Lucas 11:1-54
-
La tlawakan oración (1-13)
-
Chuna la xlitatlawat oración (2-4)
-
-
Xlitliwakga Dios kalitamakxtu Demonios (14-23)
-
Xalixkajni espíritu taspitpara (24-26)
-
Xaxlikana tapaxuwan (27, 28)
-
Milagro nema akgspulalh Jonás (29-32)
-
Xmakgskgot makni (33-36)
-
Kgoxotanin lakgaputiyunanin tiku pulalinkgo takanajla (37-54)
11 Ama kilhtamaku, Jesús xtlawama xʼoración, akxni makgalhsputulh, chatum xtamakgalhtawakgen wanilh: «Malana, kakinkamasiyani chuna la naktlawayaw kioracionkan, xtachuna la Juan na kamasiyanilh xtamakgalhtawakgen».
2 Wa xlakata xla kawanilh: «Akxni natlawayatit mioracionkan, kawantit: “Tlat,* katamasantujlilh* mintukuwani. Kamilh minTamapakgsin.
3 Kakilamaxkiw chali chali tuku nakwayaw* chuna la kmaklakaskintilhayaw akgatunu kilhtamaku.
4 Chu kakilatapatiw kintalakgalhinkan, xlakata akinin na kkatapatiyaw putum tiku kinkalaklinikgoyan;* chu ni kamasta talakaskin naktlawayaw tuku nitlan”».
5 Alistalh kawanilh: «Kalilakpuwantit pi wixin kgalhiyatit chatum amigo chu lakgpinatit itat tsisni chu waniyatit: “Amigo, kakimasakuani maktutu kaxtalanchu,
6 xlakata chatum kiʼamigo lata makgat kilakgminitancha chu ni kkgalhi tuku naktawa”.
7 Pero xla kgalhtinan kxpulakni xchik: “Ni kakimakglhuwi. Malakcha liwana lakchuwaya, chu akxtum kkatamakgolha laktsu kinkamanan kputama. Nila ktaki chu nila tuku kmaxkiyan”.
8 Kkawaniyan, pi maski miʼamigojkan, xla ni katitakilh itat tsisni chu nitu katikamaxkin, pero xlakata lhuwa limaʼakgatsankgepatit, nataki chu nakamaxkiyan tuku lakaskinatit.
9 Wa xlakata kkawaniyan, chuntiya kaskintit, chu nakamaxkikanatit; chuntiya kaputsatit chu natekgsatit; chuntiya kalakgatlakgtit malakcha chu nakamalakkinikanatit.
10 Xlakata putum tiku skin maxkikan, chu tiku putsa tekgsa, chu tiku lakgatlakga malakcha namalakkinikan.
11 Xlikana, ¿pi anan chatum tlat komo xkgawasa naskini tantum skiti,* wata luwa namaxki?
12 Chu komo naskini akgtum kgalhwat, ¿namaxki tantum taskuyu?*
13 Wa xlakata, maski wixin lixkajni likatsiyatit, katsiniyatit kamaxkiyatit xatlan tamaskiwin* minkamanankan, ¡tlakg xaliwaka minTlatkan tiku wi kʼakgapun nakamaxki espíritu santo tiku skinikgo!».
14 Alistalh Jesús tamakxtulh demonio nema xtlawa pi chatum chixku nila xchuwinalh. Chu akxni tamakxtuka demonio uma chixku tlan chuwinalh, chu latamanin lu kaks lilakawankgolh.
15 Pero makgapitsin wankgolh: «Kalitamakxtu demonios xlitliwakga Belcebú,* xmapakgsinakan demonios».
16 Chu amakgapitsin, xlakata kaj xliʼakxilhputunkgo, tsukukgolh skinikgo limasiyat xalak akgapun.
17 Xlakata xkatsi tuku xlakpuwamakgolh, Jesús kawanilh: «Putum tamapakgsin nema xʼakstu tapapitsi lakgsputa; chu akgtum chiki nema xʼakstu tapapitsi lakxla.
18 Nachuna, komo Satanás xʼakstu tapapitsinit, ¿la* tlan tliwakga natawila xtamapakgsin? Xlakata wixin wanatit pi xlitliwakga Belcebú klitamakxtu demonios.
19 Komo akit kmaklakaskin xlitliwakga Belcebú xlakata nakkatamakxtu demonios, ¿tiku xlitliwakga maklakaskinkgo mintamakgalhtawakgenkan xlakata nakatamakxtukgo? Wa xlakata, xlakan nalimasiyakgo pi tuku lichuwinantit ni xlikana.
20 Pero komo akit xlitliwakga Dios* kkalitamakxtu demonios, xTamapakgsin Dios xlikana kalakgchinitana.
21 Akxni chatum tliwakga chixku, tiku kgalhi xlimakgnin, kuentajtlawa xchik, nila tiku kgalhan tuku tapakgsini.
22 Pero akxni chatum chixku tlakg tliwakga nixawa xla, chipa chu makgatlaja, uma chixku makglhti putum xlimakgnin nema xlipawan, chu maʼakgpitsi tuku makglhtilh.
23 Putum tiku ni akit kintataya, kintalalakatakima, chu putum tiku ni kintaskujma xlakata latamanin nakilakgminkgo, wata kaj katlakgalima.
24 »Akxni xalixkajni espíritu laktaxtu chatum chixku, titaxtu kxakaskakni tiyat xlakata putsatilha niku najaxa chu komo ni tekgsa, wan: “Naktaspita kkinchik niku kminitancha”.
25 Chu akxni chan, tekgsa pi chiki kapalhkanit chu kaxtlawanankanit.
26 Alistalh an, chu kakitiya akgalhtujun espíritus, nema tlakg lixkajni likatsikgo nixawa xla, chu akxni laktanukgo, xlakan anta tamakgxtakgkgo. Wa xlakata, uma chixku tlakg nitlan tawila nixawa la xapulana».
27 Akxni xla xlichuwinama uma, chatum puskat kxlakgstipankan lhuwa latamanin pixlanka wanilh: «Paxuwa ama puskat tiku lin kxpan chu matsikin».
28 Pero Jesús wanilh: «Ni, wata, ¡paxuwakgo tiku kgaxmatkgo xtachuwin Dios chu makgantaxtikgo!».
29 Akxni latamanin xlalakxkitimakgolh,* tsukulh wan: «Laklixkajni latamanin xla uma kilhtamaku; akxilhputunkgo akgtum milagro, pero ni katikamasiyanika, kajwatiya milagro nema akgspulalh Jonás.
30 Xlakata chuna la Jonás litaxtulh akgtum limasiyat xpalakatakan xalak Nínive, nachuna nalitaxtu xKgawasa chixku xpalakata umakgolh latamanin xla uma kilhtamaku.
31 Akxni nalakputsanankan, latamanin xla uma kilhtamaku nakatamalakastakwanikan mapakgsina puskat xalak Seba* chu xla nalimasiya pi linkgo kuenta, xlakata xla makgat mincha kaj xlakata nakgaxmata xliskgalala Salomón. Pero, ¡kaʼakxilhtit!, unu wi tiku tlakg xlakaskinka nixawa Salomón.
32 Akxni nalakputsanankan, latamanin xalak Nínive nakatamalakastakwanikan latamanin xla uma kilhtamaku chu xalak Nínive nalimasiyakgo pi latamanin xla uma kilhtamaku linkgo kuenta, xlakata akxni Jonás kalitachuwinalh Dios, xlakan makgxtakgkgolh xtalakgalhinkan. Pero, ¡kaʼakxilhtit!, unu wi tiku tlakg xlakaskinka nixawa Jonás.
33 Akxni wi tiku mapasinita akgtum makgskgot, ni kaj tsekg wili chu ni liʼakgtala canasta,* wata wili niku talhman xlakata putum tiku natanukgo naʼakxilhkgo xkgakganat.
34 Lakgastapu wa xmakgskgot mimakni. Akxni milakgastapu kaj pulaktum tuku kuentajtlawa, putum mimakni na litsama xkgakganat; pero akxni milakgastapu kuentajtlawa tuku lu ni xatlan,* mimakni na litsama tuku kapukswa.
35 Wa xlakata, kuentajkatlawa pi xkgakganat nema kgalhiya ni kapukswa nawan.
36 Wa xlakata, komo putum mimakni makgaxkgakganan chu nitu kgalhi tuku kapukswa, putum makni lu namakaxkgakgenan xtachuna la makgskgot makaxkgakgenaniyan».
37 Akxni xlichuwinanita uma, chatum fariseo wanilh pi kaʼalh tawayan. Wa xlakata Jesús tanulh chu tawilalh kmesa.
38 Pero fariseo kaks lilakawa akxni akxilhli pi ni pulana makgachakgalh* akxni xʼama wayan.
39 Pero Malana wanilh fariseo: «Wixin, fariseos, kamaskulunkiyatit xmaknikan copa chu pulatu, pero kminakujkan lu lhuwa tuku kgalhiputunatit chu tlawayatit tuku lixkajni.
40 ¡Lu xalaktonto wixin! ¿Ni katsiyatit pi tiku tlawalh xmakni na tlawalh xpulakni?
41 Pero tuku wi kminakujkan kakamatlawin pi natlawaputunatit tuku tlan xpalakata tiku limaxkgenin. Komo chuna natlawayatit mimputuminikakan xaskulunku nawanatit.
42 ¡Kgoxotanin wixin, fariseos, xlakata mastayatit diezmo xla hierbabuena chu xla ruda chu atanu tuwan nema wakan,* pero ni paxkinanatit chuna la Dios chu ni tlawayatit tuku xaʼakgstitum! Xlakaskinka xwanit namastayatit diezmo, pero chuntiya xmakgantaxtitit umakgolh amakgapitsi.
43 ¡Kgoxotanin wixin, fariseos, xlakata lu lakgatiyatit tlakg xapulana* laktawilh nema wilakgolh ksinagogas* chu lakgatiyatit pi kakamaxkikantit kakni akxni katachuwinankanatit kplaza niku stanankan!
44 ¡Kgoxotanin wixin, xlakata litaxtuyatit chuna la putaknun nema ni liwana tasiyakgo,* wa xlakata latamanin akgspuntlawankgo chu ni katsikgo!».
45 Kgalhtinalh chatum tiku liwana xlakgapasa Limapakgsin, wanilh: «Makgalhtawakgena, akxni lichuwinanti uma na lixkajni kinkawani akinin».
46 Xla kgalhtinalh: «¡Na kgoxotanin wixin, tiku liwana lakgapasatit Limapakgsin, xlakata wiliyatit kxpakgxtunin latamanin laktsinka takuka, pero wixin ni limatsuwiputunkgoyatit takuka maski kaj kgantum mimakankan!
47 »¡Kgoxotanin wixin, xlakata kaxtlawaparayatit xputaknunkan palakachuwinanin, pero xalakgmakgan minatlatnikan kamakgnikgolh!
48 Xlikana, wixin limasiyayatit pi katsiyatit tuku tlawakgolh xalakgmakgan minatlatnikan, chu matlaniyatit, xlakata xlakan kamakgnikgolh palakachuwinanin, pero wixin kaxtlawaparayatit xputaknunkan palakachuwinanin.
49 Wa xlakata xliskgalala Dios na wa: “Nakkamalakgachaniyan palakachuwinanin chu apóstoles, chu makgapitsin nakamakgnikan chu nakaputsastalanikan,
50 xlakata xkgalhnikan putum palakachuwinanin nema tamakganit lata xkilhtsukut kakilhtamaku nalitawakakgoyacha latamanin xla uma kilhtamaku,
51 lata xkgalhni Abel, asta xkgalhni Zacarías, tiku makgnika kxlakatin templo lakatsu niku wi pumakamastan”. Xlikana kkawaniyan, putum uma nalitawakakgoyacha latamanin xla uma kilhtamaku.
52 »¡Kgoxotanin wixin tiku lu lakgapasatit Limapakgsin, xlakata mapanuyatit llave xla takatsin. Wixin ni tanutit chu ni mastayatit talakaskin natanukgo tiku tanuputunkgo!».
53 Wa xlakata, akxni taxtulh anta, lakgtsokgkinanin chu fariseos litamakgstilikgolh chu tsukukgolh limakglhuwikgo lhuwa atanu takgalhskinin,
54 xkgalhkgalhimakgolh pi xwa tuku xlimawakakgolh.
Notas
^ Alakatanu wankan «Tata o Tiku».
^ O: «kaliʼakxilhka la xasanto».
^ Xagriego: «kaxtalanchu».
^ Alakatanu wankan «kinkalakgawilanikgon».
^ Alakatanu wankan «tamakgnin».
^ O: «escorpión».
^ Alakatanu wankan «tatain o talakgalhaman».
^ O: «Beelzebub». Akgtum tukuwani nema limapakuwikan Satanás.
^ Alakatanu wankan «chi».
^ Xagriego: «kgantum aktsu xmakan Dios».
^ Alakatanu wankan «xlalakgxkgayamakgolh».
^ O: «xalak Sur».
^ Alakatanu wankan «pakgxu».
^ O: «lakgkatsalakaninan».
^ Uma wamputun, ni makgachakgalh la xwan limapakgsin.
^ O: «atanu tamakgalan».
^ O: «tlakg xalaktlan».
^ Kaʼakxilhti glosario.
^ O: «ni kamanikanit».
