Colosenses 2:1-23
2 Xlakata klakaskin kakatsitit pi lu kliskujma xlakata tlan nakakitaxtuniyan wixin chu tiku wilakgolh kLaodicea chu tiku nina kiʼakxilhkgo.*
2 Uma chuna ktlawa xlakata tlan nakamamakgkatsinikan chu xlakata tapaxkit natlawa pi makxtum natawilakgo. Chuna nakgalhikgo tasikulunalin, uma kilhchanima, stalanka chu liwana naʼakgatekgskgo* chu nakgalhikgo xatakgatsin takatsin xpalakata tuku tsekg wi xla Dios, uma kilhchanima, Cristo.
3 Xla makglhtinalh putum liskgalala chu takatsin, putum umakgolh xtachuna tuku lhuwa xtapalh tsekg wilikanit.
4 Kkawaniyan uma xlakata niti nakaliʼakgskgawiyan tachuwin.
5 Maski ni akxtum kkatawilan, kkalakapastakan, chu klipaxuwa akxni kakxilha pi liwana talakkaxwilinitantit chu lipawanatit Cristo xliputum minakujkan.
6 Wa xlakata, chuna la kanajlaninitantit Cristo Jesús kiMalanakan,* milatamatkan chuntiya xliwanat chuna la xlatamat,
7 chuna la katsininitantit, kakamatliwakglhni chuna la kanajlaniyatit Cristo chu tliwakglh katayatit xtachuna kgantum kiwi nema pulhman tijuya, chu nachuna putum kilhtamaku kapaxtikatsinitit Dios.
8 Kuentajkatlawatit xlakata niti nakaliʼakgsiyayan* xliskgalala uma kakilhtamaku chu ni xaxlikana tapuwan nema ni kxtamasiy Cristo takilhtinit, wata kaj xtalismaninkan latamanin chu kaj xalak kakilhtamaku.
9 Pero putum xtayat Dios, Cristo xatakgatsin kgalhi.
10 Wa xlakata, putum kgalhiyatit xlakata xla kamaxkinitan, ama tiku xʼakgxakga mapakgsinanin chu tiku kgalhikgo limapakgsin.
11 Xlakata kanajlaniyatit Cristo, kaʼakstilichukunikantit kxuwa milichixkukan,* pero nichuna la tlawakgo lakchixkuwin, wata nialh tlawayatit xtalakaskin xamakglakgalhina mimaknikan. Chuna kaʼakstilichukunikan kxuwa xlichixkukan kstalaninanin Cristo.
12 Xlakata Dios akxtum kamaknun wixin chu Cristo akxni kamunukantit chuna la xla, chu xlakata tlan talalipinatit akxtum kamalakastakwanikantit wixin chu xla, xlakata kanajlatit tuku kgantaxtulh xpalakata xlitliwakga Dios, tiku malakastakwanilh kxlakgstipankan tiku nikgonita.
13 Nachuna, maski xanin xlitaxtuyatit xlakata mintalakgalhinkan chu xlakata ni xkaʼakstilichukunikanitantit kxuwa milichixkukan,* Dios kamaxkin latamat xlakata akxtum natatawilayatit Cristo. Xliputum xnaku kinkatapatin putum kintalakgalhinkan.
14 Xla malakgsputulh* putum Limapakgsin nema tsokgwilika xlakata xlimasiyaka kintalakgalhinkan. Dios malakgsputulh ama Limapakgsin akxni Cristo nilh kkiwi nema makgapatinan.*
15 Xlakata uma, xla kamakgatlajalh mapakgsinanin chu tiku kgalhikgo limapakgsin, chu kamasiyalh kxlakatin putum latamanin, limasiyalh pi xkamakgatlajanit chu kachililh xtachuna tachin.
16 Wa xlakata, niti kakalakputsananin xpalakata tuku wayatit o tuku likgotnanatit o komo tlawayatit akgtum paskua nema tlawakan akgatunu kata o komo namakgtlawayatit paskua kxaskgata papaʼ o xlakata akgtum Sábado.
17 Umakgolh kaj xmastilenkg tuku aku xʼama min, pero xaxlikana makni wa Cristo.
18 Kuentajkakatlawakantit xpalakata tiku taktujukgo kaj xlakata nakaʼakxilhkgo lakchixkuwin chu tiku kakninanikgo ángeles,* xlakata max natlawakgo pi ni namakglhtinanatit tatlaja. Xlakan akstu kamalankikan kaj xlakata tuku akxilhkgo* chu litlankajwanankgo talakapastakni nema nitu litaxtu.
19 Tiku chuna likatsikgo ni stalanimakgo Akgxakga, uma kilhchanima, ama tiku maxki putum makni tuku maklakaskin chu tlawa pi putum tuku litakgatsi makxtum natawilakgo. Xla chuntiya mastakama xmakni chuna la lakaskin Dios.
20 Wixin akxtum tanitit Cristo chu lakgmakgantit xtalakapastakni kakilhtamaku. Komo chuna, ¿tuku xlakata chuntiya lapatit xtachuna la makgtapakgsiyatitku kkakilhtamaku? ¿Chu tuku xlakata chuntiya kgalhakgaxpatatit umakgolh limapakgsin
21 «ni kamaklakaskinti, ni kakgalhwananti, nitu kaxama»?
22 Umakgolh limapakgsin lichuwinankgo tuku lakgsputkgo akxni kamaklakaskinkan. Umakgolh limapakgsin wa xtamasiykan lakchixkuwin.
23 Tasiya pi umakgolh limapakgsin mastakgo liskgalala, pero ni kamakgtaya latamanin nalakgmakgankgo tuku tlawaputunkgo xalakgalhina xmaknikan. Uma chuna kitaxtu xlakata latamanin xʼakstukan laksakkgo chuna la nakakninanikgo Dios, xlakan kaj limasiyakgo pi taktujukgo chu makgapatikgo xmaknikan.
Notas
^ Xagriego: «tiku nina kilakaʼakxilhkgo».
^ Alakatanu wankan «natamakgachakgxi».
^ Alakatanu wankan «kimPuchinakan».
^ O: «niti xtachin nalitaxtuniyatit».
^ Kaʼakxilhti glosario.
^ Kaʼakxilhti glosario.
^ O: «xapalh».
^ Kaʼakxilhti glosario.
^ O: «chuna la mastakgo kakni ángeles».
^ Unu Pablo limaklakaskilh akgtum tachuwin nema kilhchanima xtalismaninkan tiku ni kakninanikgo Dios chu makgtanu talismanin xatakanajla nema niti katsi.
