Apocalipsis 4:1-11
4 Alistalh kakxilhli akgtum malakcha nema xlakki anta kʼakgapun, chu xapulana tachuwin nema kkgaxmatli pi xkintachuwinama xmakasanan chuna la akgtum trompeta. Chu kiwanilh: «Katat unu talhman, nakmasiyaniyan tuku nialh makgas nala».
2 Alistalh, tunkun kilakgtaktalh xʼespíritu Dios, chu kakxilhli akgtum pumapakgsin anta kʼakgapun, chu na kakxilhli tiku xwi kpumapakgsin.
3 Chu tiku anta xwi xmakgskgo chuna la akgtum chiwix xla jaspe chu chuna la akgtum lu stlan xaspinini chiwix, chu pumapakgsin xlitamakgstilinit akgtum chamakxkulit* nema xtasiya chuna la chiwix nema wanikan esmeralda.
4 Uma pumapakgsin xlitamakgstilinit puxamatati pumapakgsin, chu kʼumakgolh pumapakgsin kakxilhli pi xwilakgolh puxamatati lakgkgolotsin. Xlilhakganankgonit xasnapapa lhakgat chu kxʼakgxakgakan xkgalhikgo akgtum corona xla oro.
5 Chu makglipni, tachuwin chu jili kpumapakgsin xtaxtukgoyacha; chu akgtujun laklanka limakgskgon xpasamakgolh kxlakatin pumapakgsin. Umakgolh kilhchanimakgo akgtujun xʼespíritus Dios.
6 Kxlakatin pumapakgsin xʼanan tuku xtasiya xtachuna la chuchut nema lakatum wi chu xtasiya chuna la vidrio.
Kxlakgstipan pumapakgsin* chu kxlimakgstilili xyakgolh kgalhtati querubines* nema xlitsamakgo lakgastapu kxlakatinkan chu kxchakgenkan.
7 Xapulana querubín xtasiya chuna la tantum león, xlichatiy querubín xtasiya chuna la tantum toro, xlakan xlikgalhtutu querubín xtasiya chuna la xla chatum chixku chu xlikgalhtati querubín xtasiya chuna la tantum águila nema kgosma.
8 Chatunu querubín xkgalhikgo akgchaxan xpakgankan nema xlitsamakgo lakgastapu. Chu tantaku chu tantaskaka wankgo: «Santo,* santo, santo litaxtu Jehová Dios, Tiku kgalhi putum litliwakga, wa tiku xlama, tiku lama chu tiku nalatama».
9 Makgatunu akxni querubines malankikgo, maxkikgo kakni, chu maxkikgo tapaxtikatsinit Dios, tiku wi kpumapakgsin, tiku putum kilhtamaku lama,
10 puxamatati lakgkgolotsin lakgtatsokgostanikgo Dios, tiku wi kpumapakgsin chu maxkikgo kakni tiku putum kilhtamaku lama. Lakgmakankgo kxlakatin pumapakgsin xcoronaskan chu wankgo:
11 «Wix kiDioskan Jehová, lakgchanan namakglhtinana kakni, namalankikana chu namakglhtinana litliwakga, xlakata wix putum malakatsuki chu putum anan xlakata wix chuna lakaskinti».
Notas
^ Alakatanu wankan «makxkulinkat».
^ O: «Kxlakʼitat, lakatsu niku wi pumapakgsin».
^ Querubines wa ángeles tiku kgalhikgo lhuwa limapakgsin.
^ O: «Skulunku».
