Hechos 11:1-30
11 Ama kilhtamaku, apóstoles chu natalan* tiku xwilakgolh kJudea kgaxmatkgolh pi tiku ni judíos na xmakglhtinankgonit xtachuwin Dios.
2 Wa xlakata, akxni Pedro alh kJerusalén, tiku tatayakgo naʼakstilichukunikan kxuwa xlichixku* chatum lataman nitlan tsukukgolh lichuwinankgo,*
3 xwanikgo: «Tanu kxchikkan lakchixkuwin tiku ni kaʼakstilichukunikanit kxuwa xlichixkukan* chu akxtum katawayanti».
4 Alistalh Pedro liwana kalitachuwinalh tuku xlanit, kawanilh:
5 «Akit xakwi kkachikin Jope, xaktlawama oración, chu kakxilhli akgtum tamalakawanin: wi tuku* xtaktamachi xtachuna la lanka sábana xalino kʼakgapun, xlimaktimakanchi kxchastutati anta niku akit xakwi.
6 Liwana kakxilhli tuku xwi anta, chu kakxilhli tipalhuwa animales nema xkgalhikgo kgantati xtantunkan xalak katiyatni, lakluku animales chu luwa chu sluluk chu tsiktsi* xalak akgapun.
7 Na kkgaxmatli tachuwin nema xkiwanima: “¡Kataya Pedro, kamakgni tantum animal chu kawat!”.
8 Pero kwa: “Nipara tsinu chuna ktitlawalh, Malana, xlakata nikxni kkilhtanunit tuku xalixkajni chu tuku limapakgsin wan pi ni xaskulunku”.
9 Chu xlimakgtiy, tachuwin xalak akgapun kgalhtinalh: “Nialh kawanti pi xalixkajni tuku Dios kamaskulunkinit”.
10 Chu xlimakgtutu chuna lapa chu putum limparaka kʼakgapun.
11 Nachuna, lu akxni ama kilhtamaku, kgalhtutu lakchixkuwin anta xyakgolh kxkilhtin chiki niku xakmakgtawilamaw, chu kCesarea xkamalakgachakanitancha xlakata nakilakgminkgo.
12 Alistalh, espíritu kiwanilh pi xakkataʼalh chu nitu xakpuwa. Pero umakgolh kgalhchaxan natalan na kintaʼankgolh chu ktanuw kxchik Cornelio.
13 »Xla kinkawanin pi xʼakxilhnit chatum ángel xya kxchik chu xwaninit: “Kakamalakgacha lakchixkuwin kJope chu kamatasaninanti Simón tiku limapakuwikan Pedro,
14 chu xla nawaniyan tuku nalilakgtaxtuya wix chu putum tiku xalak minchik”.
15 Pero akxni ktsukulh chuwinan, na kalakgtaktalh espíritu santo anta niku xwilakgolh chuna la xkinkalakgtaktanitan xapulana.
16 Ama kilhtamaku, klakapastakli tuku Malana xwan: “Juan limununalh chuchut, pero wixin nakalimunukanatit espíritu santo”.
17 Wa xlakata, komo Dios kamaxkilh ama tamaskiwin nema kaj xachunata nema na kinkamaxkin akinin, tiku kanajlaninitaw Malana Jesucristo, ¿tiku xaklitaxtu akit xlakata naklakgapaxtokga Dios?».
18 Akxni kgaxmatkgolh putum uma, nialhtu wankgolh, malankikgolh Dios chu wankgolh: «¡Liwana tasiya pi Dios na kamaxkinit talakaskin tiku ni judíos namakgxtakgkgo xtalakgalhinkan xlakata nakgalhikgo latamat!».
19 Ama kilhtamaku, akxni makgnika Esteban na tsukuka kamakgapatinankan tamakgalhtawakgen chu ama tiku kamakgawanika ankgolh asta kFenicia, kChipre, chu kʼAntioquía, pero kajwatiya xkalitachuwinankgo xatlan tamakatsinin tiku judíos xwankgonit.
20 Pero, makgapitsi lakchixkuwin tiku xalak Chipre chu xalak Cirene minkgolh kʼAntioquía chu tsukukgolh katachuwinankgo tiku xchuwinankgo griego, xkalitachuwinamakgolh xatlan tamakatsinin xlakata Malana Jesús.
21 Nachuna, xlakan xkgalhikgo xtamakgtay Jehová, chu lhuwa latamanin kanajlakgolh chu stalanikgolh Malana.
22 Chu tiku xalak congregación nema wi kJerusalén, kgaxmatkgolh uma tamakatsin chu xlakan malakgachakgolh Bernabé kʼAntioquía.
23 Akxni xla chalh chu akxilhli xtalakgalhaman Dios nema ni anan xtachuna,* paxuwalh chu tsukulh kamakgpuwantini xputumkan pi chuntiya xkgalhakgaxmatnikgolh Malana xliputum xnakujkan;
24 xlakata Bernabé tlan xlikatsi chu xlitsama espíritu santo chu tliwakga xkgalhi xtakanajla. Chu lhuwa latamanin kanajlanikgolh Malana.
25 Wa xlakata xla alh kTarso xlakata xputsalh Saulo asta xtekgsli.
26 Akxni tekgsli, lilh kʼAntioquía. Wa xlakata akgtum kata katatamakxtumikgolh congregación chu kamasiyanikgolh lhuwa latamanin, chu anta kʼAntioquía niku tamakgalhtawakgen xapulana kalimapakuwika «cristianos», xlakata chuna kamakatsinilh Dios.
27 Ama kilhtamaku, makgapitsi palakachuwinanin minkgocha kJerusalén chu ankgolh kʼAntioquía.
28 Chatum tiku xwanikan Ágabo, tayalh chu xlakata xtamakgtay espíritu santo wa pi kxlikalanka katiyatni xʼama anan akgtum lanka tatsinkstat, chu uma chuna lalh kxkilhtamaku Claudio.
29 Wa xlakata tamakgalhtawakgen lakpuwankgolh nakamalakgachanikgo tamakgtay natalan xalak Judea, xchatunukan makgtayanankgolh chuna la xmatlanikgo;
30 chu chuna tlawakgolh, kamalakgachakgolh Bernabé chu Saulo xlakata xkamakamaxkikgolh lakgkgolotsin.
Notas
^ Alakatanu wankan «natakamanan».
^ Kaʼakxilhti glosario.
^ O: «talatlawakgo».
^ Kaʼakxilhti glosario.
^ Xagriego: «akgtum tuku tlan pumujunankan».
^ Alakatanu wankan «spitu».
^ O: «talakgalhaman nema ni kinkalakgchanan». Kaʼakxilhti glosario.
