xla oliva, xatlan harina, trigo, wakax, borregos, kawayu, putlaw,* skujnin chu atanu latamanin.
14 Chuna, xalaktlan tawakat nema lu xlakgatiya nialh mila chu putum xalakgkgama* listat sputli mimpalakata. Nialh makgtum katikgalhipara.
15 »Stananin tiku kstakgo putum umakgolh, tiku lhuwa tumin litlajakgolh xlakata uma kachikin, lakgamakgat natayakgo xlakata ni makgpatiputunkgo tuku akgspulama uma kachikin. Natasakgo chu nalakglipuwankgo
16 nawankgo: “¡Kgoxota, lu nitlan pi chuna akgspulalh xalanka kachikin, nema xlilhakgananit xatlan lino, xatsutsokgo* chu lu xaspinini lhakgat, chu xlitakaxtayanit lhuwa litakaxtay xla oro, xalakglilakgatit chiwix chu perlas!
17 ¡Xlakata kaj xalakapala kamalakgsputuka tuku lhuwa xtapalh!”.
»Chu putum tiku puxkunankgo kbarco, putum tiku tipuntaxtukgo kpupunu chu tiku skujkgo kbarco, chu putum tiku litlajakgo tumin kpupunu lakgamakgat natayakgo.
18 Chu akxni akxilhkgolh xjini chuna la xlakgpasama, pixlanka xwankgo: “¡Ni anan atanu kachikin chuna la uma lanka kachikin!”.
19 Xʼaktawakakgo pokgxni chu xtasakgo chu xlakglipuwankgo, pixlanka xwankgo: “¡Kgoxota, lu nitlan tuku akgspulanit uma xalanka kachikin; xlakata lhuwa tuku xkgalhi, lhuwa tumin litlajakgolh tiku xkgalhikgo barcos kpupunu! ¡Xlakata kaj xalakapala malakgsputuka!”.
20 »Wixin tiku wilatit kʼakgapun chu wixin tiku xasantos, nachuna apóstoles chu palakachuwinanin, ¡kapaxuwatit xlakata Dios lakputsananinit xpalakata tuku katlawanin!».
21 Chu chatum tliwakga ángel chaxli akgtum lanka chiwix xtachuna la xla molino chu lhkgen makalh kpupunu chu wa: «Chuna, Babilonia, xalanka kachikin kaj xalakapala lhkgen namakankan katutsu, chu nialh makgtum katiʼakxilhparaka.
22 Babilonia, kmintiji nialh katitakgaxmatli pi wi tiku nakilhtli chu natlakga arpa o chatum lataman natlakga tatlakgni o flauta o trompeta. Nialhti katiskujnanin nipara katiswakgaka trigo xlakata natlawakan harina.
23 Nikxni katipasapa akgtum makgskgot kmintiji, nikxni katitakgaxmatpa xtachuwin chatum litatawilat kgawasa* o xtachuwin litatawilat tsumat. Xlakata mistananin lu xlakaskinka lakchixkuwin xlitaxtukgo kkatiyatni chu xlakata putum laklanka kachikinin kaliʼakgskgawi mintaskuwan.
24 Chu kʼuma kachikin tekgska xkgalhnikan palakachuwinanin, chu tiku xasantos chu putum tiku kamakgnikanit kkatiyatni».
Notas
^ Alakatanu wankan «akglhman».
^ Alakatanu wankan «spitu».
^ Griego, pornéia. Kaʼakxilhti glosario.
^ O: «stananin tiku anu anu ankgo».
^ Griego, pornéia. Kaʼakxilhti glosario.
^ Xagriego: «púrpura».
^ Kaʼakxilhti glosario.
^ Uma putlaw kgalhi akgtati xallantas chu klhtantikgo kawayu.
^ Alakatanu wankan «xalakkan».
^ Xagriego: «púrpura».
^ Alakatanu wankan «liit».
