Apocalipsis 7:1-17
7 Akxni xtitaxtunita uma, kakxilhli pi kgalhtati ángeles xyakgolh klakatati xchastunin katiyatni. Xmalakgachokgomakgolh un nema minkgoyacha klakatati xchastunin katiyatni, xlakata ni xʼunalh kkatiyatni, nipara kpupunu, nipara anta niku yakgolh kiwi.
2 Na kakxilhli achatum ángel tiku xminacha anta niku taxtu chichini, kxmakan xlimin ksello xastakna Dios. Chu xla pixlanka* kawanilh kgalhtati ángeles tiku xkamaxkikanit talakaskin natlawanikgo tuku nitlan katiyatni chu pupunu.
3 Kawanilh: «¡Ni katlawanitit tuku nitlan katiyatni, nipara pupunu, nipara kiwi, asta akxni nakkawilinikgoyaw sello kxmunkan kskujnin kiDioskan!».
4 Chu kkgaxmatli chuna la xlikgalhlit xʼamaka kawilinikan sello: akgtum ciento tipuxamatati mil. Xminkgoyacha xliputum laklanka xfamiliajkan xlakgkgawasan Israel.
5 Xalak lanka xfamilia Judá, akgkutiy mil kawilinika sello;xalak lanka xfamilia Rubén, akgkutiy mil;xalak lanka xfamilia Gad, akgkutiy mil;
6 xalak lanka xfamilia Aser, akgkutiy mil;xalak lanka xfamilia Neftalí, akgkutiy mil;xalak lanka xfamilia Manasés, akgkutiy mil;
7 xalak lanka xfamilia Simeón, akgkutiy mil;xalak lanka xfamilia Leví, akgkutiy mil;xalak lanka xfamilia Isacar, akgkutiy mil;
8 xalak lanka xfamilia Zabulón, akgkutiy mil;xalak lanka xfamilia José, akgkutiy mil;xalak lanka xfamilia Benjamín, akgkutiy mil kawilinika sello.
9 Akxni xtitaxtunita uma kakxilhli lhuwa latamanin nema nila tiku tlan xkaputlekge. Xtaxtukgonitancha kputum laklanka kachikinin, laklanka familias chu kachikinin chu tipalhuwa tachuwin xchuwinankgo, chu xyakgolh kxlakatin pumapakgsin chu kxlakatin Borrego. Xlilhakganankgonit laklhman laksnapapa lhakgat chu xchipakgonit xpakganin mokgot.*
10 Chu pixlanka xwankgo: «¡Lakgtaxtut wa kinkamaxkiyan Dios, tiku wi kpumapakgsin, chu Borrego!».
11 Putum ángeles xmakgstiliwilikgonit pumapakgsin, chu xkamakgstiliwilikgonit lakgkgolotsin chu kgalhtati querubines;* chu tatsokgostakgolh kxlakatin pumapakgsin chu maxkikgolh kakni Dios.
12 Xwankgo: «¡Chuna kalalh! Wa kiDioskan katapakgsinilh putum kilhtamaku tasikulunalin chu lilanka chu liskgalala chu tachuwin xla tapaxtikatsinit chu likakni chu lhuwa tuku tlan tlawakan chu litliwakga. Chuna kalalh».
13 Alistalh, chatum kgolotsin kinkgalhskilh: «¿Tiku ama lilhakganankgonit xalaklhman laksnapapa lhakgat? ¿Niku minkgoyacha?».
14 Wa xlakata tunkun kkgalhtilh: «KiMalana,* wix tiku katsi xatakgalhtin». Wa xlakata kiwanilh: «Xlakan wa tiku lakgtaxtunikgonit lhuwa tapatin; chakgakgonit laklhman klhakgatkan chu limasnapapikgonit xkgalhni Borrego.
15 Wa xlakata yakgolh kxlakatin xpumapakgsin Dios chu maxkikgo xasanto xtaskujutkan kxtemplo tantaku chu tantaskaka. Chu Dios, tiku wi kpumapakgsin nakakuentajtlawa.
16 Nialh katikilhtsinkskgolh nipara katikgalhputikgolh;* na nialh katikamakgapatinalh chichini.
17 Xlakata Borrego, nema ya kxlakgstipan* pumapakgsin, nakakuentajtlawa chuna la chatum mapuchwayanina chu nakapulalin niku wi taxtunu* xla chuchut nema masta latamat. Chu Dios nakaxakani xlakgpixtajatkan».
Notas
^ Alakatanu wankan «akglhman».
^ Alakatanu wankan «tsukswat».
^ Querubines wa ángeles tiku kgalhikgo lhuwa limapakgsin.
^ Alakatanu wankan «KimPuchina».
^ Alakatanu wankan «natakgalhtixni».
^ O: «kxlakʼitat».
^ Alakatanu wankan «musni».
