Hechos 19:1-41
19 Akxni xkgantaxtumakgolh uma, Apolos anta xlamachaku kCorinto, Pablo tipuntaxtulh xtiyat Asia chu chalh kʼÉfeso. Anta katekgsli makgapitsi tamakgalhtawakgen
2 chu kawanilh: «¿Makglhtinantit espíritu santo akxni kanajlatit?». Xlakan kgalhtinankgolh: «¡Nikxni kkgaxmatnitaw xlakata espíritu santo!».
3 Wa xlakata Pablo wa: «Komo chuna, ¿tukuya tamunut makglhtinanitantit?». Wankgolh: «Kinkamunukan chuna la masiyalh Juan».
4 Pablo wa: «Juan kamunulh latamanin xlakata xlitasiyalh pi xmakgxtakgkgonit xtalakgalhinkan, kawanilh latamanin pi xkanajlanikgolh tiku xmima alistalh, wa Jesús».
5 Akxni kgaxmatkgolh uma, tamunukgolh kxtukuwani Malana Jesús.
6 Chu akxni Pablo kaʼakwililh xmakan, makgamakglhtinankgolh espíritu santo, chu tsukukgolh chuwinankgo kʼatanu tachuwin chu tsukukgolh lichuwinankgo tuku Dios makatsininan.
7 Xliputumkan kgalhkutiy lakchixkuwin xwankgonit.
8 Akxni tanulh ksinagoga,* akgtutu papaʼ ni xkilhpekuan akxni xchuwinan, xmasta taʼakgchuwin chu xkamaʼakgatekgsniputun pi xkanajlanikgolh xTamapakgsin Dios.
9 Pero akxni makgapitsi tiku laktsakatni xwankgonit ni kanajlaputunkgolh chu lixkajni xlichuwinamakgolh xTiji Malana kxlakatin lhuwa latamanin, katapanunilh chu alakatanu kalilh tamakgalhtawakgen chu chali chali xmasta taʼakgchuwin kxpukgalhtawakga Tirano.
10 Akgtiy kata chuna tlawalh uma, wa xlakata putum tiku xlamakgolh kxtiyat Asia kgaxmatkgolh xtachuwin Malana, nachuna tiku judíos chu griegos.
11 Chu Dios chuntiya xlimaklakaskima Pablo xlakata xtlawalh tuku kaks malakawaninan chu lu lakgtliwakga,
12 wa xlakata asta laktsu lhakgat chu lakatitawaka nema xtokglhkgonit xmakni Pablo kalinikgoka tatatlanin, chu xtakatsanajwatkan xkatapanuni, chu xalaklixkajni espíritus xkalaktaxtukgo.
13 Pero makgapitsi judíos tiku kaj xlapulakgo xlakata xtamakxtukgo demonios na limaklakaskimputunkgolh xtukuwani Malana Jesús xlakata xkatamakxtunikgolh tiku xkalaktanuma xalaklixkajni espíritus; xlakan xwankgo: «Kkalimapakgsiyan pi kataxtutit kxtukuwani Jesús tiku Pablo lichuwinan».
14 Chu ama kilhtamaku chuna xtlawakgo kgalhtujun xlakgkgawasan xapuxku sacerdote judío, tiku xwanikan Esceva.
15 Pero xalixkajni espíritu kakgalhtilh: «Klakgapasa Jesús chu kkatsi tiku Pablo; pero ¿tiku wixin?».
16 Wa xlakata, ama chixku tiku xlaktanuma xalixkajni espíritu lhkgen kalakgalh chu chatunu chatunu katalachipalh chu kamakgatlajalh, chu tsalataxtukgolh kʼama chiki, xalaklhtantala* chu xkamasipanikanit.*
17 Putum judíos chu griegos tiku xlamakgolh kʼÉfeso katsikgolh uma; chu putum kamakgapekualh, chu xtukuwani Malana Jesús chuntiya malankika.
18 Chu lhuwa tiku kanajlakgolh xminkgo chu xwankgo kxlakatin latamanin xtalakgalhinkan chu xlitayakgo tuku nitlan xtlawakgonit.
19 Chuna, lhuwa tiku skuwananin xwankgonit mastokgkgolh xlibroskan chu kalhkuyukgolh kxlakatinkan putum latamanin. Chu akxni putlekgekgolh chuna la xlilhuwa xtapalh xwanit akxilhkgolh pi tipuxamakaw mil tumin xla plata.
20 Chu xlakata xlimakgatliwakga Jehová, xtachuwin chuntiya talhuwitilhalh chu nila tuku makgatlajalh.
21 Akxni xlakgonita putum uma, Pablo lakpuwa pi akxni xtitaxtunita xwa kMacedonia chu kʼAcaya, na xʼama an kJerusalén. Xla wa: «Akxni kkilanita nawan anta, na kiliʼanat kRoma».
22 Wa xlakata kamalakgachalh kMacedonia chatiy tiku xmakgtayananin, Timoteo chu Erasto, pero Pablo tamakgxtakgcha makgapitsi kilhtamaku kxtiyat Asia.
23 Ama kilhtamaku lakatsukulh lanka taʼakglhuwit xpalakata xTiji Malana.
24 Xlakata chatum chixku xwanikan Demetrio, tiku xliskuja plata. Xla xtlawa laktsu templos xla plata nema xtasiya xtachuna la xtemplo diosa Ártemis,* xtlawa pi tiku na watiya taskujut xkgalhikgo xlitlajakgolh lhuwa tumin.
25 Xla kamamakxtumilh tiku xkataskuja chu amakgapitsi tiku na watiya tuku xliskujkgo chu wa: «Lakchixkuwin, liwana katsiyatit pi wa uma taskujut tuku litlajayaw lhuwa tumin.
26 Wa xlakata kaʼakxilhtit, chu kakgaxpattit pi ni kajwatiya kʼÉfeso, wata atsinu ni putum kxtiyat Asia, uma Pablo tlawama pi lhuwa latamanin atanu tuku kakanajlakgolh akxni kawani pi ni xaxlikana dioses ama nema kaj makanitlawakgokanit.
27 Nachuna, kpekuan pi latamanin nitlan natsukukgo lichuwinankgo tuku liskujaw. Kidiosajkan Ártemis lhuwa kakni kgalhi pero max latamanin nialhtu katiliʼakxilhkgolh xtemplo. Nachuna putum kʼAsia chu kkakilhtamaku maxkikgo kakni Ártemis pero kaj xpalakata tuku wan Pablo nialh katimaxkika kakni».
28 Akxni kgaxmatkgolh putum uma, lakchixkuwin lu sitsikgolh, chu tsukukgolh pixlanka* wankgo: «¡Lanka litaxtu diosa Ártemis xalak Éfeso!».
29 Wa xlakata kachikin lu tsukukgolh taʼakglhuwikgo chu makxtum kgostanukgocha kpulakgastan niku ni taʼakgstichuwanit, xwatalinkgolh Gayo chu Aristarco tiku xalak Macedonia xwankgonit chu akxtum xtalapulakgo Pablo.
30 Chu Pablo xkalakgtanuputun niku xwilakgolh latamanin, pero tamakgalhtawakgen ni xmaxkikgo talakaskin.
31 Chu asta makgapitsi tiku xlakkaxwilikgo fiestas chu takgaman tiku tlan xlikatsinikgo, malakgachanikgolh tamakatsin pi ni xtanulh kpulakgastan niku ni taʼakgstichuwanit xlakata ni kalipekua xwililh xlatamat.
32 Ama kilhtamaku, makgapitsi wi tuku pixlanka xkilhwamakgolh chu amakgapitsi atanu tuku xwankgo; xlakata latamanin xtachilimakgo chu atsinu ni putum ni xkatsikgo tuku xlakata xlitamakxtumikgonit.
33 Wa xlakata tamakxtukgolh Alejandro kxlakgstipankan lhuwa latamanin, judíos tlawakgolh pi Alejandro xchalh asta kxlakatin; chu Alejandro tsukulh matsuwi xmakan xlakata wi tuku xwamputun xlakata nalitamakgtaya kxlakatin latamanin.
34 Pero akxni katsikgolh pi judío xwanit, xputumkan akgtiy hora lakxtum tuku pixlanka xwankgo: «¡Lanka litaxtu diosa Ártemis xalak Éfeso!».
35 Akxni xmapakgsina kachikin xkamakilhkaksanita lhuwa latamanin, wa: «Lakchixkuwin xalak Éfeso, ¿tiku ni katsi pi kachikin Éfeso wa xkuentajtlawana templo xla lanka Ártemis chu imagen nema taktachi kʼakgapun?
36 Xlakata uma xaxlikana, talakaskin pi natakaksatit chu ni kaj lakapala wi tuku natlawayatit.
37 Xlakata kalitanitantit umakgolh lakchixkuwin, tiku ni xmakgkgalhananin templo chu ni lixkajni lichuwinankgo kidiosajkan.
38 Wa xlakata, komo Demetrio chu tiku kataskujkgo wi tiku takgalhikgo taʼakglhuwit, wilakgolh kilhtamaku akxni skujkan niku lakkaxtlawakan taʼakglhuwit, chu wilakgolh gobernadores;* kalamalakgsiyakgolh xchatunukan.
39 Pero komo wixin atanu tuku putsapatit, akxni latamanin xalak kachikin natamakxtumikgo xlakan xlilakkaxwilitkan chuna la wan limapakgsin.
40 Xlikana pi kalipekua wilaw xlakata tlan nakinkalimawakakanan pi lakatakimanaw mapakgsina xlakata tuku lalh uku, xlakata ni anan tuku nalikilhanaw chuna la akgwilha litastokgnitaw».
41 Chu akxni chuna wankgolh, kawanilh latamanin pi xʼankgolha.
Notas
^ Kaʼakxilhti glosario.
^ Alakatanu wankan «makglhtintili».
^ Alakatanu wankan «xkamatakgawikanit».
^ O: «Diana».
^ Alakatanu wankan «akglhman».
^ Tukuwani romano wa procónsul. Kaʼakxilhti glosario.
