Apocalipsis 9:1-21
9 Xlikgalhkitsis ángel matasilh xtrompeta. Alistalh kakxilhli akgtum staku tamokgoscha kʼakgapun chu chilh kkatiyatni, chu maxkika llave xalak kapulhman.
2 Chu akxni malakkilh, taxtulh jini, xtachuna xjini akgtum lanka lhkuyat. Chu chichini chu un tsitsakga lakgolh xlakata jini nema taxtucha anta.
3 Chu kjini taxtukgolh xtuki nema ankgolh kkatiyatni chu kamaxkika litliwakga, na watiya litliwakga nema kgalhikgo taskuyu* xalak katiyatni.
4 Chu kalimapakgsika pi nitu xtlawanikgolh sakgat, tuwan chu kiwi xalak katiyatni, wata wa latamanin tiku ni kgalhikgo ksello Dios kxmunkan.
5 Chu xtuki ni kamaxkika talakaskin xlakata nakamakgnikgo latamanin, wata kaj nakamakgapatinankgo akgkitsis papaʼ. Xtachuna la tantum taskuyu* mapatini chatum lataman, chuna xkamakgapatinankgo.*
6 Amakgolh kilhtamaku, latamanin naputsakgo chuna la nanikgo pero ni katitekgskgolh; lu naniputunkgo, pero linin nakatsalani.
7 Chu umakgolh xtuki xtasiyakgo xtachuna la kawayu nema kamakaxkanit xlakata natlawakgo guerra. Xkgalhikgo kxʼakgxakgakan tuku xtachuna akgtum corona xla oro, chu xlakapunkan xwanit xtachuna la xlakapunkan latamanin.
8 Xkgalhikgo xchixitkan chuna la xla lakpuskatin chu xtatsankan chuna la xla león;
9 chu xlinkgo xalikan tuku xlitakuxmumakgtayakgo.* Chu xpakgankan lu xmakasanan xtachuna la putlaw nema lhtanklin kawayu akxni amakgolh kʼguerra.
10 Nachuna, kgalhikgo kstajankan chu xlichuwankan chuna la taskuyu;* chu kstajankan kgalhikgo litliwakga xlakata nakamakgapatinankgo latamanin akgkitsis papaʼ.
11 Chu kgalhikgo chatum mapakgsina: ángel tiku lakgayawakanit nakuentajtlawa niku kxakapulhman. Xtukuwani khebreo Abadón,* chu kʼgriego Apolión.*
12 Xapulana lanka taʼakglhuwit titaxtulha. ¡Kaʼakxilhti! Alistalh namimparakgo apulaktiy.
13 Chu xlikgalhchaxan ángel matasilh xtrompeta. Chu kkgaxmatli akgtum tachuwin nema xminacha kxchastunin* pumakamastan xla oro nema wi kxlakatin Dios.
14 Chu wanilh xlikgalhchaxan ángel tiku xkgalhi trompeta: «Kakaxkutti ángeles tiku kachikanit lakatsu niku titaxtu lanka kgalhtuchokgo Éufrates».
15 Chu kaxkutnilh tuku xlitachikgonit kgalhtati ángeles tiku xkgalhkgalhimakgolh ama hora, kilhtamaku, papaʼ chu kata xlakata xkamakgnikgolh kaj ni lhuwa* latamanin.
16 Kkgaxmatli chuna la xlilhuwa soldados tiku xkgewilakgolh kawayu, akgtiy ciento millones* xwankgonit.
17 Kakxilhli chuna la xtasiyakgo kawayu chu tiku xkgewilakgolh: xlinkgo tuku xlitakuxmumakgtayakgo* lakspinini xwankgonit, lakspupuku chu smukuku chuna la azufre; xʼakgxakgakan kawayu xwankgonit xtachuna la xʼakgxakgakan leones chu kxkilhnikan xtaxtu lhkuyat, jini chu azufre.
18 Kaj ni chalhuwa* latamanin nikgolh xpalakata umakgolh pulaktutu tuku nitlan: lhkuyat, jini chu azufre nema xkilhtaxtukgo kawayu.
19 Xlitliwakgakan kawayu anta wi kxkilhnikan chu kstajankan, xlakata kstajankan xtachuna la luwa nema kgalhikgo xʼakgxakgakan chu uma kalimakgapatinankgo latamanin.
20 Pero amakgapitsi latamanin, tiku ni kamakgnilh uma tuku nitlan, ni makgxtakgkgolh tuku nitlan xtlawamakgolh. Chuntiya xkakninanimakgolh demonios, tatlawamakgxtu* xla oro, plata, cobre, chiwix chu kiwi, nema nila akxilhnankgo, nila kgaxmatkgo chu na nila tlawankgo.
21 Ni makgxtakgtayakgolh xtalakgalhinkan, chuntiya makgninankgolh, chuntiya tlawakgolh taskuwan, tlawakgolh talakgxtumit nema ni xlitatlawat* chu chuntiya kgalhanankgolh.
Notas
^ O: «escorpiones».
^ O: «escorpión».
^ Max: «xtamakgapatin xtuki».
^ Uma kilhchanima, tuku xmaklakaskinkgo soldados, tuku xlitlapakgo xkuxmunkan xtachuna la akgtum escudo.
^ O: «escorpiones».
^ Uma kilhchanima, «lisputni».
^ Uma kilhchanima, «malakgsputuna».
^ O: «kxchastunin nema xtasiyakgo chuna la akgalokgot».
^ Xagriego: «1/3 (chatum lata xlikgalhtutu)».
^ O: «makgpuxam mil kamalhuwi makgkaw mil».
^ Uma kilhchanima, tuku xmaklakaskinkgo soldados, tuku xlitlapakgo xkuxmunkan xtachuna la akgtum escudo.
^ Xagriego: «1/3 (chatum lata xlikgalhtutu)».
^ Alakatanu wankan «tamakanitlaw».
^ Griego, pornéia. Kaʼakxilhti glosario.
