Judas 1:1-25
1 Akit Judas, chatum kskujni Jesucristo, pero xtala Santiago, kkatsokgnaniman wixin tiku kalaksaknitan kinTlatkan* Dios chu kapaxkiyan, xla kakuentajtlawaman xlakata akxtum natatawilayatit Jesucristo:
2 Dios tlakg kakalimasiyanin talakgalhaman, tlakg kakamaxkin takaksni chu tlakg kakapaxkin.
3 Natalan tiku kkapaxkiyan, maski kaj wa xakkalitachuwinamputunan talakgmaxtut nema kimputumkan litamakgtayayaw, talakaskilh nakkalistakyawayan pi lu nakuentajtlawayatit xlakata chuntiya nakanajlaniyatit Dios, uma takanajla nema kaj makgtum kamakamaxkika tiku xasantos.
4 Kkatsokgnaniman xlakata tsekg kalakgstipatanukgonitan lakchixkuwin chuna la makgasa kalichuwinalh xaSanto Tatsokgni pi nakalakputsananikan. Umakgolh lakgalhinanin likilhankgo xtalakgalhaman Dios nema ni anan xtachuna* xlakata natlawakgo tuku ni xlilat chu ni lilakamaxanankgo* chu makgxtakgkgo ama tiku kajwatiya kiMalanakan,* tiku kinkatamawan, Jesucristo.
5 Maski liwana katsiyatita putum uma, akit kkamalakapastakniputunan pi Jehová lakgmaxtulh akgtum kachikin kʼEgipto, pero alistalh kamalakgsputulh tiku ni limasiyakgolh takanajla.
6 Chu ángeles tiku ni kuentajtlawakgolh tuku xkalakgayawakanit, wata makgxtakgkgocha niku xlitawilatkan xwanit, xla kalichiwilinit cadenas putum kilhtamaku niku lu kapukswa xlakata nakalakputsanani kxalanka xkilhtamaku.
7 Nachuna, Sodoma chu Gomorra chu laklanka kachikinin nema anta lakatsu xwilakgolh, lu lhuwa tsukukgolh tlawakgo talakgxtumit nema ni xlitatlawat* chu lu lipaxuwaputunkgolh tuku lu lixkajni xlakaskin xmaknikan, umakgolh kalimaklakaskinkan chuna la liʼakxilhtit nema kinkalistakyawakanan xlakata kalakputsananika chu kamalakgaxokgeka akxni kalimasputuka lhkuyat.
8 Maski chuna, umakgolh lakchixkuwin putum kilhtamaku lilakpuwamakgolh tuku nitlan, maxkajwanimakgolh xmaknikan, ni kgalhakgaxmatmakgolh tiku kgalhikgo limapakgsin chu lixkajni kalichuwinamakgolh tiku kgalhikgo kakni.
9 Pero akxni arcángel* Miguel, tataʼakglhuwilh Akgskgawini xpalakata xmakni Moisés, ni lakputsananiputulh chu ni wanilh laklixkajni tachuwin, wata wanilh: «Jehová kakilhnin».
10 Pero umakgolh lakchixkuwin lixkajni lichuwinamakgolh putum tuku ni akgatekgskgo.* Xtachuna la animales nema nila lakapastaknankgo chu xliputum tuku tlawakgo likatsikgo chuna la animales chu wa xlakata chuntiya xʼakstukan talakglakgalhimakgolh.
11 ¡Lu nitlan tuku nakalakgchin! Xlakata tiyakgonit xtiji Caín chu lakapala tiyakgonit ni xatlan xtiji Balaam kaj xlakata wi tuku nakamaxkikan, chu lakatakinankgo chuna la Coré lilakatakinalh xtachuwin, wa xlakata na nakamalakgsputukan.
12 Umakgolh lakchixkuwin akxtum katatawilakgoyan akxni tlawayatit paskua nema kalimasiyaniyatit natalan pi kapaxkiyatit. Pero litaxtukgo chuna la chiwix nema wilakgolh kxtampun chuchut, xmapuchwayaninanin borregos tiku kaj lilakpuwankgo tuku nawakgo chu ni lakamaxanankgo; puklhni nema ni kgalhikgo chuchut chu anu anu kalin un; kiwi nema ni mastakgo xtawakatkan akxni kxkilhtamaku, makgtiy nikgonit* chu kapulhumakgankanit;
13 umakgolh lakchixkuwin xtachuna la lakgtliwakgan xtakgayawana pupunu nema kamakan kxkilhtun tuku xalaklixkajni nema xlimaxanankgolh; staku nema ni ankgo niku xliʼanatkan chu Dios nakawili niku tlakg kxakapukswa xlakata anta natawilakgo putum kilhtamaku.
14 Chuna, Enoc tiku xlikgalhtujun xalak xfamilia Adán, Dios timalakpuwanilh nalichuwinan xpalakata umakgolh lakchixkuwin, akxni wa: «¡Kaʼakxilhtit! Jehová katamilh lhuwa miles xalakgtliwakga xʼángeles
15 xlakata nakalakputsanani putum latamanin, chu nakaliyawa talakgalhin putum lakgalhinanin tiku ni maxkikgo kakni. Dios chuna tlawa xlakata tlawakgo katuwa tuku nitlan chu wanikgo laklixkajni tachuwin».
16 Umakgolh lakchixkuwin taʼakglhuwikgo chu ni lipaxuwakgo tuku kgalhikgo kxlatamatkan, kaj putsamakgolh tuku xlakan lakaskinkgo chu lilaktlankajwanamakgolh xtachuwinkan, chu akxni kawanikgo lakswan tachuwin amakgapitsin chuna tlawakgo xlakata tlan nalitamakgtayakgo.
17 Pero wixin, natalan tiku kkapaxkiyan, kalakapastaktit tuku xʼapóstoles kiMalanakan Jesucristo wankgolh pi xʼama la,
18 akxni xlakan xkawanikgoyan: «Kxaʼawatiya kilhtamaku naʼanankgo tiku nalikgalhkgamanankgo tuku xatlan, tiku nakamakgatlajakgo tuku nitlan tlawaputunkgo».
19 Wa umakgolh tiku tlawakgo pi kaʼanalh tapapitsit, lakchixkuwin tiku likatsikgo chuna la animales, tiku ni kapulalin Dios.*
20 Pero wixin, natalan tiku kkapaxkiyan, kalalimatliwakglhtit lu xasanto mintakanajlakan chu kakapulalin xʼespíritu santo Dios kmiʼoracioneskan,
21 xlakata chuntiya natamakgxtakgatit kxtapaxkit Dios chu nakgalhkgalhiyatit xtalakgalhaman kiMalanakan Jesucristo, nema natlawa pi nakgalhiyatit latamat nema ni kgalhi xlisputni.
22 Nachuna, chuntiya kakalakgalhamantit makgapitsi tiku ni liwana kanajlakgo;
23 kakalakgmaxtutit xlakata ni nakamalakgsputukan klhkuyat. Pero chuntiya kakalakgalhamantit amakgapitsin, chu kuentajkatlawatit, kaxkajnitit asta klhakgatkan nema lixkajwananit xalixkajni xtatlawkan.
24 Uku, Dios tiku kgalhi likakni, tlan nakamakgtayayan ni naʼakgchakgxatit chu natlawa pi skulunku natawilayatit chu nakgalhiyatit lhuwa tapaxuwan kxlakatin.
25 Kajwatiya Dios tiku kinkalilakgmaxtun Jesucristo kiMalanakan, kamakglhtinalh likakni, lilanka, litliwakga chu limapakgsin xliputum kilhtamaku nema titaxtunita, uku chu putum kilhtamaku. Chuna kalalh.
Notas
^ Alakatanu wankan «kinTatakan o kinTikukan».
^ O: «talakgalhaman nema ni kinkalakgchanan». Kaʼakxilhti glosario.
^ Griego, asélgueia. Kaʼakxilhti glosario.
^ Alakatanu wankan «kimPuchinakan».
^ Kaʼakxilhti glosario.
^ Kilhchanima «xpuxkukan ángeles». Kaʼakxilhti glosario.
^ Alakatanu wankan «tamakgachakgxi».
^ O: «xlipan nikgonit».
^ O: «xʼespíritu Dios».
