Colosenses 1:1-29
1 Akit, Pablo, xlakata xtalakaskin Dios xʼapóstol Cristo Jesús klitaxtu, nachuna Timoteo kintalakan, kkamalakgachanimaw uma carta,
2 natalan* tiku ni makgxtakgkgo Cristo Jesús tiku wilakgolh kColosas:
KinTlatkan* Dios chu Malana* Jesucristo kakamaxkin talakgalhaman nema ni anan xtachuna* chu takaksni.
3 Putum kilhtamaku kpaxtikatsiniyaw Dios, xTlat kiMalanakan Jesucristo, akxni ktlawayaw oración mimpalakatakan,
4 xlakata kkgaxmatwi takanajla nema kgalhiniyatit Cristo Jesús chu tapaxkit nema kakgalhiniyatit putum natalan*
5 chu kgalhiyatit uma tapuwan xlakata kgalhkgalhipatit tasikulunalin nema kamakinikanitantit kʼakgapun. Wixin katsinitit xlakata uma tasikulunalin akxni kgaxpattit xaxlikana tamasiy, wa xatlan tamakatsinin
6 nema kalakgchinitan wixin. Chuna la xatlan tamakatsinin talhuwimakgo kkatiyatni chu kalakgchama putum latamanin, nachuna tlawamakgolh kmilakgstipankan lata akxni kgaxpattit chu lakgapastit xaxlikana xtalakgalhaman Dios nema ni anan xtachuna.*
7 Wa uma tuku katsininitantit wixin xlakata kintalakan Epafras, tiku paxkiyaw chu ni makgxtakgnan, tiku skuja chuna la skujnani Cristo kimpalakatakan.
8 Xla na kinkamakatsinin xlakata tapaxkit nema espíritu tlawa pi nakgalhiyatit.
9 Wa xlakata, lata kilhtamaku akxni kkgaxmatwi, ankgalhin ktlawayaw oración mimpalakatakan chu kskinaw xlakata nakgalhiyatit xatakgatsin takatsin xlakata xtalakaskin Dios chu putum liskgalala chu taʼakgatekgsni nema masta xʼespíritu Dios,
10 xlakata nalatapayatit chuna la lakaskin Jehová, xlakata putum nalimakgapaxuwayatit chu nachuna natlawayatit tuku tlan chu chuntiya katalhuwitilhalh xatakgatsin takatsin nema kgalhiyatit xla Dios;
11 nachuna ktlawayaw oración xlakata lanka xlitliwakga Dios nakamatliwakglhan xlakata putum xatapaxuwan natayaniyatit,
12 chu kapaxtikatsinitit xaTlat, tiku kamakaxni xlakata namakglhtinanatit tuku kamalaknuninit natalan* tiku lamakgo kxkgakganat.
13 Dios kinkalakgmaxtun niku kapukswa chu kinkapulalin niku wi xtamapakgsin xKgawasa tiku lu paxki,
14 xpalakata xla kgalhiyaw lakgtaxtut xlakata xokgonalh, chuna kinkatapatikanan kintalakgalhinkan.
15 Dios tiku nila akxilhaw, chu xKgawasa watiya tayat nema kgalhikgo, xapulana kam xliputum tamalakatsukin;
16 xpalakata xla malakatsukika putum tuku xalak akgapun chu putum tuku xalak katiyatni: putum tuku tasiya chu putum tuku ni tasiya, mapakgsinanin, pulalinanin, tiku puxkunankgo chu tiku kgalhikgo limapakgsin. Chuna, xpalakata xla putum tatlawalh chu wa tapakgsinikgo.
17 Xla xwija akxni nina xmalakatsukikan putum tuku anan, chu Dios limaklakaskilh xlakata namalakatsuki putum amakgapitsi tuku anan,
18 chu xla xʼakgxakga makni, kilhchanima congregación. Wa kilhtsukut,* chu tiku xapulana lakastakwanalh kkalinin, xlakata xlitaxtulh tiku xapulana xliputum tuku anan;
19 xlakata Dios xlakaskin pi putum xtayat xkgalhilh xkgawasa,
20 nachuna xlakata xkgalhni nema stajmakgalh Cristo kkiwi nema makgapatinan,* xla lakaskin pi putum tuku anan kʼakgapun chu tuku anan kkatiyatni tlan natalalimparakgo.
21 Xlikana, wixin, makgasa xtamakgatlininitantit Dios xlakata xtalamakgasitsin xwanitantit xlakata kaj xlilakpuwanatit xalaklixkajni tatlaw,
22 la uku* xla lakkaxwilinit tlan natalalipimparayatit xpalakata xmakni xKgawasa tiku tamakamastalh klinin, xlakata xasantos nakamakamastayan kxlakatin chu ni nakgalhiyatit tuku lixkajni chu nitu nakalimawakakanatit tuku nitlan,
23 pero chuntiya kalilatapatit takanajla nema kgalhiniyatit Dios, chuntiya tliwakglh katawilatit niku takilhti mintakanajlakan chu tliwakga katayatit, ni katamakgatlinitit tasikulunalin nema kgalhkgalhipatit xlakata kgaxpattit xatlan tamakatsinin nema lichuwinankanit kxlikalanka kakilhtamaku. Akit, Pablo, kilaksakka naklichuwinan uma xatlan tamakatsinin.
24 Xatapaxuwan kpatinama uku mimpalakatakan, chu akit kpatinama chuna la Cristo, pero chuntiya nakmakgatsi uma tapatin xpalakata xmakni Cristo, uma wamputun, congregación.
25 Kskujnani xkachikin Dios, xlakata xla kilakgayawalh uma taskujut. Chu uma xlakata tlan nakakitaxtuniyan. Wa xlakata klichuwinan Dios chuna la kmatlani,
26 chuna, klichuwinan tuku tsekg wi xla Dios, uma tuku tsekg wi ni xlakgapaskgo uma kakilhtamaku* chu latamanin tiku makgasa latamakgolh. Pero uku kamakatsinikanit xasantos tiku tapakgsinikgo,
27 Dios makgapaxuwanit nakamakatsini xasantos tuku tsekg wi, uma tuku lhuwa xtapalh nema kgalhi kakni, kxlakgstipankan kachikinin. Tuku tsekg wi wa Cristo tiku akxtum katawilan, takgalhkgalhin nema kgalhiyatit xlakata akxtum nakatamalankikanatit.
28 Wa tiku lichuwinamaw, putum latamanin kalistakyawamaw chu putum kamasiyanimaw xaxlikana liskgalala, xlakata chatunu chatunu latamanin namakamaxkiyaw Dios chuna la chatum kstalanina Cristo tiku tliwakga kgalhi xtakanajla.
29 Wa xlakata lu kliskujma, xlakata xtamakgtay xlitliwakga nema skujma kkilatamat.
Notas
^ Xagriego: «tiku xasantos».
^ Alakatanu wankan «KinTatakan o KinTikukan».
^ Alakatanu wankan «Puchina».
^ O: «talakgalhaman nema ni kinkalakgchanan». Kaʼakxilhti glosario.
^ Xagriego: «tiku xasantos».
^ O: «talakgalhaman nema ni kinkalakgchanan». Kaʼakxilhti glosario.
^ Xagriego: «tiku xasantos».
^ Max kilhchanima pi wa tiku pulana makgamakglhtinalh latamat nema nila lakgsputa o xapulana tiku malakatsukika.
^ Kaʼakxilhti glosario.
^ Alakatanu wankan «chinchuwa».
^ Kaʼakxilhti glosario.
