Apocalipsis 3:1-22
3 »Kamalakgachani tatsokgni ángel xalak congregación nema wi kSardis: Wa uma tuku wan tiku kgalhi kgalhtujun xʼespíritus Dios chu akgtujun staku: “Kkatsi tuku tlawanita chu tasiya pi xastakna wix, pero xanin litaxtuya.
2 Skgalalh katawila chu kamatliwakglhti tuku tamakgxtakgnit nema xʼamaja niy, xlakata kakxilhnit pi ni tlawanita putum tuku Dios lakaskin pi natlawaya.
3 Wa xlakata, putum kilhtamaku kalakapastakti tuku makglhtinanti chu tuku kgaxpatti. Chuntiya kakgalhakgaxpatti chu kamakgxtakgti tuku nitlan tlawapat. Chu komo ni nalakastakwanana, nakmin chuna la chatum kgalhana chu nipara katikatsi tuku hora nakchin.
4 »”Pero anta kSardis kakgalhiya makgapitsi* tiku ni maxkajwanikgonit klhakgatkan chu nalilhakganankgo laksnapapa lhakgat chu akxtum nakintatlawankgo xlakata kalakgchan uma talakgalhaman.
5 Tiku natlajanan ktalachipat chuna nalhakganan, nalilhakganan lhakgat xalaksnapapa chu nikxni ktixapalh xtukuwani klibro xla latamat, wata nakwan kxlakatin kinTlat* chu xʼángeles pi klakgapasa.
6 Tiku tlan kgaxmata, kakgaxmatli tuku espíritu santo kawani congregaciones”.
7 »Kamalakgachani tatsokgni ángel xalak congregación nema wi kFiladelfia: Wa uma tuku wan tiku xasanto, tiku xaxlikana, tiku kgalhi xllave David, tiku malakki chu nila tiku namalakchuwa chu tiku malakchuwa chu nila tiku namalakki:
8 “Kkatsi tuku tlawanita. (¡Kaʼakxilhti!, kwilinit kmilakatin akgtum malakcha* nema talakkinit chu nila tiku malakchuwa). Chu kkatsi pi maski ni lu tliwakga wix, kgalhakgaxpatti kintachuwin chu ni lakgmakganti kintukuwani.
9 ¡Kaʼakxilhti!, naktlawa pi tiku tapakgsikgo kxsinagoga Satanás, tiku wankgo pi judíos, pero ni xlikana, kaj akgsaninankgo, naminkgo chu nalakgtakilhputanikgoyan* chu nakkamakatsini pi akit kpaxkinitan.
10 Xlakata tayaninita chuna la akit, akit na nakmakgtayayan akxni naliʼakxilhnankan, tuku aku namin kxlikalanka katiyatni xlakata nakaliʼakxilhkan putum latamanin.
11 Nialh makgas nakmin. Chuntiya tliwakglh kachipa tuku kgalhiya xlakata niti namakglhtiyan mintatlaja.*
12 »”Tiku natlajanan ktalachipat, talayaw* naklimaxtu kxtemplo kiDios, chu nikxni katitaxtulh. Kxmun ama lataman naktsokgwili xtukuwani kiDios, xtukuwani xkachikin kiDios, wa xaSasti Jerusalén nema takta kʼakgapun, anta niku wilacha kiDios, chu xasasti kintukuwani.
13 Tiku tlan kgaxmata, kakgaxmatli tuku espíritu santo kawani congregaciones”.
14 »Kamalakgachani tatsokgni ángel xalak congregación nema wi kLaodicea: Wa uma tuku wan tiku wanikan Chuna kalalh, tatayana tiku ni makgxtakgnan chu xaxlikana, xapulana xtamalakatsukin Dios:
15 “Kkatsi tuku tlawanita chu kkatsi pi wix nipara kgawiwi chu nipara chichi. Tlan xwa komo kgawiwi o chichi xlitaxtu.
16 Pero xlakata wix xtachuna la xatsitsi* chuchut, nema nipara kgawiwi chu nipara chichi, nakkilhtaxtuyan.
17 Wix wana: «Lhuwa tumin kkgalhi, lhuwa tuku xtapalh kkgalhi chu nitu kintsankgani», pero ni katsiya pi ni paxuwaya, limaxkgen, ni lakawanana chu xalhtantala* litaxtuya.
18 Wa xlakata kstakyawayan pi kakimakgtamawa oro nema limaskulunkikanit lhkuyat, xlakata nakgalhiya lhuwa tumin, xalaksnapapa lhakgat xlakata nalilhakganana chu ni natamamaxaniya xlakata amakgapitsin xalhtantala naʼakxilhkgoyan chu kakimakgtamawa likuchun xla lakgastapu xlakata tlan nalakawanana.
19 »”Putum tiku kkapaxki kkamasiyani tuku nitlan tlawamakgo chu palha kkastakyawa, wa xlakata kamakgxtakgti tuku nitlan tlawapat chu xliputum minaku kaskujnani Dios.
20 ¡Kaʼakxilhti!, klakgatlakgma malakcha. Komo wi tiku nakgaxmata kintachuwin chu nakimalakkini, naktanu kxchik chu akxtum nakwayanaw kakgotanun.
21 Tiku natlajanan ktalachipat, nakmaxki talakaskin nakintatawila kkimpumapakgsin, chuna la akit kmakgatlajanalh chu ktatawi kinTlat kxpumapakgsin.
22 Tiku tlan kgaxmata, kakgaxmatli tuku espíritu santo kawani congregaciones”».
Notas
^ Xagriego: «makgapitsi tukuwani».
^ Alakatanu wankan «kinTata o kinTiku».
^ Alakatanu wankan «puwilhta».
^ O: «namaxkikgoyan kakni».
^ Xagriego: «mincorona».
^ Alakatanu wankan «chaya».
^ Alakatanu wankan «xasapapa».
^ Alakatanu wankan «makglhtintili».
