Hechos 16:1-40
16 Chalh kDerbe chu nachuna kListra. Chu anta xlama chatum tamakgalhtawakgen tiku xwanikan Timoteo, xkgawasa chatum judía wantiku na tamakgalhtawakgen xwanit, pero xtlat* griego xwanit,
2 chu natalan xalak Listra chu xalak Iconio lu tlan xlichuwinankgo.
3 Pablo wa pi xlimputun Timoteo, chu lilh chu akstilichukunilh kxuwa xlichixku* xpalakatakan judíos xalak amakgolh kachikinin, xlakata xputumkan xkatsikgo pi xtlat griego xwanit.
4 Chuna la xtitaxtutilhakgo kkachikinin, xkamakatsinikgo natalan, xlakata xmakgantaxtikgolh tuku xlakkaxwilikgonit apóstoles chu lakgkgolotsin nema xwilakgolh kJerusalén.
5 Chu wa xlakata congregaciones chuntiya tlakg tatliwakglhkgolh xtakanajlakan chu chali chali talhuwitilhakgolh.
6 Nachuna, tipuntaxtukgolh Frigia chu país xla Galacia, xlakata espíritu santo ni xkamaxkinit talakaskin nalichuwinankgo Dios kkachikin nema tapakgsini Asia.
7 Nachuna, akxni taktakgolh kMisia, lu litsakgsakgolh xlakata natanukgo kBitinia pero xʼespíritu Jesús ni kamaxkilh talakaskin.
8 Wa xlakata, kaj titaxtukgolh kMisia chu taktakgolh kTroas.
9 Chu katsisni Pablo akxilhli kʼakgtum tamalakawanin pi xya chatum chixku xalak Macedonia tiku xtasaskinima chu xwan: «Katitaxtu kMacedonia chu kakilamakgtayaw».
10 Akxni xʼakxilhnita tamalakawanin, kkaw kMacedonia, xlakata klakpuwaw pi Dios xkinkamatasaninanitan xlakata xakkalitachuwinaw xatlan tamakatsinin.
11 Wa xlakata, ktipuntaxtuw pupunu lata kTroas chu tsaj kkaw kSamotracia, pero lichali kNeápolis;
12 chu lata anta kkaw kFilipos, akgtum kachikin xla Roma, nema tlakg xlakaskinka xla ama xtiyat Macedonia. Anta ktamakgxtakgwi makgapitsi kilhtamaku.
13 Chu Sábado ktaxtuw niku ya malakcha nema lakatsu titaxtu kgalhtuchokgo, xaklakpuwanaw pi anta xwi niku tlan tlawakan oración, ktawilaw chu ktsukuw katachuwinanaw lakpuskatin tiku xtamakxtumikgonit.
14 Chu chatum puskat tiku xwanikan Lidia, xalak kachikin Tiatira, ksta xatsutsokgo lhakgat* chu xkakninani Dios, xkgaxmatma, chu Jehová makgtayalh nakgaxmata chu liwana nakuentajtlawani tuku Pablo xkilhwama.
15 Chu akxni munuka chu tiku xalak xchik, xla kinkatasaskinin: «Komo wixin lakpuwanatit pi ni kmakgatsankganani Jehová, katantit* chu katamakgxtakgtit kkinchik». Chu ktaʼaw xlakata chuntiya xkinkawaniman.
16 Chu akxni xakkamaw niku tlawakan oración, kinkatatanokglhni chatum tsumat skitiwina tiku xlaktanuma espíritu, demonio nema xtlawa pi tlan xkatsilh tuku aku xʼama la. Xla xtlawa pi lhuwa tumin xlitlajakgolh xmalananin xlakata xwan tuku aku xʼama la.
17 Uma tsumat chuntiya kstalanitilha Pablo chu akinin chu pixlanka* xwan, xmaklakaskin umakgolh tachuwin: «Umakgolh lakchixkuwin xlakskujnin Dios Tiku xala talhman chu kalitachuwinaman tiji tuku nalilakgtaxtuyatit».
18 Uma tsumat akglhuwa kilhtamaku chuna tlawalh. Pero Pablo nialh kgaxmatputulh, talakgaspitli chu wanilh espíritu: «Kxtukuwani Jesucristo klimapakgsiyan kalaktaxtu uma tsumat». Chu tunkun laktaxtulh.
19 Wa xlakata, akxni xmalananin akxilhkgolh pi nialhla xʼamakgolh litlajakgo, kachipakgolh Pablo chu Silas chu kaxwatalinkgolh kxlakatinkan mapakgsinanin kplaza niku stanankan.
20 Kalinkgolh kxlakatin mapakgsinanin xalak Filipo, chu wankgolh: «Umakgolh lakchixkuwin lu maʼakglhuwinamakgolh kkinkachikinkan. Xlakan judíos,
21 chu lichuwinamakgolh talismanin tuku akinin ni xlilat nakmakglhtinanaw chu naktlawayaw, xlakata akinin xalak Roma».
22 Chu lhuwa latamanin xatasitsi xkatachuwinankgo, chu mapakgsinanin limapakgsinankgolh nakamapuxtukan klhakgatkan, chu alistalh kalimakgsnokgka kiwi.
23 Akxni lhuwata xkamakgsnokgkanit, katamaknuka kpulachin chu limapakgsika xkuentajlina pulachin pi liwana xkakuentajtlawalh xlakata ni xtsalakgolh.
24 Xlakata chuna limapakgsika, xla katamaknulh kpulachin nema tankgenu xwilacha chu kalilakgxkgatnikgolh xtantunkan kgantiy laktsinka kiwi.*
25 Pero max itat tsisni, Pablo chu Silas xtlawamakgolh oración chu xlimalankimakgolh Dios takilhtlin, chu tiku xtanumakgolh kpulachin na xkgaxmatmakgolh.
26 Kaj xalakapala lu tliwakga tachikilh tiyat, wa xlakata talakchikikgolh xatalayaw pulachin. Nachuna, tunkun talakkikgolh putum xmalakcha chu xputumkan taxkutkgolh xcadenaskan.
27 Akxni xkuentajlina pulachin stakwanalh chu akxilhli pi xtalakkikgonit xmalakcha pulachin, xtat maxtulh xʼespada chu xʼakstu xʼamaka makgnikan, xlakata lakpuwa pi xtsalakgonit tachin.
28 Pero Pablo pixlanka wa: «¡Ni katlawanikanti tuku nitlan, kimputumkan unu kwilaw!».
29 Wa xlakata skilh wi tiku xliminilh makgskgot chu lakapala tanulh, chu lu klhpipima xlakata xpekuama, kalakgtatsokgostalh Pablo chu Silas.
30 Kamaxtulh kkilhtin chu wa: «Lakchixkuwin, ¿tuku kilitlawat xlakata naklakgtaxtu?».
31 Xlakan wankgolh: «Kakanajlani Malana Jesús chu nalakgtaxtuya wix chu tiku xalak minchik».
32 Wa xlakata litachuwinankgolh xtachuwin Jehová chu putum tiku xkatawilakgolh kxchik.
33 Xla kalilh ama katsisni chu kachakgenilh niku xkasnokgkanit. Ama kilhtamaku, xla chu putum tiku xalak xchik tunkun kamunuka.
34 Katamaknulh kxchik chu kawilinilh liwat kmesa, chu lu katapaxuwalh putum tiku xalak xchik xlakata uku xkanajlanikgonit Dios.
35 Akxni xkgakgalh, mapakgsinanin xalak Filipo kamalakgachakgolh kuentajtlawananin xlakata nawanikgo xkuentajlina pulachin: «Kakatamakxtu amakgolh lakchixkuwin».
36 Xkuentajlina pulachin wanilh umakgolh tachuwin Pablo: «Mapakgsinanin xalak Filipo malakgachakgonit lakchixkuwin xlakata nakkamakgxtakgan minchatiykan. Wa xlakata kataxtutit chu tlan kapitit».
37 Pero Pablo kawanilh: «Kinkamakgsnokgkan kxlakatinkan latamanin, chu nitu kinkalakputsananimakan, maski akinin ktapakgsiniyaw Roma, chu kinkatamaknukan kpulachin. ¿Chu uku kaj xatsekg kinkamaxtumakan? ¡Ni, ni chuna! Xlakan kaminkgolh chu kakinkalinkgon kkilhtin».
38 Kuentajtlawananin makatsinikgolh uma mapakgsinanin xalak Filipo. Xlakan pekuankgolh akxni katsikgolh pi umakgolh lakchixkuwin xtapakgsikgo kRoma.
39 Wa xlakata minkgolh chu tasaskinikgolh, chu akxni xkalinkgokanita kkilhtin, kaskinika pi xtaxtukgolh kkachikin.
40 Pero xlakan taxtukgolh kpulachin chu ankgolh kxchik Lidia; chu akxni akxilhkgolh natalan, tlan kamamakgkatsinikgolh chu ankgolh.
Notas
^ Alakatanu wankan «xtata o xtiku».
^ Kaʼakxilhti glosario.
^ O: «xatsutsokgo limanin».
^ Alakatanu wankan «katatit».
^ Alakatanu wankan «akglhman».
^ O: «cepo». Kaʼakxilhti glosario.
