Apocalipsis 5:1-14
5 Kxpakgastakat* Dios, tiku xwi kpumapakgsin kakxilhli pi xchipanit rollo nema lakgaputiy* xtsokgkanit. Liwana xlisellarlikanit akgtujun sellos.*
2 Chu kakxilhli chatum tliwakga ángel tiku pixlanka xmakatsininama: «¿Tiku lakgchan namalakki rollo chu ksellos?».
3 Pero niti, nipara kʼakgapun, nipara kkatiyatni, nipara kxtampin katiyatni, xʼanan tiku tlan xmalakkilh rollo chu xʼakxilhli tuku xtatsokgnit anta.
4 Ktsukulh tasa chu lu ktasalh xlakata ni xtekgskan tiku xlakgchan namalakki rollo chu naʼakxilha tuku xtatsokgnit anta.
5 Pero chatum kgolotsin kiwanilh: «Nialh katasa. ¡Kaʼakxilhti!, tiku limapakuwikan León, xalak lanka xfamilia Judá, xalak xfamilia David,* tlajananit. Wa xlakata xla tlan namalakki rollo chu akgtujun ksellos».
6 Chu kakxilhli pi xya tantum borrego, nema xtasiya pi xmakgnikanit. Chu kgalhtati querubines* xyakgolh lakatsu kpumapakgsin chu borrego xya kxlakatinkan querubines chu lakgkgolotsin xkastiliwilikgonit. Xkgalhi akgtujun akgalokgot chu akgtujun lakgastapu. (Lakgastapu kilhchanima akgtujun xʼespíritus Dios nema kamalakgachakanit kxlikalanka katiyatni).
7 Chu tunkun talakatsuwilh Borrego* chu tiyalh rollo nema xwi kxpakgastakat Dios, tiku xwi kpumapakgsin.
8 Akxni tiyalh rollo, kgalhtati querubines chu puxamatati lakgkgolotsin tatsokgostakgolh kxlakatin Borrego. Chatunu xkgalhikgo akgtum arpa chu akgtum pulatu xla oro nema xlitatsamanit incienso. (Incienso kilhchanima xʼoracioneskan tiku xasantos).
9 Chu kilhtlikgo xasasti takilhtlin nema wan: «Lakgchanan namalakkiya rollo chu ksellos, xlakata makgnikanti chu minkgalhni litamawa latamanin xlakata kskujnikgolh Dios xliputum laklanka familias chu kachikinin chu laklanka kachikinin chu tipalhuwa tachuwin chuwinankgo.
10 Wix tlawa pi mapakgsinanin chu sacerdotes nalitaxtukgo xlakata naskujnanikgo kiDioskan, chu namapakgsinankgo kkatiyatni».
11 Kakxilhli chu kkgaxmatli xtachuwinkan chalhuwa ángeles tiku kstiliwilikgonit pumapakgsin, querubines chu lakgkgolotsin. Makglhuwa akgkaw mil xwankgonit chu makglhuwa mil xwankgonit,
12 chu pixlanka xwankgo: «Borrego tiku makgnika lakgchan namakglhtinan limapakgsin chu tuku lhuwa xtapalh xaʼespiritual chu liskgalala chu litliwakga chu kakni chu lilanka chu tasikulunalin».
13 Chu putum tamalakatsukin nema wi kʼakgapun, kkatiyatni, kxtampin katiyatni chu kpupunu, putum tuku anan anta, kkgaxmatli pi xwankgo: «Dios tiku wi kpumapakgsin chu Borrego kamakglhtinankgolh tasikulunalin, likakni, lilanka chu litliwakga putum kilhtamaku».
14 Kgalhtati querubines xwankgo: «¡Chuna kalalh!». Chu lakgkgolotsin lakgtatsokgostakgolh chu maxkikgolh kakni Dios.
Notas
^ Alakatanu wankan «Kxpakgkana».
^ Xagriego: «xpulakni chu xmakni».
^ Akgtum «sello» wa cera nema xlislamakan rollo.
^ Xagriego: «xtankgaxekg David».
^ Querubines wa ángeles tiku kgalhikgo lhuwa limapakgsin.
^ Xagriego: «xaskgataku borrego».
