Apocalipsis 20:1-15
20 Chu kakxilhli chatum ángel nema xtaktamacha kʼakgapun chu xkgalhi llave xalak kapulhman chu xchipanit kgantum lanka cadena.
2 Chipalh lanka luwa nema makgapekuanan, xapulana luwa, nema wanikan Akgskgawini chu Satanás, chu chiwililh akgtum mil kata.
3 Chu makalh kxakapulhman chu anta lakgachinulh, chu liwana malakchuwalh niku laktanukan xlakata nialh nakaʼakgskgawi kachikinin asta akxni nasputa akgtum mil kata. Alistalh xlilat kaj ni makgas kilhtamaku namakgxtakgkan.
4 Chu kakxilhli akglhuwa pumapakgsin chu tiku anta tawilakgolh kamaxkika limapakgsin xlakata nalakputsanankgo. Chu kakxilhli xkgalhnikan* tiku xkamakgnikanit* xlakata makatsininankgolh xlakata Jesús chu lichuwinankgolh Dios, xlakan ni maxkikgolh kakni xaluku lapanit nipara xtatlawamakgxtu* chu ni xmakglhtinankgonit lilhka,* nipara kxmunkan chu kxmakankan. Xlakan latamaparakgolh chu tamapakgsinankgolh Cristo akgtum mil kata.
5 Wa uma xapulana talakastakwanat. (Amakgapitsi tiku xnikgonit ni lakastakwanankgolh asta akxni takgatsilh akgtum mil kata).
6 Paxuwakgo chu xasantos litaxtukgo tiku pulana lakastakwanankgo; xliʼakgtiy linin ni kgalhi limapakgsin xlakata nakamakgatlaja, wata nalitaxtukgo ksacerdotes Dios chu Cristo, chu natamapakgsinankgo Cristo akgtum mil kata.
7 Pero akxni takgatsinita nawan akgtum mil kata, ángel naxkuta Satanás anta niku chiwilinit,
8 chu nataxtu xlakata nakaʼakgskgawi kachikinin nema wilakgolh klakatati xchastunin katiyatni, Gog chu Magog, nakamamakxtumi xlakata natlawakgo guerra. Xlilhuwakan chuna la xlilhuwa muntsaya* nema wi kxkilhtun pupunu.
9 Chu naʼankgo lata kxlikalanka katiyatni chu namakgstiliwilikgo niku wilakgolh xasantos chu kachikin nema Dios paxki. Pero natakta lhkuyat kʼakgapun chu nakamalakgsputu.
10 Chu Akgskgawini tiku xkaʼakgskgawima, lhkgen makanka niku lakatum wi lanka lhkuyat chu lilakgpasawi azufre, antiya wilakgolha xaluku lapanit chu ni xaxlikana palakachuwina. Xlakan nakamakgapatikan* putum kilhtamaku, tantaku chu tantaskaka.
11 Chu kakxilhli akgtum lanka pumapakgsin nema snapapa xwanit chu Dios anta xwi. Katiyatni chu akgapun tsalakgolh kxlakatin chu nialh tasiyaparakgolh.
12 Chu kakxilhli tiku nikgonita, tiku xlakaskinka litaxtukgo chu tiku ni xlakaskinka litaxtukgo, anta xyakgolh kxlakatin pumapakgsin, chu kamalakgakgeka rollos. Pero malakgakgeka atanu rollo: rollo xla latamat. Chu tiku xnikgonita kalakputsananika xlakata tuku xtsokgwilikanit krollos chu xlakata tuku xtlawakgonit.
13 Pupunu makamastalh tiku xnikgonit chu xwilakgolh anta, chu linin chu Putaknun* makamastakgolh tiku xnikgonit chu xwilakgolh anta. Chu chatunu chatunu kalakputsananika xlakata tuku xtlawakgonit.
14 Chu linin chu Putaknun* lhkgen kamakanka niku lakatum wi lanka lhkuyat. Niku lakatum wi lanka lhkuyat kilhchanima xliʼakgtiy linin.
15 Nachuna, tiku ni xtsokgwilikanit xtukuwanikan klibro xla latamat lhkgen kamakanka niku lakatum wi lanka lhkuyat.
Notas
^ Kaʼakxilhti xnota Apocalipsis 6:9.
^ Xagriego: «tiku xkalimakgnikanit hacha».
^ Alakatanu wankan «xtamakanitlaw».
^ O: «marca».
^ Alakatanu wankan «kuku».
^ O: «nakatamaknukan kpulachin».
^ O: «Hades». Uma kaj kilhchamima anta niku jaxmakgolh tiku nikgonita. Kaʼakxilhti glosario.
^ O: «Hades». Uma kaj kilhchamima anta niku jaxmakgolh tiku nikgonita. Kaʼakxilhti glosario.
