Hebreos 1:1-14
1 Makgasata, Dios makglhuwa kalimaklakaskilh palakachuwinanin xlakata xkatachuwinalh xalakgmakgan kinatlatnikan* chu tipalhuwa chuna la tlawalh.
2 La uku,* ksputat kilhtamaku, xla limaklakaskilh xKgawasa xlakata nakinkatachuwinanan, wa tiku laksakli xlakata namakglhtinan putum tuku anan, chu limaklakaskilh xlakata natlawa tuku anan kkatiyatni chu kʼakgapun.*
3 Wa xKgawasa tiku litasiya xlilanka Dios chu wa tiku liwana limasiya xtayat Dios chu tlawa pi makxtum natawila putum tuku anan xpalakata xtachuwin xlitliwakga Dios.* Chu akxni xkinkamaskulunkinitana xlakata kintalakgalhinkan, tawilalh kxpakgastakat Dios kʼakgapun.
4 Wa xlakata tlakg xlakaskinka litaxtulh nichuna la ángeles chu makglhtinanit akgtum tlakg xatlan tukuwani nixawa xtukuwanikan.
5 Akgtum liʼakxilhtit, Dios niti atanu ángel waninit: «Wix kinkgawasa; uku akit mintlat klitaxtu». Chu amakgtum: «Akit naklitaxtu xtlat, chu xla kinkgawasa nalitaxtu».
6 Pero akxni malakgachapara xaPuxku xkgawasa kkatiyatni, wan: «Chu putum xʼángeles Dios wa kamaxkikgolh kakni».*
7 Nachuna, xla wan xlakata ángeles: «Xla lu lakgtliwakga katlawa xʼángeles, chu xlakskujnin xtachuna la lhkuyat».
8 Pero xlakata xaKgawasa, xla wan: «Dios wa tiku maxkiyan limapakgsin* xlakata namapakgsinana putum kilhtamaku, chu lixtokgo nema nalimapakgsinana, wa akgtum limapakgsin nema xaʼakgstitum.
9 Paxki tuku xaʼakgstitum chu lakgmakganti tuku xalixkajni. Wa xlakata Dios, miDios, laksakni la* Mapakgsina akxni akmawakan aceite chu tlakg maxkin tapaxuwan nixawa amakgapitsin mapakgsinanin».
10 Chu: «Lata makgasata,* Malana,* wix makilhtsuki katiyatni, chu akgapun wa xtaskujut mimakan.
11 Katiyatni chu akgapun nalakgsputkgo, pero wix putum kilhtamaku natawilaya; xtachuna la lhakgat, katiyatni chu akgapun putum uma nalakgwankgo,
12 chu nakalakgkgapsa chuna la lhakgat, xtachuna la akxni wi tiku lakgpali klhakgat, chuna nakalakgpalikan. Pero wix nikxni talakgpaliya, chu putum kilhtamaku nalatapaya».
13 Pero Dios nikxni wanilh atanu ángel: «Katawila kkimpakgastakat* asta akxni nakkawili mintalatlawananin kxtampin mintantun».
14 ¿Ni putum ángeles espíritu tiku lakskujnanikgo Dios? ¿Ni wa xlakan tiku Dios kalimapakgsi nakamakgtayakgo tiku nalakgtaxtukgo?
Notas
^ Alakatanu wankan «kinatatanikan o kinatikunan».
^ Alakatanu wankan «Chinchuwa».
^ O: «kakilhtamaku». Uma na tlan kilhchani tanu tanu kilhtamaku akxni Dios makgantaxtilh makgapitsi tuku kalakkaxwililh natlawa. Kaʼakxilhti glosario.
^ Max: «Jesús».
^ O: «kalakgtakilhputakgolh».
^ Xagriego: «Dios wa mimpumapakgsin».
^ Alakatanu wankan «chi».
^ Xagriego: «Lata kkilhtsukut».
^ Alakatanu wankan «Puchina».
^ Alakatanu wankan «kkimpakgkana».
