Lucas 12:1-59
-
Xlimaxkutinkan fariseos (1-3)
-
Pekuanikan Dios, ni wa lakchixkuwin (4-7)
-
Ni lakgmakgankan Cristo (8-12)
-
Liʼakxilhtit xla xatonto chixku tiku kgalhi tumin (13-21)
-
Nialhtu lilakgaputsakan (22-34)
-
Ni xalhuwa borregos (32)
-
-
Skgalalh tawilakan (35-40)
-
Xatalipaw tiku kuentajtlawa chiki chu ni xatalipaw tiku kuentajtlawa chiki (41-48)
-
Ni katiʼanalh takaksni, wata tapapitsit (49-53)
-
Talakaskin nalakputsananikan kilhtamaku (54-56)
-
Lakkaxtlawakan taʼakglhuwit (57-59)
12 Ama kilhtamaku, akxni lhuwa mil latamanin xtamakxtumikgonit chu asta xlatutayamakgolh, pulana Jesús tsukulh kawani xtamakgalhtawakgen: «Kuentajkatlawatit ni nakapasayan xlimaxkutinkan fariseos, nema tatalakxtumi xaʼakgsanina xnakujkan.
2 Pero ni anan tuku liwana matsekgkanit nema ni katitasiyalh, chu ni anan tuku tsekg wi nema ni katitakatsilh.
3 Wa xlakata, tuku wixin tsekg nawanatit, putum latamanin nakgaxmatkgo, chu tuku pixtsina nawanatit, kxʼakgstin chiki nalichuwinankan.
4 Nachuna, kkawaniyan amigos, ni kakapekuanitit tiku makgnikgo makni pero alistalh nialhla tuku tlawakgo.
5 Pero Dios wa tiku milipekuanitkan, xlakata tlan kamakgniyan chu tlan kamakanan kʼGehena.* Wa xlakata, wa Tiku milipekuanitkan.
6 Tankitsis laktsu tsiktsi kalistakan okgxtiy tumin nema ni lhuwa xtapalh,* ¿ni xlikana? Pero Dios nipara tantum kapatsankga.*
7 Pero asta minchixitkan xalak miʼakgxakgakan katsi chuna la xlikganlhuwa. Ni kapekuantit; wixin tlakg xtapalh litaxtuyatit nixawa lhuwa laktsu tsiktsi.
8 »Akit kkawaniyan, putum tiku wan pi kilakgapasa kxlakatin latamanin, xKgawasa chixku na nawan pi lakgapasa kxlakatin xʼángeles Dios.
9 Pero putum tiku nakilakgmakgan kxlakatin latamanin na naklakgmakgan kxlakatin xʼángeles Dios.
10 Chu putum tiku nitlan nalichuwinan xKgawasa chixku, natapatikan, pero tiku lixkajni nalichuwinan espíritu santo ni katitapatika.
11 Akxni nakamakamastakanatit niku lhuwa tamakxtumikan,* kxlakatinkan mapakgsinanin chu napuxkun, ni kalilakgaputsatit chuna la nachuwinanatit o tuku nalitakgalhmakgtayayatit,
12 xlakata espíritu santo ama hora nakamakatsiniyan tuku miliwanatkan».
13 Alistalh chatum tiku anta xkataya lhuwa latamanin wanilh Jesús: «Makgalhtawakgena, kintlat* ninita, wa xlakata kawani kintala* kamapapitsilh tuku kinkamakgxtakgnin».
14 Xla wanilh: «¿Tiku kiliyawalh mijuezkan o xmapapitsina tuku kamakgxtakgnikanitantit?».
15 Alistalh kawanilh: «Skgalalh katawilatit chu kalakgmakgantit putum tamakglakgatin nema anan, xlakata akxni chatum lataman lhuwa tuku kgalhi, tuku kgalhi nila maxki latamat».
16 Akxni xwanita uma, kalitachuwinalh akgtum liʼakxilhtit, wa: «Xpukuxtu chatum chixku tiku lhuwa tuku xkgalhi, lhuwa makgalanalh.
17 Wa xlakata, tsukulh lakapastaka kxnaku, xwan: “¿Tuku kilitlawat uku, xlakata nialh kkgalhi niku nakmaki kintamakgalan?”.
18 Alistalh xla wa: “Wa uma tuku naktlawa: nakkalaktilha niku kmaki kintamakgalan chu nakkatlawa nema tlakg laklanka, chu anta nakmaʼakgstokgwili putum kintamakgalan chu putum tuku kkgalhi”.
19 Alistalh na wa: “Lhuwa tuku kkgalhi nema nakiʼakchani akglhuwa kata. Wa xlakata ni naklilakgaputsa, nakwayan, nakkgotnan chu naklipaxuwa”.
20 Pero Dios wanilh: “Xatonto wix, uma katsisni pimpat niya.* Wa xlakata, ¿tiku natamakgxtakgni tuku maʼakgstokgwili?”.
21 Chuna akgspula chixku tiku akstu maʼakgstokgwili tuku lhuwa xtapalh, pero kxlakatin Dios nitu kgalhi».
22 Alistalh kawanilh xtamakgalhtawakgen: «Wa xlakata kkawaniyan, nialh kalilakgaputsatit milatamatkan, xlakata tuku nawayatit o xlakata mimaknikan, tuku nalilhakgananatit.
23 Xlakata tlakg xlakaskinka latamat nixawa taway, chu makni nixawa lhakgat.
24 Kalilakpuwantit cuervos:* xlakan ni chananankgo chu ni makikgo xtamakgalankan; ni kgalhikgo niku namakikgo xtamakgalankan; pero Dios kamawi. ¿Ni tlakg xtapalh wixin nixawa umakgolh tsiktsi?*
25 Komo wi tiku nalakgaputsa, ¿pi tlan namalhmani xlatamat maski kaj puntsu?
26 Wa xlakata, komo nila tlawayatit uma, ¿tuku xlakata lilakgaputsayatit taway chu lhakgat?
27 Kalilakpuwantit chuna la stakkgo xanat:* xlakan ni lhuwa skujkgo, ni tlawakgo klhakgatkan; pero kkawaniyan pi nipara Salomón tiku lhuwa tuku xkgalhi lhakganalh chuna la xlakan.
28 Wa xlakata, komo Dios chuna kamalhakgani tuwan* xalak kapukuxtun nema uku wilakgolh chu lichali kalhkuyukan, ¡tlakg liwaka nakamalhakganiyan wixin! ¡Lu ni lhuwa mintakanajlakan!
29 Wa xlakata, nialh kalilakgaputsatit tuku nawayatit o tuku nalikgotnanatit.
30 Xlakata putum uma wa tuku lu putsakgo latamanin xalak kakilhtamaku, pero minTlatkan katsi pi wixin maklakaskinatit putum umakgolh.
31 Wata chuntiya kaputsatit xTamapakgsin chu putum uma tuku maklakaskinatit na nakamaxkikanatit.
32 »Ni kapekuantit, ni xalhuwa borregos, xlakata minTlatkan xatapaxuwan nakamaxkiyan Tamapakgsin.
33 Kastatit tuku kgalhiyatit chu katlawatit tuku tlan xpalakata tiku limaxkgenin. Katlawatit puxtokg* nema nikxni lakgwan, tuku lhuwa xtapalh kʼakgapun nema nikxni sputa, niku nipara chatum kgalhana talakatsuwi chu niku nipara xaluwa way.
34 Xlakata anta niku wi tuku lhuwa xtapalh akxilhatit, na anta natawila minakujkan.
35 »Kalhakganantit* chu skgalalh katawilatit chu kamapasiwilitit mimakgskgotkan,
36 chu wixin xtachuna kalitaxtutit la lakchixkuwin tiku kgalhkgalhikgo xmalanakan xlakata nataspita kputamakgaxtokgni, wa xlakata, akxni taspita chu lakgatlakga malakcha, xlakan tunkun malakkinikgo.
37 ¡Paxuwakgo amakgolh lakskujnin tiku akxni chin xmalanakan katekgsa pi kuentajtlawanamakgolh! Xlikana kkawaniyan, xla nawili lhakgat* xlakata nakalakskujnani chu natlawa pi natawilakgo xlakata nawayankgo, chu namin kxpaxtunkan chu nakamaxki taway.
38 Chu komo namin itat tsisni,* o asta akxni tasa puyu,* chu katekgsa pi skgalalh wilakgolh, ¡xlakan lu paxuwakgo!
39 Pero kakatsitit uma: komo xmalana chiki xkatsilh tuku hora xʼama min kgalhana, ni xmastalh talakaskin pi fuerza xtanulh kxchik.
40 Nachuna wixin, skgalalh katawilatit, xlakata kilhtamaku akxni max ni lakpuwanatit, mima xKgawasa chixku».
41 Alistalh Pedro wa: «Malana, ¿kajwatiya akinin kinkawanipat uma liʼakxilhtit, o nachuna amakgapitsin?».
42 Chu Malana wa: «¿Tiku xlikana litaxtu xkuentajtlawana chiki xatalipaw chu xaskgalala, tiku xmalana nalakgayawa amakgapitsi kskujnin* xlakata chuntiya nakamaxki xtawaykan akxni xlilat?
43 ¡Paxuwa ama skujni komo akxni nachin xmalana namanokglhu pi chuna tlawama!
44 Xlikana kkawaniyan pi nalakgayawa putum tuku kgalhi.
45 Pero komo xmilh kilhtamaku ama skujni xlakpuwa “Kimalana makgapalama”, chu natsuku kalakgkgaxiwili skujnin lakchixkuwin chu lakpuskatin chu natsuku wayan chu kgota chu naʼakgkgachitama,
46 nachin xmalana ama skujni akxni xla nipara kgalhkgalhima chu ama hora akxni xla ni katsi, chu lu palha namalakgaxokge chu akxtum nakatawili tiku ni kgalhakgaxmatnankgo.
47 Alistalh ama skujni tiku akgatekgsli* xtalakaskin xmalana, pero ni skgalalh tawilalh, chu nipara tlawalh tuku skinika natlawa, tlakg makglhuwa nalakgkgaxiwilikan.
48 Pero tiku ni akgatekgsli chu tlawalh tuku minini nalilakgkgaxiwilikan, kaj ni lhuwa nalakgkgaxiwilikan. Xlakata, putum ama tiku lhuwa tuku maxkika, lu lhuwa tuku naskinikan, chu tiku lhuwa tuku lakgayawaka nakuentajtlawa, tlakg liwaka naskinikan.
49 »Kminit mapasi lhkuyat kkatiyatni, chu pasalha, wa xlakata, ¿tuku tlakg ktilakaskin?
50 Xlikana, anan akgtum tamunut nema nakilimunukan, ¡chu lu ktalipuwani asta akxni nakgalhsputa!
51 ¿Lakpuwanatit wixin pi kminit wili takaksni kkatiyatni? Kkawaniyan, ni takaksni wata tapapitsit.
52 Xlakata lata uku xatapapitsin natawilakgo kgalhkitsis kʼakgtum chiki, kgalhtutu nalakatakikgo chatiy chu chatiy nalakatakikgo kgalhtutu.
53 Xatapapitsin natawilakgo, xatlat nalakataki xkgawasa chu xakgawasa nalakataki xtlat, xatse nalakataki xtsumat chu xatsumat nalakataki xtse, chu xaputiatse* nalakataki xpuwiti* chu xapuwiti nalakataki xputiatse».
54 Alistalh na kawanilh lhuwa latamanin: «Akxni akxilhatit tasiya puklhni niku tatsekga chichini, tunkun wanatit “Namin unisen”, chu kgantaxtu.
55 Chu akxni akxilhatit pi minacha un ksur, wanatit “Lu tliwakga nalhkaknan”, chu chuna la.
56 Lakgaputiyunanin, katsiyatit lakputsananiyatit la tasiya katiyatni chu akgapun, pero ¿tuku xlakata ni akgatekgsatit* tuku lama kʼuma kilhtamaku?
57 ¿Tuku xlakata na ni miʼakstukan lakputsananiyatit tuku xaʼakgstitum?
58 Akgtum liʼakxilhtit, akxni tatlawampatku tiku malakgsiyaman kxlakatin mapakgsina, lu kaliskujti natalakkaxlaya taʼakglhuwit tuku takgalhiya, xlakata ni namatasaninanan kxlakatin juez, chu juez namakamastayan kxmakan tiku skuja anta chu xla natamaknuyan kpulachin.
59 Xlikana kwaniyan, ni katitaxtu anta asta akxni naxokgokgoya xaʼawatiya okgxtum aktsu tumin».*
Notas
^ Kaʼakxilhti glosario.
^ Xagriego: «okgxtiy asarion».
^ Alakatanu wankan «kaʼakgtsonkgswa».
^ O: «kxlakatin sinagogas».
^ Alakatanu wankan «kintata o kintiku».
^ Alakatanu wankan «kintakam».
^ O: «uma katsisni namakglhtikana milatamat». Kaʼakxilhti glosario.
^ O: «lhkgakgna». Uma tasiya la chakglhni pero tlakg lanka.
^ Alakatanu wankan «spitu».
^ O: «lirios».
^ Alakatanu wankan «palhma».
^ Uma akgtum aktsu bolsa nema xmaklakaskinkan xlakata xmakika tumin, oro, plata, cobre chu atanu tuku xmaklakaskinkan.
^ Xagriego: «Katatampulakgchitit».
^ O: «nalitatampulakgchi».
^ Xagriego: «xlimakgtiy skgalanankan». Kxkilhtamaku Jesús uma xkilhchanima max 9:00 p.m. asta 12:00 a.m.
^ Xagriego: «xlimakgtutu skgalanankan». Kxkilhtamaku Jesús uma kilhchanima, max 12:00 a.m. asta 3:00 a.m.
^ O: «skujnin xalak chiki».
^ Alakatanu wankan «makgachakgxilh».
^ Alakatanu wankan «xapuwitichat».
^ Alakatanu wankan «xapuwititsumat».
^ Alakatanu wankan «makgachakgxiyatit».
^ Xagriego: «xaʼawatiya leptón». Kaʼakxilhti glosario.
