Apocalipsis 22:1-21
22 Chu kimasiyanilh akgtum kgalhtuchokgo xla chuchut nema masta latamat, stalanka chuna la vidrio, anta xtaxtuyacha kxpumapakgsin Dios chu Borrego,
2 chu xtitaxtu kxlakʼitat xatilanka xtiji kachikin. Kʼakgtiy kxkilhtunin kgalhtuchokgo xyakgo kiwi nema mastakgo latamat chu makgkutiy makgalanankgo akgatunu kata chu mastakgo xtawakat akgatunu papaʼ. Chu xtuwan umakgolh kiwi xkalimapaksakan laklanka kachikinin.
3 Chu Dios ni katiwanilh kachikin pi kalakgchalh tuku nitlan. Pero xpumapakgsin Dios chu Borrego natawilakgo kkachikin. Xlakskujnin Dios namaxkikgo xasanto taskujut,
4 nalakaʼakxilhkgo chu nakgalhikgo xtukuwani kxmunkan.
5 Na nialh katiʼanalh tsisni, nialh katilimaklakaskinkgolh kxkgakganat akgtum makgskgot nipara kxkgakganat chichini, xlakata Jehová Dios nakamaxki kxkgakganat chu xlakan namapakgsinankgo putum kilhtamaku.
6 Ángel kiwanilh: «Umakgolh tachuwin tlan lipawankan chu xaxlikana. Chuna, Jehová, Dios tiku kamaklakaskilh palakachuwinanin xlakata nachuwinan, kimakamilh xlakata nakkamasiyani xlakskujnin tuku nialh makgas nala.
7 ¡Kaʼakxilhti! Nialh lhuwa kilhtamaku tsankga xlakata nakmin. Paxuwa tiku makgantaxti tuku wan uma rollo pi aku nala».
8 Akit, Juan, kkgaxmatli chu kakxilhli putum uma. Akxni xakakxilhkgonita chu xakkgaxmatkgonita, ktatsokgostalh kxlakatin ángel tiku xkimasiyaninit putum uma, xlakata nakkakninani.
9 Pero xla kiwanilh: «¡Ni! ¡Nichuna katlawa! Xlakata akit kaj chatum lakskujni chuna la wix chu minatalan, palakachuwinanin, chu chuna la tiku kgalhakgaxmatkgo tuku wan uma rollo. Wa Dios kakakninani».
10 Chu wampa: «Ni tsekg kalikatsi tuku wan uma rollo pi aku nala, xlakata kilhtamaku nema laklhkawilikanit talakatsuwinita.
11 Tiku ni xaʼakgstitum chuntiya katlawalh tuku ni xaʼakgstitum chu tiku xaxkajwani chuntiya kataxkajwanilh. Pero tiku xaʼakgstitum chuntiya katlawalh tuku xaʼakgstitum chu tiku xasanto chuntiya xasanto kalitaxtulh.
12 »“¡Kaʼakxilhti!, nialh lhuwa kilhtamaku tsankga xlakata nakmin, chu klimin tuku naklimaskgawinan, xlakata naklixokgoni chatunu chatunu xlakata tuku tlawalh.
13 Akit xapulana chu xaʼawatiya, Kilhtsukut chu Lisputni.*
14 Paxuwakgo tiku chakgakgo klhakgatkan, xlakata xlakan tlan nawakgo xtawakat kiwi nema masta latamat chu anta nalaktanukgo kxmalakcha* kachikin.
15 Kxkilhtin kachikin wilakgolh chichi* chu tiku skuwanankgo, tiku tlawakgo talakgxtumit nema ni xlitatlawat,* tiku makgninankgo, tiku kakninanikgo tatlawamakgxtu* chu putum tiku lakgatikgo akgsaninankgo chu lismanikgo akgsaninankgo.
16 »“Akit, Jesús, kmalakgachalh kiʼángel xlakata nakamakatsiniyan putum uma xlakata tlan nakakitaxtuni congregaciones. Akit xalak xfamilia chu xkam David chu staku xala tsisa nema lu skgo”».
17 Xlitliwakga Dios chu tsumat litatawilat chuntiya wankgo «¡Katat!». Chu putum tiku kgaxmata kawa, «¡Katat!». Chu putum tiku kgalhputima* kamilh. Putum tiku likgotnamputun, kaj xachunata kalikgotnalh chuchut nema masta latamat.
18 «Putum tiku kgaxmatkgo umakgolh tachuwin xla uma rollo nema wan tuku aku nala, akit kmakatsini: “Komo wi tiku maliwakani tuku tatsokgnit, Dios natlawa pi nalakgchin tuku nitlan nema tatsokgnit kʼuma rollo;
19 chu komo wi tiku namakglhti tachuwin nema wan tuku aku nala, Dios ni katimaxkilh talakaskin namakglhtinan tuku laktlan lichuwinan uma rollo. Uma kilhchanima pi Dios ni katimaxkilh talakaskin nawa xtawakat kiwi nema masta latamat, chu ni katimaxkilh talakaskin natanu kxasanto kachikin”.
20 »Tiku makatsininan uma wan: “Chuna, nialh lhuwa kilhtamaku tsankga xlakata nakmin”».
«¡Chuna kalalh! Katat, kiMalana* Jesús».
21 Malana Jesús kakamaxkilh tiku xasantos xtalakgalhaman nema ni anan xtachuna.*
Notas
^ Xagriego: «Alfa chu Omega». Uma akgtiy tachuwin, «Alfa» chu «Omega», wa xapulana chu xaʼawatiya letra xla alfabeto griego.
^ Alakatanu wankan «kxpuwilhta».
^ Uma wamputun, tiku lismanikgonit tlawakgo tuku Dios lu lixkajni akxilha.
^ Kaʼakxilhti glosario.
^ Alakatanu wankan «tamakanitlaw».
^ Alakatanu wankan «kgalhtima».
^ Alakatanu wankan «kimPuchina».
^ O: «talakgalhaman nema ni kinkalakgchanan». Kaʼakxilhti glosario.
