Apocalipsis 8:1-13
8 Akxni Borrego malakkilh xliʼakgtujun sello,* itat hora katsilis tawilalh akgapun.
2 Chu kakxilhli kgalhtujun ángeles tiku yakgolh kxlakatin Dios chu kamaxkilh akgtujun trompetas.
3 Chilh atanu ángel tiku xchipanit pumajinin xla oro xlakata nalhkuyu limajinin,* chu anta tayalh kxlakatin pumakamastan. Maxkika lhuwa limajinin* xlakata klhkuyulh kpumakamastan xla oro nema xwi kxlakatin pumapakgsin, akxni xtakgaxmatli xʼoracioneskan xliputum tiku xasantos.
4 Chu xajin limajinin* nema xchipanit ángel chalh asta kxlakatin Dios akxni takgaxmatli xʼoracioneskan tiku xasantos.
5 Pero ángel tunkun tiyalh pumajinin, chu limatsamalh jalanat xalak pumakamastan chu lhkgen makalh kkatiyatni. Alistalh jilinalh chu makglipnalh kʼakgapun chu tachikilh tiyat. Nachuna kkgaxmatli tachuwin.
6 Chu kgalhtujun ángeles tiku xmakglhtinankgonit trompetas takaxkgolh xlakata namatasikgo.
7 Xapulana ángel matasilh xtrompeta. Alistalh taktalh chijit kkatiyatni chu lhkuyat nema xtatalakgwilhanit kgalhni. Chu kaj ni lhuwa* tuku xalak katiyatni lhkulh; nachuna kaj ni lhuwa* kiwi, chu putum tuwan xalak kapukuxtun.
8 Xlichatiy ángel matasilh xtrompeta. Chu wi tuku xtachuna la lanka sipi nema xlilakgpasama lhkuyat lhkgen makanka kpupunu. Chu kaj ni lhuwa* pupunu kgalhni litaxtulh;
9 chu kaj ni lhuwa* tuku staknan kpupunu nikgolh chu kaj ni lhuwa* barcos kamalakgsputuka.
10 Chu xlikgalhtutu ángel matasilh xtrompeta. Alistalh, akgtum staku nema xlakgpasama taktalh. Lakgtajulh kaj ni lhuwa* kgalhtuchokgo nema wilakgolh chu nachuna taxtunu* nema anan.
11 Uma staku xwanikan xaxun tuwan. Chu kaj ni lhuwa* chuchut xun wa. Lhuwa latamanin nikgolh xlakata chuchut xun wa.
12 Xlikgalhtati ángel matasilh xtrompeta. Alistalh, kaj ni lhuwa chichini, kaj ni lhuwa papaʼ chu kaj ni lhuwa staku lakapukswanankgolh chu ni xkgakganalh kaj ni lhuwa kakuwani chu nachuna katsisni.
13 Kakxilhli chu kkgaxmatli pi tantum águila xkgosma kʼakgapun* chu pixlanka* wa: «Tiku lamakgolh kkatiyatni natitaxtukgo laklanka taʼakglhuwit xlakata atsinu tsankga pi akgalhtutu ángeles namatasikgo xtrompetajkan».
Notas
^ Akgtum «sello» wa cera nema xlislamakan rollo.
^ O: «incienso».
^ O: «incienso».
^ O: «incienso».
^ Xagriego: «1/3 (akgtum lata xliʼakgtutu)».
^ Xagriego: «1/3 (akgtum lata xliʼakgtutu)».
^ Xagriego: «1/3 (akgtum lata xliʼakgtutu)».
^ Xagriego: «1/3 (akgtum lata xliʼakgtutu)».
^ Xagriego: «1/3 (akgtum lata xliʼakgtutu)».
^ Xagriego: «1/3 (akgtum lata xliʼakgtutu)».
^ Alakatanu wankan «musni».
^ Xagriego: «1/3 (akgtum lata xliʼakgtutu)».
^ Tachuwin xagriego kilhchanima akgapun niku kgoskgo tsiktsi.
^ Alakatanu wankan «akglhman».
