Apocalipsis 2:1-29
2 »Kamalakgachani tatsokgni ángel xalak congregación nema wi kʼÉfeso: Wa uma tuku wan tiku kgalhi akgtujun staku kxpakgastakat chu tlawan kxlakgstipankan akgtujun limakgskgon* xla oro:
2 “Kkatsi tuku tlawanita, chuna la lhuwa skujnita chu chuna la tayaninita. Na kkatsi pi nila kamakgamakglhtinana lakchixkuwin tiku nitlan likatsikgo chu kaliʼakxilhti tiku wankgo pi apóstoles pero ni xlikana, chu akxilhti pi akgsaninanin xlitaxtukgo.
3 Nachuna, chuntiya tayanipat, chu tayaninita lhuwa taʼakglhuwit xlakata maxkiya kakni kintukuwani, chu ni tlakgwanita.
4 Pero kakxilha pi kgalhiya uma tuku nitlan: nialh kgalhiya tapaxkit nema xkgalhiya xapulana.
5 »”Wa xlakata, kalakapastakti tuku xkgalhiya pero makgatsankga, kamakgxtakgti tuku nitlan tlawapat chu katlawapara tuku xtlawaya xapulana. Komo ni namakgxtakga tuku nitlan tlawapat, nakmin chu nakmakgenuniyan milimakgskgon anta niku wi.
6 Pero kgalhiya uma tuku tlan: pi ni akxilhputuna tuku tlawakgo tiku stalanikgo xtamasiy Nicolás, uma akit na ni kakxilhputun.
7 Tiku tlan kgaxmata, kakgaxmatli tuku espíritu santo kawani congregaciones: «Tiku natlajanan ktalachipat, akit nakmaxki talakaskin naway xtawakat kiwi xla latamat, nema ya kxparaíso Dios»”.
8 »Kamalakgachani tatsokgni ángel xalak congregación nema wi kʼEsmirna: Wa uma tuku wan tiku wanikan “xaPulana chu xaʼAwatiya”, tiku xninit chu latamapa:
9 “Klakgapasa mintapatin chu mintalimaxkgen,* maski lhuwa tuku kgalhiya. Na kkalakgapasa makgapitsi tiku wankgo pi judíos litaxtukgo, pero ni xlikana chu wanikgoyan lixkajni tachuwin; xlakan ksinagoga Satanás litaxtukgo.
10 Ni kapekuanti xlakata tuku aku pimpat patiya. ¡Kaʼakxilhti! Akgskgawini chuntiya natlawa pi makgapitsi wixin nakamanukanatit kpulachin. Uma chuna nala xlakata xatakgatsin nakaliʼakxilhkanatit, chu xlakata nakaputsastalanikanatit akgkaw kilhtamaku. Chuntiya ni kamakgxtakgnanti maski naniya chu akit nakmaxkiyan tatlaja* xla latamat.
11 Tiku tlan kgaxmata, kakgaxmatli tuku espíritu santo kawani congregaciones: «Tiku natlajanan ktalachipat, ni katitlawanilh tuku nitlan xliʼakgtiy linin»”.
12 »Kamalakgachani tatsokgni ángel xalak congregación nema wi kPérgamo: Wa uma tuku wan tiku kgalhi espada nema lakgaputiy xlistakaka,* lhman chu stakaka:
13 “Kkatsi niku wila: anta niku wi xpumapakgsin Satanás. Maski chuna, chuntiya ni makgxtakga kintukuwani. Nachuna, ni lakgmakganti takanajla nema kinkgalhiniya, nipara kxkilhtamaku Antipas, kintatayana tiku ni kimakgxtakgli, tiku makgnika kminkachikinkan, anta niku wi Satanás.
14 »”Pero kakxilha pi kgalhiya uma tuku nitlan: pi anta kakgalhiya tiku lu stalanikgo xtamasiy Balaam, tiku masiyanilh Balac chuna la nakamatlawiputun tuku nitlan xkamanan Israel, xlakata nawakgo liway nema kamakamaxkikanit tatlawamakgxtu* chu natlawakgo talakgxtumit nema ni xlitatlawat.*
15 Wix na kakgalhiya tiku lu stalanikgo xtamasiy Nicolás.
16 Wa xlakata, kamakgxtakgti tuku nitlan tlawapat. Komo ni chuna natlawaya, nialh makgas nakmin chu naklimaklakaskin xalhman espada nema taxtu kkinkilhni xlakata nakkatatlawa guerra.
17 »”Tiku tlan kgaxmata, kakgaxmatli tuku espíritu santo kawani congregaciones: tiku natlajanan ktalachipat, nakmaxki maná nema tsekg wi chu nakmaxki aktsu xasnapapa chiwix. Anta tatsokgnit akgtum xasasti tukuwani nema niti lakgapasa kajwatiya tiku makgamakglhtinan”.
18 »Kamalakgachani tatsokgni ángel xalak congregación nema wi kTiatira: Wa uma tuku wan xKgawasa Dios, tiku pasama xlakgastapu xtachuna la lhkuyat chu xtantunin xtachuna xaskulunku cobre:
19 “Kkatsi tuku tlawanita, mintapaxkit, mintakanajla, mintaskujut chu chuna la tayaninita. Chu kkatsi pi tuku awatiya tlawanita tlakg lhuwa nixawa xapulana.
20 »”Pero kakxilha pi kgalhiya uma tuku nitlan: pi makgamakglhtinana uma puskat tiku xtachuna Jezabel, tiku xʼakstu palakachuwina limaxtukan chu kaliʼakgskgawi kilakskujnin xtamasiy xlakata natlawakgo talakgxtumit nema ni xlitatlawat* chu nawakgo liway nema makamaxkikanit tatlawamakgxtu.
21 Kmaxkilh kilhtamaku xlakata namakgxtakga tuku nitlan tlawama, pero xla ni makgxtakgputun chuna la tlawama talakgxtumit nema ni xlitatlawat.*
22 ¡Kaʼakxilhti! Kama tlawa pi natatatla asta nialhla katitakilh kxputama chu naktlawa pi tiku tatlawakgonit talakgxtumit nema ni xlitatlawat nakgalhikgo lhuwa tapatin, komo ni namakgxtakgkgo tuku nitlan tlawakgolh xtachuna la tuku xla tlawalh.
23 Chu xkamanan nakkalimakgni akgtum tajatat, xlakata putum congregaciones nakatsikgo pi akit kkalakputsanani talakapastakni nema niti katsi* chu nachuna naku, chu chatunu chatunu wixin nakkaxokgoniyan chuna la mintatlawkan.
24 »”Pero putum wixin tiku na wilatit kTiatira, putum tiku ni stalanikgo xtamasiy Jezabel, tiku ni lakgapasputunkgolh ni xaxlikana xtamasiy Satanás, kkawani: «Ni kkawiliniyan atanu takuka.
25 Kajwatiya tliwakglh kachipatit tuku laktlan nema kgalhiyatit asta akxni nakmin.
26 Tiku natlajanan chu chuntiya natlawan kkintiji asta klisputni, nakmaxki limapakgsin xlakata nakamapakgsi kachikinin,
27 chu xla nalimaklakaskin lixtokgo xla likan xlakata nakamapakgsi latamanin. Nakamalakgsputukan xtachuna la kalakgpakglhmikan vasos xatiyat. Chuna la kinTlat kimaxkinit limapakgsin.
28 Na nakmaxki staku xala tsisa.
29 Tiku tlan kgaxmata, kakgaxmatli tuku espíritu santo kawani congregaciones»”.
Notas
^ Uma limakgskgon xkaxtlawakanit xlakata xkgalhilh pulaktujun niku xpasa.
^ O: «pi nitu kgalhiya».
^ Xagriego: «corona».
^ Alakatanu wankan «xlistayanka».
^ Alakatanu wankan «tamakanitlaw».
^ Kaʼakxilhti glosario.
^ Kaʼakxilhti glosario.
^ Griego, pornéia. Kaʼakxilhti glosario.
^ Xagriego: «pastapu».
