Filipenses 4:1-23
4 Wa xlakata, natalan tiku lu kkapaxkiyan chu lu kkaʼakxilhputunan, wixin kintapaxuwan chu kintatlaja,* chuna la aku kkawanin, tliwakglh katawilatit chuna la kstalaninanin Malana.*
2 Kkastakyawa Evodia chu Síntique pi watiya talakapastakni kakgalhikgolh akxni skujnanikgo Malana.
3 Chuna, na kskiniyan wix tiku xliputum minaku kintaskuja, chuntiya kakamakgtaya umakgolh lakpuskatin tiku palha kintaskujkgolh chuna la xmatlanikgo chu akxtum kintalichuwinankgolh xatlan tamakatsinin, nachuna Clemente chu amakgapitsin kintaskujnin, tiku xtukuwanikan wi klibro xla latamat.
4 Putum kilhtamaku kalipaxuwatit chuna la skujnanipatit Malana. Amakgtum kkawaniparayan: «Kalipaxuwatit».
5 Putum latamanin kakatsikgolh pi tlan talakapastakni kgalhiyatit.* Malana lakatsu wi.
6 Nitu kalilakgaputsatit, wata putum kilhtamaku kamakatsinitit Dios mintalakgaputsitkan, chu katasaskinitit xliputum minakujkan chu kapaxtikatsinitit akxni tlawaniyatit oración;
7 chu Dios nakamaxkiyan takaksni nema latamanin nila akgatekgskgo,* chuna, xpalakata Jesucristo xla nakuentajtlawa minakujkan chu mintapuwankan.*
8 Xaʼawatiya, natalan, chuntiya kalilakpuwantit putum tuku xaxlikana, putum tuku xlakaskinka,* putum tuku xaʼakgstitum, putum tuku skulunku, putum tuku tlawa pi latamanin napaxkinankgo, putum tuku maxkikan kakni, putum tuku xatlan, chu putum tuku lakgchan pi latamanin namalankikgo.*
9 Tuku katsinitit chu makgamakglhtinantit kimpalakata chu tuku kgaxpattit pi klichuwinalh chu tuku akxilhtit pi ktlawalh, katlawatit umakgolh, chu Dios tiku kgalhi chu masta takaksni, nakasikulunatlawayan.
10 Xlakata kskujni Malana akit, klipaxuwa xlakata amakgtum kililakgaputsayatit. Xkilakapastakatit, pero ni xtekgsnitantit la* nakimakgtayayatit.
11 Ni kwan uma xlakata wi tuku kintsankganima, xlakata kkatsininit naklipaxuwa tuku kkgalhi maski tanu tanu tuku ktitaxtuma.
12 Kkatsininit naklatama komo lhuwa o ni lhuwa tuku nakkgalhi. Kkatsininit tuku ni lhuwa latamanin katsikgo: naklipaxuwa maski tanu tanu tuku ktitaxtuma, komo kkgalhi tuku nakwa o ktsinksa, komo lhuwa tuku kkgalhi o ni.
13 Putum tlan ktlawa xlakata Dios* kimaxki litliwakga.
14 Pero wixin tlawatit tuku tlan akxni kimakgtayatit kkintalakgaputsit.
15 Natalan xalak Filipos, wixin katsiyatit pi akxni xlimakgtumku katsinitit xatlan tamakatsinin, akxni ktaxtucha kMacedonia, ni analh congregación nema xkimakgtayalh chu xmakglhtinalh kintamakgtay, kajwatiya wixin;
16 xlakata akxni xakwilachaku kTesalónica, wixin malakgachatit tamakgtay xlakata tuku xakmaklakaskima chu makgtiy chuna tlawatit.
17 Ni kputsama pi kakimaxkika tamaskiwin,* pero klakaskin katlawatit tuku tlan xlakata wixin tlakg nalitamakgtayayatit.
18 Pero kkgalhi tuku kmaklakaskin chu liwaka. Nitu kintsankgani xlakata Epafrodito kiliminilh tuku wixin malakgachatit, uma litaxtu akgtum tamakamastan nema tlan, muksun chu makgapaxuwa Dios.
19 Wa xlakata, kiDios tiku lhuwa tuku kgalhi, nalimaklakaskin Cristo Jesús xlakata nakamaxkiyan putum tuku maklakaskinatit.
20 Chu uku, Dios kinTlatkan* kamaxkika kakni putum kilhtamaku. Chuna kalalh.
21 Kakamaxkitit kintamakgachipat putum xasantos tiku kstalaninanin Cristo Jesús. Natalan tiku akxtum kintawilakgolh kamalakgachanikgoyan xtamakgachipatkan.
22 Putum natalan,* pero liwaka tiku wilakgolh kxpumapakgsin César, kamalakgachanikgoyan xtamakgachipatkan.
23 Kakgalhitit xtalakgalhaman Malana Jesucristo nema ni anan xtachuna* xlakata kgalhiyatit xatlan talakapastakni.
Notas
^ Xagriego: «kincorona».
^ Alakatanu wankan «Puchina».
^ O: «kakalimasiyanitit pi ni xalaktsakat wixin».
^ Alakatanu wankan «tamakgachakgxi».
^ O: «mintalakapastaknikan».
^ O: «tuku xlilat».
^ O: «tuku makgapaxuwa Dios».
^ Alakatanu wankan «chi».
^ Xagriego: «ama tiku».
^ Alakatanu wankan «tatain o talakgalhaman».
^ Alakatanu wankan «kinTatakan o kinTikukan».
^ Xagriego: «tiku xasantos».
^ O: «talakgalhaman nema ni kinkalakgchanan». Kaʼakxilhti glosario.
