Lucas 15:1-32
15 Ama kilhtamaku, putum xmatajinanin lilakgaxokgon chu makglakgalhinanin xlakgtastokgmakgolh xlakata nakgaxmatnikgo.
2 Chu fariseos chu lakgtsokgkinanin nitlan xlichuwinamakgolh: «Uma chixku xatapaxuwan kamakgamakglhtinankgo makglakgalhinanin, chu katawayan».
3 Wa xlakata kawanilh uma liʼakxilhtit:
4 «Kalilakpuwantit chatum chixku tiku kgalhi akgtum ciento borregos, akxni makgatsankga tantum, ¿pi ni kamakgxtakga tatipuxamakunajatsa kxakaskakni tiyat chu an putsa asta tekgsa?
5 Chu akxni tekgsa akglhtampixtawaka chu lu lipaxuwa.
6 Chu akxni chan kxchik, kamamakxtumi xʼamigos chu xtalakatsunin, chu kawani: “Kakilatapaxuwaw, xlakata ktekgsli kiborrego nema xtsankganit”.
7 Kkawaniyan pi nachuna tlakg naʼanan tapaxuwan kʼakgapun akxni chatum tiku xtlawa talakgalhin makgxtakga tuku nitlan xtlawama, nixawa tatipuxamakunajatsa tiku ni tlawamakgolh talakgalhin.
8 »O chatum puskat tiku kgalhi akgkaw tumin xla dracma,* komo makgatsankga akgtum dracma, ¿pi ni mapasi xmakgskgot chu kapalhnan kxchik chu liwana putsa asta tekgsa?
9 Chu akxni tekgsa, kamamakxtumi xʼamigas chu xtalakatsunin, chu wan: “Kakilatapaxuwaw, xlakata ktekgsli dracma* nema xakmakgatsankganit”.
10 Kkawaniyan pi nachuna, xʼángeles Dios paxuwakgo akxni tiku xtlawa talakgalhin makgxtakga tuku nitlan xtlawama».
11 Alistalh wa: «Chatum chixku xkgalhi chatiy xlakgkgawasan.
12 Chu tiku xaʼaktsujku wanilh xtlat:* “Tlat, xliputum tuku kgalhiya kakimaxki tuku akit kilakgchan”. Wa xlakata xlichatiykan kamapapitsinilh tuku xkgalhi.
13 Titaxtulh kilhtamaku, tiku xaʼaktsujku kgawasa tiyalh tuku xkgalhi chu alh kʼatanu país chu anta laktlawamilh tuku makglhtinalh, akglakgwa lilh xlatamat.
14 Akxni putum xlaktlawamikgonita, klakgatum ama país analh tatsinkstat, chu xla tsukulh tsinksni.
15 Asta lakgalh chatum tiku xalak ama país, chu xla malakgachalh kxkapukuxtun xlakata nakakuentajtlawa paxni.
16 Chu na lu xwaputun tuku xkamawikan* paxni, pero nitu xtawakan.
17 »Akxni liwana lakapastaknalh, wa: “¡Chalhuwa xlakskujnin kintlat kaʼakchani tuku nawakgo, chu akit unu ktsinksnima!
18 Naktakaxa chu naklakgan kintlat, chu nakwani: «Tlat, klakgalhinalh kxlakatin Dios xalak akgapun chu kmilakatin.
19 Nialh xlilat minkgawasa naklitaxtu. Miskujni kakilimaxtu»”.
20 Wa xlakata takaxli chu lakgalh xtlat. Akxni lakgamakgatku xminacha, xtlat akxilhli chu lakgalhamalh, tokgosun* lakgalh chu akgpixtilh chu lakatsukli.
21 Wa xlakata xkgawasa wanilh: “Tlat, klakgalhinalh kxlakatin Dios xalak akgapun chu kmilakatin. Nialh xlilat minkgawasa naklitaxtu”.
22 Pero xatlat kawanilh kskujnin: “¡Lakapala!, kamaxtutit xalhman lhakgat nema tlakg xatlan chu kalimalhakgetit, chu kamakawilitit anillo kxmakan chu kamatunutit tatunu.*
23 Na kalitantit xaskgata toro nema makgonokanit, chu kamakgnitit, chu kawayaw chu katlawaw paskua,
24 xlakata uma kinkgawasa xninit pero amakgtum lamapa; xtsankganit chu tekgskanit”. Chu tsukukgolh paxuwakgo.
25 »Pero xapuxku xkgawasa xlamacha kpukuxtu, chu akxni xtaspitma chu xtalakatsuwitilhama kchiki, kgaxmatli tatlakgni chu chuna la xtantlimaka.*
26 Wa xlakata tasanilh chatum skujni chu kgalhskilh tuku xlama.
27 Chu xla wanilh: “Mintala* taspitnit, chu nitu laninit* chu wa xlakata mintlat makgnilh xaskgata toro nema makgonokanit”.
28 Pero xla lu sitsilh chu ni tanuputulh. Wa xlakata xtlat taxtulh chu tsukulh tasaskini.
29 Xla kgalhtilh xtlat: “¡Kaʼakxilhti! Uma akglhuwata kata kskujnaninitan la miskujni, chu nipara makgtum klakatsalalh milimapakgsin, pero nipara makgtum kimaxki xaskgata cabra xlakata xakkatalipaxuwalh kiʼamigos.
30 Pero akxni chilh minkgawasa tiku katalaktlawamilh tuku xkgalhiya lakpuskatin tiku stakgo xmaknikan, makgnini xaskgata toro nema makgonokanit”.
31 Wa xlakata xla wanilh: “Kinkgawasa, wix putum kilhtamaku kintawila, chu putum tuku kkgalhi mila.
32 Pero xlilat xwanit natlawayaw paskua chu napaxuwayaw, xlakata mintala xninit pero amakgtum lamapa; xtsankganit chu tekgskanit”».
Notas
^ Kaʼakxilhti glosario.
^ Kaʼakxilhti glosario.
^ Alakatanu wankan «xtata o xtiku».
^ O: «uma liwat akgtum tawakat nema tasiya la xtawakat talaxkga».
^ Alakatanu wankan «tatsalh».
^ Alakatanu wankan «tuxuwa».
^ Alakatanu wankan «xtimaka».
^ Alakatanu wankan «Mintakam».
^ O: «ni xatatatla».
