Apocalipsis 21:1-27
21 Chu kakxilhli akgtum xasasti akgapun chu akgtum xasasti katiyatni; xlakata xapulana akgapun chu xapulana katiyatni xlakgsputkgonit chu na nialh anan pupunu.
2 Nachuna kakxilhli xasanto kachikin, xaSasti Jerusalén. Xtawilacha Dios pero alistalh makgxtakgli akgapun chu taktalh. Xmakaxkanit chuna la tsumat litatawilat nema makaxnikanit chixku tiku natatamakgaxtokga.
3 Chu kkgaxmatli akgtum tliwakga tachuwin nema xtaxtuyacha kpumapakgsin chu xwan: «¡Kaʼakxilhti! Xtabernáculo* Dios natawila kxlakgstipankan latamanin. Chu xla akxtum nakatatawila chu xlakan xkachikin nalitaxtukgo. Chu Dios akxtum katawi nawan.
4 Chu Dios nakaxakani putum xlakgpixtajatkan, chu nialhti katinilh, nialhti katilipuwa, nialhti katitasalh, nialhti katikatsanajwalh. Putum tuku xʼanan xapulana lakgsputkgonit nawan».
5 Tiku xwi kpumapakgsin wa: «¡Kaʼakxilhti! Kmasastima putum tuku anan». Chu wampa: «Katsokgwili uma, xlakata umakgolh tachuwin tlan lipawankan chu xaxlikana».
6 Chu kiwanilh: «¡Kgantaxtukgonita! Akit Kilhtsukut chu Lisputni.* Putum tiku kgalhputima* kaj xachunata nakmakgotni ktaxtunu* niku taxtu chuchut nema masta latamat.
7 Putum tiku namakgatlajanan namakglhtinan putum uma; akit naklitaxtu xDios chu xla kinkgawasa nalitaxtu.
8 Pero tiku makgatlaja xtapekua, tiku ni kgalhikgo takanajla, tiku xataxkajwani chu tiku lismanikgo tlawakgo tuku xalixkajni, tiku makgninanin, tiku tlawakgo talakgxtumit nema ni xlitatlawat,* tiku skuwananin, tiku kakninanikgo tatlawamakgxtu* chu putum tiku akgsaninankgo lhkgen nakamakankan niku lakatum wi lanka lhkuyat chu lilakgpasawi azufre, nema kilhchanima xliʼakgtiy linin».
9 Chatum lata xlikgalhtujunkan ángeles tiku xchipakgonit akgtujun pulatu niku xtajumakgo xaʼawatiya tuku nitlan, milh chu kiwanilh: «Katat, nakmasiyaniyan litatawilat tsumat, tiku xpuskat* Borrego nawan».
10 Wa xlakata limaklakaskilh xlitliwakga espíritu, kililh kʼakgtum lanka chu talhman sipi, chu kimasiyanilh xasanto kachikin Jerusalén. Xtawilacha Dios pero alistalh makgxtakgli akgapun chu taktalh,
11 chu xkgalhi xlilanka Dios. Xlakgskgo chuna la lakgskgo akgtum chiwix nema lu lilakgatit, xtachuna la chiwix jaspe nema lakgskgo chuna la vidrio nema lakgxkgakga.
12 Xkgalhi laklanka chu laktalhman xpatsaps, chu akgkutiy malakcha* chu kʼakgatunu malakcha xya chatum ángel, chu xtukuwanikan akgkutiy laklanka xfamilias xkamanan Israel xtatsokgtawilakgonit kmalakcha.
13 Anta niku taxtu chichini xʼanan akgtutu malakcha, knorte xʼanan akgtutu malakcha, ksur xʼanan akgtutu malakcha chu anta niku tatsekga chichini xʼanan akgtutu malakcha.
14 Nachuna, patsaps nema xmakgstiliwili kachikin xmakilhtsukikanit kxkgalhni akgkutiy chiwix chu kʼumakgolh chiwix katsokgwilikanit akgkutiy xtukuwanikan kgalhkutiy xʼapóstoles Borrego.
15 Tiku xkintachuwinama xchipanit tuku lilhkanan, kgantum kgatit xla oro, xlakata nalilhka kachikin, xmalakcha chu xpatsaps nema makgstiliwili.
16 Chu kachikin kgalhi akgtati xchastun, nema watiya chuna la xlitilanka chu xlilhman. Chu limaklakaskilh kgatit xlakata nalilhka kachikin: akgkutiy mil estadios;* akxtuma xlilhman, xlitilanka chu xlitalhman.
17 Na lhkalh patsaps nema makgstiliwili kachikin: akgtum ciento tipuxamatati codos,* tuku limaklakaskilh ángel xlakata nalilhkanan na xtachuna tuku limaklakaskinkgo latamanin.
18 Patsaps nema xmakgstiliwili kachikin xlitatlawanit chiwix xla jaspe chu kachikin xlitatlawanit lu xatlan oro, xlakgxkgakga chuna la vidrio.
19 Xkilhtsukut patsaps nema xmakgstiliwili kachikin xlikaxtlawakanit tipalhuwa lakglilakgatit chiwix: xapulana xkilhtsukut wa chiwix wanikan jaspe,* xliʼakgtiy chiwix wanikan zafiro,* xliʼakgtutu chiwix wanikan calcedonia,* xliʼakgtati chiwix wanikan esmeralda,*
20 xliʼakgkitsis chiwix wanikan sardónica,* xliʼakgchaxan chiwix wanikan sardio,* xliʼakgtujun chiwix wanikan crisólito,* xliʼakgtsayan chiwix wanikan berilo,* xliʼakgnajatsa chiwix wanikan topacio,* xliʼakgkaw chiwix wanikan crisoprasa,* xliʼakgkawitu chiwix wanikan jacinto,* xliʼakgkutiy chiwix wanikan amatista.*
21 Nachuna, akgkutiy malakcha xlitatlawanit akgkutiy perlas; akgatunu malakcha xlitatlawanit kaj akgtum perla. Chu xatilanka xtiji kachikin xlitatlawanit lu xatlan oro, xlakgxkgakga chuna la vidrio.
22 Nipara akgtum templo kakxilhli anta, xlakata Jehová Dios, Tiku kgalhi putum litliwakga, wa xtemplo kachikin, Borrego na templo litaxtu.
23 Kachikin ni maklakaskin kxkgakganat chichini chu kxkgakganat papaʼ, xlakata xlilanka Dios maxki kxkgakganat chu xmakgskgot wa Borrego.
24 Xmakgskgot namaxkgakge kxtijikan kachikinin, chu xmapakgsinanin katiyatni namalankikgo kachikin.
25 Nikxni katitamalakchuwalh xmalakcha, xlakata anta ni katiʼanalh tsisni.
26 Chu putum laklanka kachikinin nalinikgo lilanka chu kakni.
27 Pero putum tiku xataxkajwani chu tiku lismanikgo tlawakgo tuku xalixkajni chu akgskgawinankgo nikxni katitanukgolh kʼuma kachikin. Kajwatiya natanu tiku tatsokgtawilanit xtukuwani klibro xla latamat. Uma libro tapakgsini Borrego.
Notas
^ Kaʼakxilhti glosario.
^ Xagriego: «Alfa chu Omega». Uma akgtiy tachuwin, «Alfa» chu «Omega», wa xapulana chu xaʼawatiya letra xla alfabeto griego.
^ Alakatanu wankan «kgalhtima».
^ Alakatanu wankan «kmusni».
^ Kaʼakxilhti glosario.
^ Alakatanu wankan «tamakanitlaw».
^ Alakatanu wankan «xchat».
^ Alakatanu wankan «puwilhta».
^ Max akgtiy mil akgtiy ciento akgpuxam kilómetros. Akgtum estadio 185 metros xlilanka.
^ Max 64 metros.
^ Kaʼakxilhti glosario.
^ Kaʼakxilhti glosario.
^ Kaʼakxilhti glosario.
^ Kaʼakxilhti glosario.
^ Kaʼakxilhti glosario.
^ Kaʼakxilhti glosario.
^ Kaʼakxilhti glosario.
^ Kaʼakxilhti glosario.
^ Kaʼakxilhti glosario.
^ Kaʼakxilhti glosario.
^ Kaʼakxilhti glosario.
^ Kaʼakxilhti glosario.
