Hechos 14:1-28
14 Chu kʼIconio Pablo chu Bernabé akxtum tanukgolh ksinagogajkan* judíos chu xlakata la chuwinankgolh lhuwa latamanin kanajlakgolh, judíos chu griegos.
2 Pero judíos tiku ni kanajlakgolh tlawakgolh pi latamanin xalak atanu kachikinin lu xkasitsinikgolh natalan.
3 Chu xlakata Jehová kalimapakgsilh, akglhuwa semanas ni pekuankgolh akxni lichuwinankgolh xtalakgalhaman nema ni anan xtachuna,* chu kamaxkilh talakaskin natlawakgo milagros chu tuku kaks malakawaninan.
4 Pero lhuwa latamanin xalak kachikin xtapitsikgonit; makgapitsi xkatatayakgo judíos, pero amakgapitsi xkatatayakgo apóstoles.
5 Akxni latamanin xalak atanu kachikinin, nachuna judíos chu xmapakgsinanin xʼamakgolh kamamaxanikgo chu xʼamakgolh kaʼaktalakgo,
6 xlakan kamakatsinika uma, chu tsalakgolh kListra chu kDerbe, kachikinin nema xtapakgsinikgo Licaonia, chu klaktsu kachikinin nema lakatsu xwilakgolh.
7 Chu anta chuntiya xlichuwinamakgolh xatlan tamakatsinin.
8 Ama kilhtamaku, kListra xlama chatum chixku tiku kaj xwi xlakata nila xtlawan. Xla nikxni xtlawanit lata lakachilh.
9 Uma chixku xkgaxmatma akxni Pablo xchuwinama. Pablo kaks lakaʼakxilhli, chu akxni akxilhli pi xkgalhi takanajla xlakata natatlani,
10 pixlanka* wanilh: «Kataya». Wa xlakata chixku tunkun tayalh chu tsukulh tlawan.
11 Akxni latamanin akxilhkgolh tuku Pablo tlawalh, pixlanka wankgolh ktachuwin xalak Licaonia: «¡Wa dioses chuna la latamanin litaxtukgonit chu kinkalakgtaktakgonitan!».
12 Wa xlakata Bernabé tsukukgolh limapakuwikgo Zeus, pero Pablo limapakuwikgolh Hermes, xlakata wa tiku pulana xchuwinan.
13 Xtemplo Zeus lakatsu xwi kkachikin, chu ksacerdote Zeus kalimilh toros chu coronas nema xlitlawakgokanit xanat, chu lhuwa latamanin xkatatlawaniputunkgo tamakamastan.
14 Pero akxni apóstoles Bernabé chu Pablo kgaxmatkgolh xlakata uma, xtitkgolh klhakgatkan chu lakapala kalakgankgolh lhuwa latamanin chu pixlanka wankgolh:
15 «Lakchixkuwin, ¿tuku xlakata tlawapatit putum uma? Akinin na latamanin tiku kkgalhiyaw takatsanajwat chuna la wixin. Chu kkalitachuwinaman xatlan tamakatsinin, xlakata namakgxtakgatit putum uma tuku nitu litaxtu, chu nakakninaniyatit xastakna Dios, tiku tlawalh akgapun, katiyatni, pupunu chu putum tuku anta wilakgolh.
16 Kkilhtamaku nema titaxtunita kamaxkilh talakaskin putum kachikinin natlawakgo tuku xlakaskinkgo,
17 pero xla kalimasiyanin chuna la likatsi akxni tlawalh tuku tlan, kamaxkin sen xalak akgapun chu kilhtamaku akxni lu makgalanankan, kalimakgalhkgasan liwat chu kalimatsamanin tapaxuwan minakujkan».
18 Pero maski kawanikgolh putum uma, takgalana kamachokgokgolh latamanin ni nakatlawanikgo tamakamastan.
19 Pero chinkgolh makgapitsi judíos xalak Antioquía chu xalak Iconio chu tlawakgolh pi latamanin xlakatakikgolh Pablo chu aktalamikgolh chu xwataxtukgolh kxkilhtin lanka kachikin xlakata xlakpuwankgo pi xninita.
20 Pero akxni tamakgalhtawakgen makxtum litayakgolh, xla tayalh chu tanulh kkachikin. Lichali, xla chu Bernabé ankgolh kDerbe.
21 Chu akxni xlichuwinankgonita xatlan tamakatsinin kʼama lanka kachikin, chu xkamakgtayakgonita lhuwa latamanin xlakata tamakgalhtawakgen xlitaxtukgolh, taspitparakgolh kListra, kʼIconio chu kʼAntioquía.
22 Anta kamatliwakglhkgolh tamakgalhtawakgen, kamakgpuwantinikgolh chuntiya tliwakga xkgalhikgolh xtakanajlakan chu kawanikgolh: «Talakaskin natitaxtuyaw lhuwa tapatin xlakata natanuyaw kxTamapakgsin Dios».
23 Nachuna, kalaksakkgolh makgapitsi lakchixkuwin xlakata lakgkgolotsin xlitaxtukgolh kʼakgatunu congregación. Xlakan tlawakgolh oración, kgalhxtakgnankgolh chu kamakamaxkikgolh Jehová, tiku xkanajlanikgonit.
24 Alistalh, tipuntaxtukgolh Pisidia chu tanukgocha kPanfilia,
25 chu akxni xlichuwinankgonita xtachuwin Dios kPerga, taktakgolh kʼAtalia.
26 Akxni anta xwilakgolh, tajukgolh kbarco xlakata naʼankgo kʼAntioquía. Wa uma kachikin niku xapulana, natalan skinikgolh Dios pi xkasikulunatlawalh* Pablo chu Bernabé xlakata xtlawakgolh taskujut nema uku putum xmakgantaxtikgonit.
27 Akxni chankgolh chu xmamakxtumikgonita congregación, lichuwinankgolh chuna la Dios kalimaklakaskilh xlakata lhuwa tuku xtlawalh, chu la xmalakkinit malakcha xlakata tiku ni judíos xkanajlakgolh.
28 Wa xlakata makgapitsi kilhtamaku katatamakgxtakgkgolh tamakgalhtawakgen.
Notas
^ Kaʼakxilhti glosario.
^ O: «talakgalhaman nema ni kinkalakgchanan». Kaʼakxilhti glosario.
^ Alakatanu wankan «akglhman».
^ Xagriego: «talakgalhaman nema ni kinkalakgchanan». Kaʼakxilhti glosario.
