Hechos 12:1-25
12 Ama kilhtamaku, mapakgsina Herodes tsukulh katlawani tuku nitlan makgapitsi tiku xalak congregación.
2 Limakgnilh espada Santiago, xtala* Juan.
3 Akxni akxilhli pi judíos lakgatikgolh uma, na chipalh Pedro. (Uma chuna lalh kfiesta xla Kaxtalanchu nema ni kgalhi Limaxkutin).
4 Chipalh chu tamaknulh kpulachin, chu tlawalh pi kgamputati soldados xkuentajtlawakgolh. Kgamputunu kgalhtati soldados xwankgonit. Xlakata xlakpuwanit namaxtu* kxlakatin kachikin akxni xtitaxtunita Pascua.
5 Wa xlakata, Pedro xtamaknukanit kpulachin, pero xalak congregación lu lhuwa xtlawanimakgolh oración Dios xpalakata.
6 Akxni Herodes xʼamaja maxtu, ama katsisni Pedro klhtatama chu xlichikanit kgantiy cadenas chu kxpaxtunin xyakgolh soldados, chu kuentajtlawananin anta xyakgolh kmalakcha* xlakata kskgalamakgolh pulachin.
7 Pero ¡kaʼakxilhti!, xʼángel Jehová anta xya, chu akgtum makgskgot makaxkgakgenalh kxpulakni pulachin. Tokglhli Pedro kxtapan, mastakwanilh chu wa: «¡Tunkun kataki!». Chu cadenas makataktakgolh.
8 Ángel wanilh: «Kalhakgananti* chu kawili mintatunu». Chuna tlawalh. Xaʼawatiya wanilh: «Kawili xlimaktiy milhakgat chu kakistalani».
9 Chu xla taxtulh chu kstalanitilha, pero ni xkatsi komo xaxlikana xwanit tuku xtlawama ángel. Chuna, xlakpuwan pi kaj xmalakawanimaka.
10 Titaxtukgolh niku xtawilakgo kgamputum kuentajtlawananin, chu kxlikgamputiy, chankgolh kmalakcha xla likan nema linan kkachikin, chu uma xʼakstu talakkilh. Akxni taxtukgolh, kaj tsinu akxtum tlawankgolh ktiji, chu ángel kaj xalan nialh tasiyanilh.
11 Chu Pedro, akxni katsilh tuku xlanit, wa: «Uku liwana kkatsi pi Jehová malakgachalh xʼángel chu kilakgmaxtulh kxmakan Herodes chu xliputum tuku judíos xkgalhkgalhimakgolh pi xlalh».
12 Akxni katsilh uma, alh kxchik María, xtse Juan tiku na xlimapakuwikan Marcos, niku xtamakxtumikgonit lhuwa tamakgalhtawakgen chu xtlawamakgo oración.
13 Akxni lakgatlakgli malakcha niku laktanukan, chatum skitiwina tiku xwanikan Rode milh akxilha tiku xlakgatlakgma.
14 Akxni kgalhlakgapasli pi wa Pedro, kaj xlakata lhuwa paxuwalh ni malakkilh malakcha, wata tokgosun* alh makatsininan pi Pedro xya kmalakcha.
15 Xlakan wanikgolh: «Akgwitinita». Pero xla chuntiya xkawanima pi xlikana. Xlakan tsukukgolh wankgo: «Chatum ángel».*
16 Pero Pedro antiya xya, chuntiya xlakgatlakgma. Akxni malakkikgolh malakcha, akxilhkgolh, chu kaks lilakawankgolh.
17 Pero xla kalimakawanilh xmakan xlakata ni xchuwinankgolh, chu liwana kalitachuwinalh chuna la Jehová xmaxtunit kpulachin, chu wa: «Kawanitit putum uma Santiago chu natalan». Alistalh, taxtulh chu alh alakatanu.
18 Ama kilhtamaku, akxni xkgakgalh, soldados lu lhpipakg xlilakawankgonit xlakata ni xkatsikgo tuku xakgspulanit Pedro.
19 Herodes liwana putsalh chu xlakata ni tekgsli, kamakgalhapalilh kuentajtlawananin chu limapakgsinalh pi xkamalakgaxokgeka; chu mincha kJudea chu alh kCesarea chu ni lhuwa kilhtamaku anta tamakgxtakgli.
20 Chu xla lu xkasitsinikgonit* tiku xalak Tiro chu xalak Sidón. Wa xlakata xlakan wi tuku lilakgminkgolh, chu akxni xtachuwinankgonita Blasto tiku xmakuentajlikanit putum tuku xalak xchik mapakgsina,* skinkgolh pi tlan xtalalimparakgolh mapakgsina. Xlakata tiku xalak xpaiskan anta xkitiyakgo liwat kxpaís mapakgsina.
21 Akgtum kilhtamaku nema xtalaklhkawilinit, Herodes wililh klhakgat nema xwilikgo mapakgsinanin chu tawilalh niku lakputsanankan chu tsukulh kamaxki akgtum taʼakgchuwin latamanin.
22 Alistalh, latamanin tiku anta xyakgolh tsukukgolh pixlanka* wankgo: «¡Xtachuwin chatum dios chu ni xla chatum chixku!».
23 Chu tunkun, xʼángel Jehová masipanilh,* xlakata ni wa malankilh Dios, chu laktsu luwa wakgolh, chu nilh.
24 Pero xtachuwin Jehová chuntiya talakgatumilh chu tlakg lhuwa latamanin kanajlakgolh.
25 Pero akxni Bernabé chu Saulo, xliputum xmastakgonita tamakgtay anta kJerusalén, taspitkgolh chu na linkgolh Juan, tiku na xlimapakuwikan Marcos.
Notas
^ Alakatanu wankan «xtakam».
^ O: «nalakputsanani».
^ Alakatanu wankan «kpuwilhta».
^ O: «Katatampulakgchi».
^ Alakatanu wankan «tatsalh».
^ Xagriego: «xʼángel».
^ O: «xʼama katalachipa».
^ Xagriego: «niku klhtata mapakgsina».
^ Alakatanu wankan «akglhman».
^ Alakatanu wankan «matakgawilh».
