Hechos 17:1-34
17 Alistalh tipuntaxtukgolh Anfípolis chu Apolonia chu chankgolh kTesalónica, niku xwi akgtum ksinagogajkan judíos.
2 Wa xlakata, chuna la xlismaninit Pablo tanulh niku xwilakgolh chu akgtutu Sábados kalimaʼakgatekgsnilh Tatsokgni,
3 liwana xlichuwinama chu xlimasiyama Tatsokgni pi xlilat xwanit xpatinalh Cristo chu xtakipa kkalinin, xwan: «Wa uma Cristo, uma Jesús tiku akit kkalitachuwinaman».
4 Xlakata uma, makgapitsi kanajlakgolh chu lakxtum katalakgolh Pablo chu Silas, chu nachuna tlawakgolh lhuwa griegos tiku xkakninanikgo Dios, chu makgapitsi lakpuskatin tiku xlakaskinka xlitaxtukgo.
5 Pero judíos lakgsitsikgolh, wa xlakata kamamakxtumikgolh makgapitsin lakchixkuwin tiku lixkajni xlikatsikgo chu klhkititnawilakgolh kplaza niku stanankan, kamamakxtumikgolh lhuwa latamanin chu tlawakgolh pi kachikin natachilikgo. Taxwakgtanukgolh kxchik Jasón chu xlakaskinkgo pi xkatamakxtuka Pablo chu Silas anta niku xwilakgolh lhuwa latamanin.
6 Xlakata ni katekgskgolh, xwataxtukgolh Jasón chu makgapitsi natalan, kalinkgolh kxlakatin mapakgsinanin xalak kachikin, chu pixlanka* xwankgo: «Umakgolh lakchixkuwin tiku kaniwa niku wilikgonit taʼakglhuwit kkatiyatni na unu wilakgolh,
7 chu Jasón kamakgamakglhtinanit xlakata anta natamakgxtakgkgo kxchik. Putum umakgolh lakatakikgo xlimapakgsin César, chu wankgo pi anan achatum mapakgsina, wa Jesús».
8 Akxni kgaxmatkgolh uma, latamanin chu mapakgsinanin xalak kachikin pekuankgolh;
9 chu akxni Jasón chu natalan xmastakgonita tumin nema xkaskinikanit xlakata tlan xtaxtukgolh, kamakgxtakgka.
10 Tunkun ama katsisni, natalan kamalakgachakgolh Pablo chu Silas kBerea. Akxni chankgolh tanukgolh ksinagogajkan* judíos.
11 Pero xalak Berea tlakg xkatsiniputunkgo nixawa xalak Tesalónica, xlakata nipara tamakgapalikgolh lata xatapaxuwan makglhtinankgolh tachuwin, chu chali chali liwana xlakputsananikgo Tatsokgni xlakata xʼakxilhkgolh komo putum uma chuna xwanit.
12 Wa xlakata, lhuwa kanajlakgolh chu nachuna makgapitsi lakchixkuwin chu lhuwa lakpuskatin xalak Grecia tiku xkamaxkikan kakni.
13 Pero akxni judíos xalak Tesalónica katsikgolh pi Pablo na xlichuwinama xtachuwin Dios kBerea, ankgolh anta xlakata natlawakgo pi latamanin xkasitsinikgolh.
14 Alistalh natalan tunkun malakgachakgolh Pablo asta kpupunu, pero Silas chu Timoteo tamakgxtakgkgolh.
15 Pero tiku xtaʼankgo Pablo linkgolh asta kʼAtenas chu taspitparakgolh akxni kawanika pi Silas chu Timoteo tunkun xlakgminkgolh Pablo.
16 Ama kilhtamaku, akxni Pablo xkakgalhkgalhima kʼAtenas, sitsilh akxni akxilhli pi kachikin xlitsama tatlawamakgxtu.*
17 Wa xlakata, kamakgtayaputulh naʼakgatekgskgo* judíos anta ksinagogajkan chu nachuna latamanin tiku xkakninanikgo Dios, chu chali chali nachuna xtlawa xpalakatakan tiku kaj xtitaxtukgo kplaza niku stanankan.
18 Pero makgapitsi tiku kstalanikgo xtamasiykan epicúreos* chu nachuna estoicos,* tsukukgolh talalakakilhnikgo, chu makgapitsin xkilhwamakgolh: «¿Tuku kinkawaniputunan uma xatonto tiku lhuwa chuwinan?». Chu amakgapitsin: «Takgaxmata pi kalichuwinan atanu dioses nema ni kalakgapasaw». Uma chuna lalh xlakata xla xlichuwinan xatlan tamakatsinin xlakata Jesús chu xlakata talakastakwanat.
19 Wa xlakata chipakgolh chu linkgolh kʼAreópago, chu wankgolh: «¿Tlan nakilawaniyaw tuku uma xasasti tamasiy nema lichuwinampat?
20 Xlakata makgapitsi tuku lichuwinampat nikxni kkgaxmatnitaw, kkatsiputunaw tuku kilhchanima umakgolh».
21 Chuna, putum tiku xalak Atenas chu tiku xalak atanu kachikinin tiku kaj puntsu xtipaxialhnankgo, nitu atanu tuku xtlawakgo akxni xkgalhikgo kilhtamaku kaj xlichuwinankgo chu xkgaxmatkgo tuku xalaksasti.
22 Alistalh Pablo tayalh kxlakʼitat Areópago chu wa:
«Lakchixkuwin xalak Atenas, kakxilha pi putum tuku wixin tlawayatit, limasiyayatit pi tlakg kapekuaniyatit* atanu dioses nixawa amakgapitsin latamanin.
23 Akgtum liʼakxilhtit, akxni xaktitaxtuma chu liwana xakakxilhtilhama tuku kakninaniyatit, ktekgsli akgtum pumakamastan niku xtatsokgnit: “Xpalakata chatum Dios tiku ni Lakgapasaw”. Wa xlakata, akit kkalitachuwinaman ama tuku wixin kakninaniyatit maski ni lakgapasatit.
24 Dios tiku tlawalh kakilhtamaku chu putum tuku anta anan, xlakata xla Malana xalak akgapun chu xalak katiyatni, ni anta tamakgxtakga ktemplos nema xmakan chixku tlawanit;
25 ni maklakaskin pi latamanin naskujnanikgo la* komo wi tuku xkitsankganilh, xlakata xla kamaxki putum latamanin latamat chu tajaxanat chu putum tuku maklakaskinkgo.
26 Chu tlawalh pi kaj chatum chixku xlikilhtsukukgolh putum kachikinin nema xlatamakgolh kxlikalanka katiyatni, chu wilinilh xkilhtamaku putum tuku anan chu laklhkawililh anta niku latamanin lamakgolh,
27 xlakata naputsakgo Dios, komo xmakaputsakgolh chu xlikana xtekgskgolh, xlakata ni lu makgat kinkawilanin kinchatunukan.
28 Kaj xpalakata xla kgalhiyaw latamat chu tatsuwiyaw chu lamaw, chuna la wankgonit makgapitsi mintsokgnaninkan: “Xlakata akinin na xkamanan”.
29 »Wa xlakata, komo akinin xkamanan Dios, ni kililakpuwanatkan pi Dios xtachuna la oro, o plata, o chiwix, xtachuna tuku maklhpitkgonit chu malakatsukikgonit kxtalakapastaknikan lakchixkuwin.
30 Xlikana, analh akgtum kilhtamaku akxni latamanin chuna tlawakgolh xlakata ni xkatsikgo, pero Dios katapatinit, chu uku kawanimakgolh putum latamanin pi kamakgxtakgkgolh xtalakgalhinkan.
31 Xlakata laklhkawilinit akgtum kilhtamaku akxni lakapastaknit xaʼakgstitum nakalakputsanani putum tiku lamakgolh kkatiyatni chu nalimaklakaskin chatum chixku tiku xla laksaknit, xla malakastakwanilh kkalinin uma chixku chu chuna kalimasiyanilh putum lakchixkuwin pi uma kilhtamaku xlikana namin».
32 Akxni xlakan kgaxmatkgolh pi tiku xnikgonita xʼamakgo lakastakwanankgo, makgapitsi tsukukgolh likgalhkgamanankgo, chu amakgapitsi wankgolh: «Nakkakgaxmatniyan xlakata uma atanu kilhtamaku».
33 Wa xlakata Pablo kaʼakgxtakgyawalh,
34 pero makgapitsi lakchixkuwin lakxtum talakgolh chu kanajlakgolh. Makgapitsi wa Dionisio, tiku juez xlitaxtu niku lakkaxtlawakan taʼakglhuwit kʼAreópago, chu chatum puskat tiku wanikan Dámaris, chu nachuna amakgapitsi.
Notas
^ Alakatanu wankan «akglhman».
^ Kaʼakxilhti glosario.
^ Alakatanu wankan «tamakanitlaw».
^ Alakatanu wankan «natamakgachakgxi».
^ Kaʼakxilhti glosario.
^ Kaʼakxilhti glosario.
^ O: «tlakg kanajlanikgoyatit».
^ Alakatanu wankan «chi».
