Lucas 14:1-35
-
Mapaksakan kSábado chixku tiku xmakkuntapuxtunit (1-6)
-
Nataktujuya akxni nawanikana napina wayana kʼakgtum chiki (7-11)
-
Kakawani naʼankgo wayankgo kminchik tiku nila katixokgonikgon (12-14)
-
Liʼakxilhtit xlakata tiku xkawanikanit naʼankgo wayankgo chu skinkgolh xkatapatika (15-24)
-
Tuku limakgxtakgkan xlakata kstalanina Cristo litaxtukan (25-33)
-
Matsat nema makgatsankga xliskgokgo (34, 35)
14 Atanu kilhtamaku akxni Sábado xwanit, Jesús alh wayan kxchik chatum xpulalinakan fariseos, chu xlakan kaks xʼakxilhmakgolh.
2 Chu ¡kaʼakxilhti!, anta kxlakatin Jesús xwi chatum chixku tiku xkgalhi akgtum tajatat nema tlawalh pi xmakxpanin chu xchaxpanin nakunkgo.
3 Wa xlakata, Jesús chuwinalh chu kakgalhskilh tiku lu xlakgapaskgo Limapakgsin chu fariseos: «¿Xlilat mapaksanankan Sábado, o ni?».
4 Pero xlakan ni kgalhtinankgolh. Alistalh xla makgachipalh chixku, mapaksalh chu malakgachalh.
5 Alistalh kawanilh: «¿Tiku wixin, komo xkgawasa o xtoro tamokgosa kʼakgtum pozo, ni tunkun katimakutulh maski Sábado?».
6 Chu nila kgalhtinankgolh.
7 Alistalh kawanilh akgtum liʼakxilhtit tiku xʼankgonit wayankgo akxni akxilhli pi xlaksakkgo tlakg xlakaskinka laktawilh. Kawanilh:
8 «Akxni nawanikana pi kapit kʼakgtum lanka taway xla putamakgaxtokgni, ni anta katawila niku tlakg xlakaskinka laktawilh. Max na wanikanit kaʼalh chatum tiku tlakg xlakaskinka litaxtu nixawa wix.
9 Alistalh tiku kawanin pi napinatit wayanatit, namin chu nawaniyan: “Kamaxki talakaskin uma chixku natawila niku wila”. Alistalh maxanampat nawan akxni napina tawilaya niku ni lu xlakaskinka.
10 Pero akxni nawanikana pi kapit klanka taway, katawila niku ni lu xlakaskinka, xlakata akxni namin tiku wanin pi napina, nawaniyan: “Amigo, katat unu niku tlakg xlakaskinka”. Uma natlawa pi nakgalhiya kakni kxlakatin putum tiku kawanikanit naʼankgo wayankgo.
11 Xlakata putum tiku lanka makgkatsikan namaktujukan, chu tiku nataktuju namalankikan».
12 Alistalh na wanilh tiku xwaninit pi xʼalh wayan: «Akxni natlawaya akgtum lanka taway, ni wa kakawani miʼamigos, minatalan,* mifamilia, o mintalakatsunin tiku lhuwa kgalhikgo tumin, xlakata komo chuna natlawaya max namin kilhtamaku na nawanikgoyan kapit wayana kxchik.
13 Pero akxni namastaya akgtum taway, wa kakawani limaxkgenin,* tiku ni xatakgatsin xmakni, tiku lakluntu, tiku lakgaxokgo;
14 chu napaxuwaya, xlakata xlakan nitu tuku lixokgonikgoyan. Xlakata naxokgonikana akxni nakamalakastakwanikan tiku xaʼakgstitum likatsikgo».
15 Akxni kgaxmatli uma, chatum tiku xwanikanit naʼan wayan wanilh: «Paxuwa tiku wayan* kxTamapakgsin Dios».
16 Jesús wanilh: «Chatum chixku tlawalh akgtum lanka taway, chu lhuwa tiku kawanilh pi xʼankgolh.
17 Akxni chalh hora nawayankan malakgachalh kskujni xlakata xkawanikgolh tiku xkawanikanit naminkgo: “Katantit,* xlakata putum talakkaxwilinit”.
18 Pero xputumkan wi tuku likilhankgolh. Xapulana wanilh: “Ktamawalh akgtum pukuxtu chu nakan akxilha; kakintapati, nila ktiʼalh”.
19 Chu achatum wa: “Ktamawalh tankaw wakax chu kama akxilha komo tlan skujkgo; kakintapati, nila ktiʼalh”.
20 Achatum na wa: “Aku ktamakgaxtokgli, wa xlakata nila ktiʼalh”.
21 Alistalh skujni lakgmilh xmalana chu wanilh putum uma. Wa xlakata xmalana chiki lu sitsilh, chu wanilh kskujni: “Tunkun kapit kxalaktilanka tiji chu kxalaktitsunin xtiji lanka kachikin, chu kakalita limaxkgenin chu tiku ni xatakgatsin xmaknikan chu lakgaxokgo chu lakluntu”.
22 Kaj ni limakgas, skujni wa: “Malana, tlawaka tuku limapakgsinanti, chu tlanku tanukan”.
23 Wa xlakata malana wanilh skujni: “Kapit kʼamakgapitsi tiji kxkilhtin* kachikin, chu kakawani natanukgo, xlakata natatsama kinchik.
24 Xlakata kkawaniyan: ni chatum amakgolh lakchixkuwin tiku kawanika naminkgo, nakgalhwanankgo kintaway”».
25 Ama kilhtamaku, lhuwa latamanin xtaʼankgo niku xla xʼan, chu xla kalakgtalakgaspitli chu kawanilh:
26 «Komo wi tiku kilakgmin pero tlakg paxki xtlat chu xtse* chu xpuskat* chu xkamanan chu xnatalan* lakgkgawasan chu xnatalan laktsumajan, chuna, chu asta xlatamat, nila kistalanina nawan.
27 Komo wi tiku kistalaniputun, xlikukat xkiwi nema makgapatinan* chu kakistalanilh. Komo nichuna natlawa, nila kistalanina nalitaxtu.
28 Akgtum liʼakxilhtit, ¿tiku wixin komo tlawaputun akgtum chiki* ni pulana tawila chu akxilha komo naʼakchani xtumin xlakata namasputu?
29 Komo nichuna xtlawalh, max kaj xmamilh niku namakilhtsuki, pero nila xmasputulh xchik, chu putum tiku xʼakxilhkgolh xtsukukgolh likgalhkgamanankgo,
30 xwankgolh: “Uma chixku tsukulh tlawa xchik, pero nila makgalhsputulh”.
31 O komo chatum mapakgsina tiku kgalhi akgkaw mil soldados amputun talatlawa kʼguerra achatum mapakgsina tiku kgalhi akgpuxam mil soldados, xla pulana natawila chu nakakgalhskin amakgapitsin xlakata naʼakxilha komo tlan natlajanan, ¿o nichuna?
32 Xlikana, komo nila tlajanan, akxni achatum mapakgsina makgatku minacha malakgachani xlakskujnin xlakata nawani pi ni katatlawalh guerra.
33 Wa xlakata, kalakapastaktit, komo wixin ni makgxtakgatit putum tuku katapakgsiniyan, nila kistalaninanin nalitaxtuyatit.
34 »Xlikana, matsat lu tlan. Pero komo matsat namakgatsankga xliskgokgo, ¿tuku nalimaspitniparakan xliskgokgo?
35 Nialhtu lilakan, nipara nalakgmakankan tiyat o natalakgwilhakan kgatsasa.* Latamanin makgankgo. Tiku tlan kgaxmata, kakgaxmatli».
Notas
^ Israelitas chatunu chatunu xlaʼakxilhkgo la linatalan xlakata akgtum kachikin xwankgonit chu akgtuma takanajla xkgalhikgo.
^ O: «tiku nitu kgalhikgo».
^ Xagriego: «way kaxtalanchu».
^ Alakatanu wankan «Katatit».
^ Alakatanu wankan «kgepun».
^ Alakatanu wankan «xtata chu xnana».
^ Alakatanu wankan «xchat».
^ Alakatanu wankan «xnatakamanan».
^ Kaʼakxilhti glosario.
^ Xagriego: «akgtum torre».
^ Alakatanu wankan «xʼilhti animal».
