Efesios 1:1-23
1 Akit, Pablo, chatum xʼapóstol Cristo Jesús xlakata xtalakaskin Dios, kkatsokgnaniman wixin xasantos natalan tiku wilatit kʼÉfeso chu ni makgxtakgatit Cristo Jesús:
2 KinTlatkan* Dios chu Malana* Jesucristo kakamaxkin talakgalhaman nema ni anan xtachuna* chu takaksni.
3 Kamalankika xDios chu xTlat kiMalanakan Jesucristo, xlakata kʼakgapun kinkalisikulunatlawanitan putum tasikulunalin nema masta espíritu santo xlakata akxtum tawilaw Cristo,
4 xlakata xla kinkalaksakni akxtum natatawilayaw Cristo akxni nina xmakilhtsukikan kakilhtamaku, xlakata xasantos chu ni xataxkajwani xlitaxtuw kxlakatin Dios xlakata paxkiyaw.
5 Xlakata Dios alipulana lakkaxwililh pi xkamanan xlitaxtuw kaj xpalakata Jesucristo, chuna la xla lakgatilh chu chuna la lakaskilh.
6 Uma chuna kitaxtunit xlakata latamanin namalankikgo Dios xlakata limaklakaskilh xKgawasa tiku lu paxki xlakata nakinkalimasiyaniyan xtalakgalhaman nema ni anan xtachuna.*
7 Xpalakata xKgawasa kgalhiyaw lakgtaxtut xlakata lixokgonalh xkgalhni, chuna, kinkatapatikanan kintalakgalhinkan, xlakata putum tuku tlan kitaxtu xpalakata xtalakgalhaman nema ni anan xtachuna.*
8 Dios kinkamaxkin lhuwa talakgalhaman nema ni anan xtachuna* chu nachuna liskgalala chu taʼakgatekgsni,*
9 akxni kinkamakatsinin tuku tsekg xwilinit xpalakata xtalakaskin. Uma tuku tsekg xwilinit xʼakstu lakkaxwililh chu chuna lakgatilh.
10 Xlakata nalakkaxwili la* nakuentajtlawakan tuku anan chu uma chuna nala akxni natakgatsi kilhtamaku nema laklhkawilinit, namamakxtumi putum tuku anan kxlakatin Cristo, tuku anan kʼakgapun chu tuku anan kkatiyatni. Chuna, kxlakatin Cristo
11 tiku akxtum ktawilaw. Dios kinkalaksakni xlakata nakmakglhtinanaw tuku xla kinkamalaknunin, alipulana xkinkalaksaknitan chuna la xlakkaxwilinita tiku makgantaxti putum tuku lakpuwanit natlawa chuna la wi xtalakaskin,
12 xlakata akinin tiku pulana kkanajlaniw Cristo xakliskujwi xlakata nakmaxkiyaw kakni chu nakmalankiyaw Dios.
13 Pero wixin na kanajlanitit akxni kgaxpattit xaxlikana, wa xatlan tamakatsinin nema lichuwinan pi Dios kalakgmaxtuman. Akxni wixin xkanajlanitantita, limaklakaskilh espíritu santo nema xmalaknunit xlakata nakawiliniyan sello. Xla limaklakaskilh Cristo xlakata chuna natlawa.
14 Espíritu santo xtachuna akgtum tamalaknun* nema masiya pi namakglhtinanaw tuku Dios kinkamalaknunin. Dios chuna tlawalh xlakata naxokgo chu nalakgmaxtu xkachikin, uma natlawa pi nalimaxkikan lhuwa kakni.
15 Wa xlakata, lata akxni kkgaxmatli pi kgalhiniyatit takanajla Malana Jesús chuna la kalimasiyaniyatit tapaxkit putum tiku xasantos,
16 ni klimakgxtakga chuna la kpaxtikatsini Dios mimpalakatakan. Chu chuntiya ktlawa oración mimpalakatakan,
17 xlakata Dios, Tlat tiku kgalhi putum lilanka, xDios kiMalanakan Jesucristo, kakamaxkin litliwakga xlakata lakgskgalalan nawanatit chu naʼakgatekgsatit* tuku makatsininan, chu liwana nalakgapasatit.
18 Dios malakki minakujkan xlakata tlan naʼakxilhatit chu nalakgapasatit takgalhkgalhin nema kamaxkiyan, chu tuku xatlan nema ni anan xtachuna, nema xla kamalaknuninit tiku xasantos,
19 chu xlakata nalakgapasatit lhuwa xlitliwakga nema kinkamasiyaninitan akinin tiku kanajlanin. Litasiyanit xpalakata taskujut nema xla tlawanit kaj xlakata lhuwa xlitliwakga,
20 nema limasiyalh akxni malakastakwanilh Cristo kkalinin chu wililh kxpakgastakat* anta kʼakgapun,
21 tlakg talhman wililh nixawa putum mapakgsinanin chu puxkunanin chu tiku kgalhikgo litliwakga chu pulalinanin, chu putum tukuwani, ni kajwatiya kʼuma kakilhtamaku* nachuna kkakilhtamaku nema aku mima.
22 Xla na wililh putum tuku anan kxtampin xtantun chu xʼakgxakga tlawalh putum tuku anan kcongregación,
23 nema xmakni litaxtu chu xla kamaxki xlakskujnin putum tuku maklakaskinkgo.
Notas
^ Alakatanu wankan «KinTatakan o KinTikukan».
^ Alakatanu wankan «Puchina».
^ O: «talakgalhaman nema ni kinkalakgchanan». Kaʼakxilhti glosario.
^ O: «talakgalhaman nema ni kinkalakgchanan». Kaʼakxilhti glosario.
^ O: «talakgalhaman nema ni kinkalakgchanan». Kaʼakxilhti glosario.
^ O: «talakgalhaman nema ni kinkalakgchanan». Kaʼakxilhti glosario.
^ O: «liwana nalakapastaknanaw».
^ Alakatanu wankan «chi».
^ O: «xapulana taskgaw».
^ Alakatanu wankan «namakgachakgxiyatit».
^ Alakatanu wankan «kxpakgkana».
^ Kaʼakxilhti glosario.
