Hechos 7:1-60
7 Pero sacerdote tiku tlakg xkgalhi limapakgsin wa: «¿Chuna lanit putum uma?».
2 Esteban kgalhtinalh: «Lakchixkuwin, natalan chu natlatni, kakgaxpattit. Dios tiku kgalhi lanka likakni tasiyanilh xamakgan kintlatkan Abrahán, akxni xla xwi kMesopotamia, akxni nina xʼan tawila kHarán,
3 chu wanilh: “Kataxtu kminkachikin chu kamakgxtakgti tiku xalak mifamilia chu kapit ktiyat niku akit nakmasiyaniyan”.
4 Wa xlakata xla taxtulh kxkachikinkan caldeos chu alh tawila kHarán. Chu anta, akxni xninita xtlat, Dios tlawalh pi xmilh tawila kʼuma ktiyat niku uku wixin wilatit.
5 Pero xliputum uma tiyat nipara tsinu makamaxkilh, ni, nipara niku tlan xtayalh; pero malaknunilh xlakata wa xʼama tapakgsini chu alistalh xʼama kamaxki xkamanan,* akxni xla nina xkgalhi xkgawasa.
6 Nachuna, Dios wanilh pi xkamanan* xʼamakgo makgtawilakgo kʼatanu tiyat niku ni xlakan xwanit, chu latamanin skujnanin xʼamakgo kalimaxtukgo chu xkamakgapatinankgolh akgtati ciento kata.
7 Dios wa: “Chu ama kachikin niku nakaskujnanikgo naklakputsanani, chu alistalh, akxni kgantaxtunita nawan uma, xlakan nataxtukgo chu nakimakamaxkikgo xasanto taskujut kʼuma tiyat”.
8 »Na maxkilh akgtum talakkaxlan xlakata nakaʼakstilichukunikan kxuwa xlichixkukan* chu xla litaxtulh xtlat Isaac chu akstilichukunilh kxuwa xlichixku xliʼakgtsayan kilhtamaku, chu Isaac xtlat Jacob litaxtulh, chu Jacob xtlatkan litaxtunikgolh kgalhkutiy xalakgmakgan kinatlatnikan.*
9 Chu xalakgmakgan kinatlatnikan sitsinikgolh José chu kastamaxkikgolh egipcios. Pero Dios akxtum xtawi,
10 chu lakgmaxtulh kxliputum xtakatsanajwat chu maxkilh liskgalala chu tlawalh pi Faraón, xmapakgsina Egipto, tlan xlikatsinilh. Chu xla laksakli xlakata xmapakgsinalh kʼEgipto chu kxliputum kxchik.
11 Pero milh akgtum tatsinkstat kxliputum Egipto chu Canaán, chuna, lanka takatsanajwat, chu xalakgmakgan kinatlatnikan nila tekgskgolh tuku nawakgo.
12 Pero Jacob kgaxmatli pi xʼanan liwat kʼEgipto chu xlipulana kamalakgachalh xalakgmakgan kinatlatnikan.
13 Akxni xlimakgtiy ankgolh, José kawanilh xnatalan tiku xwanit, chu Faraón lakgapasli xfamilia José.
14 Wa xlakata José malakgachanilh akgtum tamakatsin xtlat, Jacob chu matasaninalh chu nachuna putum xalak xfamilia tiku anta xwilakgolh, xliputumkan, tutupuxamakukitsis latamanin.
15 Wa xlakata Jacob alh kʼEgipto chu anta nilh chu nachuna kaʼakgspulalh xalakgmakgan kinatlatnikan.
16 Kalinka kSiquem chu kawilika kputaknun nema Abrahán xkamakgtamawanit xlakgkgawasan Hamor anta kSiquem.
17 »Akxni xlakgchamaja kilhtamaku xlakata Dios xmakgantaxtilh tuku xmalaknuninit Abrahán, stakli kachikin chu talhuwikgolh kʼEgipto,
18 asta akxni tsukulh mapakgsinan kʼEgipto atanu mapakgsina, chatum tiku ni xkatsi xlakata José.
19 Uma mapakgsina lakkaxwililh nakatlawani tuku nitlan xalakgmakgan kinatlatnikan chu kamafuerzajlinilh xkamakgxtakgkgolh laktsu xlakgskgatankan xlakata xnikgolh.
20 Ama kilhtamaku lakachilh Moisés, chu lu stlan xwanit.* Chu akgtutu papaʼ makgastakka kxchik xtlat.
21 Pero akxni kalakgwan wilika, xtsumat Faraón tiyalh chu makgastakli chuna la xkgawasa.
22 Wa xlakata Moisés makglhtinalh tlakg xatlan takgalhtawakga nema xʼanan kʼEgipto. Chuna, xkgalhi litliwakga kxtachuwin chu tuku xtlawa.
23 »Akxni makgatsilh tipuxam kata, lakpuwa nakalakgapaxialhnan xnatalan, xkamanan Israel.
24 Akxni akxilhli pi chatum egipcio nitlan tuku xtlawanima chatum israelita, makgtayalh xtala, chu malakgaxokgelh chu makgnilh egipcio.
25 Lakpuwa pi xnatalan xʼamakgolh akgatekgskgo* pi Dios xʼama limaklakaskin xlakata xkalakgmaxtulh, pero xlakan ni akgatekgskgolh.
26 Lichali kalakgalh akxni xlatalachipamakgo chu xlakata xtlawaputun pi tlan xlatalalimparakgolh, kawanilh: “Lakchixkuwin, wixin linatalan. ¿Tuku xlakata nitlan lalikatsiniyatit?”.
27 Pero ama tiku nitlan xlikatsinima xtalakatsu ni kgaxmatniputulh chu wanilh: “¿Tiku lakgayawan kimapakgsinakan chu kijuezkan nalitaxtuya?
28 ¿Na kimakgniputuna chuna la makgni egipcio kgotana?”.
29 Akxni kgaxmatli uma, Moisés tsalalh, chu alh makgtawila kMadián niku xla kgalhilh chatiy xlakgkgawasan.
30 »Akxni xtitaxtunita tipuxam kata, chatum ángel tasiyanilh kxakaskakni xtiyat sipi Sinaí, klhkuyat kʼaktsu kiwi nema xkgalhi xalhtukun chu xlakgpasama.
31 Akxni Moisés akxilhli uma, lu kaks lilakawa. Pero akxni talakatsuwilh xlakata naʼakxilha tuku xwanit uma, takgaxmatli xtachuwin Jehová:
32 “Akit xDioskan xalakgmakgan minatlatni, xDios Abrahán, xla Isaac chu xla Jacob”. Moisés tsukulh lhpipi chu nialh tlakg xʼakxilhputun tuku xlama.
33 Jehová wanilh: “Katatuxtu mintatunu, xlakata xasanto tiyat anta niku yat.
34 Xlikana kakxilhnit pi nitlan likatsinimaka kinkachikin nema wi kʼEgipto, chu kkgaxmatnit chuna la pixlanka* tasamakgolh chu ktaktanit xlakata nakkalakgmaxtu. Katat, nakmalakgachayan kʼEgipto”.
35 Wa uma Moisés tiku xlakan lakgmakgankgolh akxni wanikgolh: “¿Tiku lakgayawan kimapakgsinakan chu kijuezkan nalitaxtuya?”, Dios limaklakaskilh ángel nema akxilhli Moisés kʼaktsu kiwi nema xkgalhi xalhtukun, xlakata nawani Moisés kapulalilh chu kalakgmaxtulh xkachikin.
36 Uma chixku kamaxtulh xalakgmakgan kinatlatnikan kʼEgipto, xtlawatilha milagros chu tuku kaks malakawaninan kʼEgipto chu kxaSpinini pupunu chu kxakaskakni tiyat, tipuxam kata.
37 »Wa uma Moisés tiku kawanilh xkamanan Israel: “Dios nalaksaka mimpalakatakan chatum palakachuwina chuna la akit kxlakgstipankan minatalankan”.
38 Wa uma tiku xkatalama kachikin Israel kxakaskakni tiyat, wa tiku akxtum xtawi ángel nema tachuwinalh ksipi Sinaí chu akxtum xkatawi xalakgmakgan kinatlatnikan, chu kgaxmatli xastakna xtachuwin Dios xlakata nakinkamaxkiyan.
39 Xalakgmakgan kinatlatnikan ni kgalhakgaxmatputunkgolh, wata lakgmakgankgolh chu xnakujkan taspitparakgolh kʼEgipto
40 chu wanikgolh Aarón: “Kakilatlawaniw dioses tiku nakinkapulalinkgoyan. Xlakata ni kkatsiyaw tuku akgspulalh uma Moisés, tiku kinkamaxtun kʼEgipto”.
41 Wa xlakata ama kilhtamaku tlawakgolh tantum aktsu toro chu liminikgolh akgtum tamakamastan uma tatlawamakgxtu* chu tsukukgolh lipaxuwakgo tuku xtlawakgonit.
42 Wa xlakata, Dios kamakgxtakgli chu kamaxkilh talakaskin natlawanikgo xasanto taskujut staku xalak akgapun, chuna la wan xtatsokgnikan Palakachuwinanin: “Oh, xchik Israel, ni akit kimakamaxkitit animales nema kamakgnikanit chu tamakamastan, umakgolh tipuxam kata kxakaskakni tiyat, ¿ni xlikana?
43 Wata lipitit xchik Moloc chu kstaku dios Refán, tatlawamakgxtu nema wixin tlawatit xlakata nakakakninaniyatit. Wa xlakata naktlawa pi nakachilipinkanatit tlakg makgat nixawa niku wi Babilonia”.
44 »Xalakgmakgan kinatlatnikan xkgalhikgo tabernáculo* kxakaskakni tiyat, chuna la Dios limapakgsinalh akxni wanilh Moisés pi xtlawalh chuna la xmasiyaninit xaliʼakxilhtit.
45 Chu xalakgmakgan kinatlatnikan makglhtinankgolh chu xlakan chu Josué linkgolh ktiyat nema xkatapakgsinikgo atanu kachikinin, tiku Dios katlakgaxtulh kxlakatinkan xalakgmakgan kinatlatnikan. Anta tawilalh asta kxkilhtamaku David.
46 Dios tlan likatsinilh David chu David skilh talakgalhaman natlawa lakatum niku natawila xDios Jacob.
47 Pero wa Salomón tiku tlawanilh niku tlan xtawilalh.
48 Pero Tiku xala talhman ni tawila kchiki nema makan litlawakanit, chuna la wan palakachuwina:
49 “Jehová wan: «Akgapun wa kimpumapakgsin chu katiyatni anta niku kmajaxa kintantun. ¿Tukuya chiki natlawayatit kimpalakata? ¿O niku wi anta niku nakjaxa?
50 ¿Pi ni kimakan tlawalh putum uma?»”.
51 »Laktsakat lakchixkuwin tiku ni kgaxpatputunatit chu ni lakgpaliputunatit mintalakapastaknikan, putum kilhtamaku lakatakipatit espíritu santo, chuna la tlawakgolh xalakgmakgan minatlatnikan nachuna tlawayatit.
52 ¿Tiku ama palakachuwina ni putsastalanikgolh xalakgmakgan minatlatnikan? Chuna, xlakan kamakgnikgolh tiku alipulana lichuwinankgolh pi xʼama min tiku xaʼakgstitum, ama tiku wixin makamastatit chu makgnitit,
53 wixin makglhtinantit Limapakgsin chuna la matitaxtikgolh ángeles, pero wixin ni makgantaxtinitantit».
54 Akxni kgaxmatkgolh putum uma, lu sitsikgolh chu xtlawaniputunkgo tuku nitlan.
55 Pero Esteban xlitsama espíritu santo, talakayawalh kʼakgapun chu akxilhlakachalh xlilanka Dios chu nachuna Jesús pi anta xya kxpakgastakat* Dios,
56 chu wa: «¡Kaʼakxilhtit! Kakxilha pi talakkinit akgapun chu xKgawasa chixku ya kxpakgastakat Dios».
57 Akxni kgaxmatkgolh uma, xlakan pixlanka katasakgolh, kaliʼakgachipaka xmakankan chu xputumkan lhkgen lakgankgolh.
58 Akxni tamakxtukgolh kkachikin, tsukukgolh aktalamikgo. Tiku xliyawakgonit taʼakgsanin wilikgolh klhakgatkan kxlakatin chatum kgawasa tiku wanikan Saulo.
59 Akxni xtalamakgolh, Esteban wa uma tuku tasaskilh: «Malana Jesús, kamakglhtinanti kiʼespíritu».
60 Alistalh tatsokgostalh chu pixlanka wa: «Jehová ni kuentajkakatlawani uma talakgalhin». Akxni wankgolh uma, lhtatalh kkalinin.
Notas
^ Xagriego: «talhtsi».
^ Xagriego: «talhtsi».
^ Kaʼakxilhti glosario.
^ Alakatanu wankan «kinatatanikan o kinatikunan».
^ O: «Dios lu stlan xʼakxilha».
^ Alakatanu wankan «tamakgachakgxi».
^ Alakatanu wankan «akglhman».
^ Alakatanu wankan «tamakanitlaw».
^ Kaʼakxilhti glosario.
^ Alakatanu wankan «kxpakgkana».
